MWISAMBO 11
Abaadi bafunde pabitale Yesu
Okwete kumona bantu be mu kifwatulo su?— Nyi Mateo, Maako, Luuka, Yowano, Mpyeele, Jaake, Yuude, na Mpoolo. Bano bantu booso abaadi na muwa mu mafuku amune na Yesu, na abaadi bafunde pabitale Yesu. Tubande kutaluula mwanda wabo.
Nkinyi kyouku pabitale bano bantu?
Bantu basatu ba kwabadi abaadi batumibwa abaadi abalambukisha pamune na Yesu. Ouku bano bantu basatu su?— Mateo, Yowano, na Mpyeele. Mateo na Yowano abaadi abauku Yesu kalolo, na abo booso abaadi bafunde pabitale nshalelo a Yesu. Yowano mutumibwa mmufunde dingi mukanda wa Bifumbulwe na ingi mikanda isatu: Yowano a Kumpala, Yowano a Kabidi, na Yowano a Kasatu. Mpyeele mutumibwa baadi mufunde mikanda ibidi i mu Bible. Abeyitanyina bu Mpyeele a Kumpala na Mpyeele a Kabidi. Mu mukanda waye wakabidi, Mpyeele mmufunde pabitale nsaa ikwete Yehowa kwakula mwiyilu pabitale Yesu shi: “Uno’u nyi mwan’ande a kifulo, andji mutookyele eshimba.”
Bantu bebungi batumono mu bifwatulo pano abetulongyesha dingi pabitale Yesu mu mikanda ibaabadi bafunde. Umune a kwabadi nyi Maako. Pangi baadi panka nsaa ibabadi bakwate Yesu na baadi auku byooso bibaadi bikitshikye. Ungi namu nyi Luuka. Baadi munganga na pangi baadi mufikye mwina Kidishitu kunyima kwa lufu lwa Yesu.
Bangi babidi bokwete kumona mu kifwatulo abaadi beena ba Yesu. Ouku mashina aabo?— Mashina aabo nyi Jaake na Yuude. Kya kumpala, tababaadi bakumiine mwi Yesu nya. Abaadi na banangushene shi bashimisha binangu. Kadi abaadi bakumiine Yesu kumongo na bafika beena Kidishitu.
Mufundji a nfudiilo a Bible omono pa kifwatulo nyi Mpoolo. Kumpala kwa kwikala mwina Kidishitu, eshina dyaye dibaadi Saule. Baadi mushikwe beena Kidishitu ngofu na baadi na bukyelo bukile kwabadi. Ouku kibaadi kifwishe Mpoolo bu mwina Kidishitu?— Dingi efuku, Mpoolo baadi ende mwishinda, musango umune aye nkupusha eyi dya muntu adikatukila mwiyilu adisamba naye. Yawa muntu baadi Yesu! Aye nkwipusha Mpoolo shi: ‘Bwakinyi okwete kubingabinga baaba bakumiine mwandi?’ Kunyima kwa byabya, Mpoolo baadi mwalulukye aye nkufika mwina Kidishitu. Mpoolo baadi mufunde mikanda 14 ya mu Bible, kubanga ku Beena-Looma na ku Beena-Ebreeyi.
Tukwete kubadika Bible efuku dyooso, ta mbyobyo su?— Nsaa yatumubadika, atulongo myanda ibungi pabitale Yesu. Okumiina kulonga myanda ibungi itale Yesu su?—