Nfumu a kumpala a bena Isalele

Yehowa bapeele bena Isalele ba nsushi bua kuibakunkusha, anka, abaadi abakimbi nfumu. Abo nkulungula Samuele’shi: ‘Etutudile nfumu a kuitukunkusha bu ingi miilo yooso.’ Samuele bamuene shi tabibaadi buwa nya, aye nkuteka Yehowa pabitale wawa muanda. Yehowa nkumulungula’shi: ‘Ta nnoobe abapele kui muilo nya. Nnami abapele. Ebalungule’shi be kupeta nfumu, anka akebatekie bibungi.’ Sunga mbiabia babaambile’shi: ‘Ta nguitutale nya. Atukimbi nfumu!’

Yehowa nkulungula Samuele’shi, Saule nyi e na kia kuikala bu nfumu a kumpala. Pabayile Saule mu kutembela Samuele ku Rama, Samuele basanguile Saule bu nfumu p’aye kumupongoluela muimu ku mutue.

Kunyima, Samuele babungile bena Isalele buadia kuibaleesha nfumu aabo. Anka tababaadi abauku kubaadi Saule nya. Ouku buakinyi? Muanda baadi mufuame munkatshi mua mabofo. Pabaabadi bamumone, abamutuadile abo nkumuimika munkatshi mua muilo. Saule baadi nsongualume e bula na e buwa bua mpala kukila boso. Samuele bakuile’shi: ‘Talayi nfumu abaabasangula kui Yehowa.’ Muilo ooso ubaambile’shi: ‘Nfumu atumbishiibue!’

Ku mbangilo, Nfumu Saule baadi akookiela Yehowa. Kadi bashintulukile. Bu kileshesho, nfumu tabaadi na kia kushiika milambu nya. Ungi musango, Samuele baadi mulungule Saule buadia kumutengiela bua’shi afikie, anka Samuele tabafikile musango umune nya. Nka paapa Saule nkuata kitshibilo kia kushiika milambu aye nabeene. Nkinyi kibakitshiine Samuele? Baadi mumulungule’shi: ‘Tue mulombeene kukutua kukookiela Yehowa nya.’ Saule baadi na kia kupeta dilongiesha ku kilubilo kiaye su?

Kunyima kua mafuku pabayile Saule mu kulua na bena Amaleke, Samuele bamulunguile bua kupela kuleka muntu su ngumune a kuabadi na muwa. Kadi Saule nkupela kuipaa Nfumu Agage. Yehowa nkulungula Samuele’shi: ‘Saule bantapa mongo, takuete kumpushiisha dingi nya.’ Bibaadi bitape Samuele kuishimba bikata, aye nkulungula Saule’shi: ‘Bu bibokutua kukookiela Yehowa, asangula ungi nfumu.’ Pabealuluile Samuele bua kualuka, Saule bakuatshile ku luembe lua kikotshi kiaye ekisaana. Akupu Samuele balunguile Saule’shi: ‘Yehowa bakumaana bufumu.’ Yehowa baadi na kia kupa ungi muntu e naye kifulo na amukookiela bufumu.