Mwipu a Mpoolo baadi n’eshimba dinyingye

Tubande kulonga kileshesho kya ungi nsongwalume baadi mupaashe muwa wa masaba aaye. Masaba a uno nsongwalume nyi Mpoolo. Tatuuku eshina dya yawa nsongwalume nya, kadi atuuku shi baadi mukite mwanda umune n’eshimba dinyingye. Okumiina kuuka mwanda ubakitshine su?—

Mpoolo baadi mu lukano ku Yeelusaleme. Abaadi bamukwate mwanda baadi alambukisha pabitale Yesu. Bangi bantu bebubi abaadi bashikwe Mpoolo, ndjo abo nkudya lukuku lubi. Abo nkwamba shi: ‘Abitungu kuteka mukata a basalayi bwashi basalayi baaye bakatuule Mpoolo ku tumiladi. Atukyebe kufwama ku bukunkula bw’eshinda, na nsaa ayikidila Mpoolo paapa, atukyebe kumwipaa!’

Mwipu a Mpoolo baadi mupushe lwalwa lukuku. Aye nkukita naminyi? Bayile ku lukano aye nkulungula Mpoolo. Musango umune Mpoolo nkumutuma bwashi alungule mukata a basalayi pabitale lwalwa lukuku lwi bubi. Opwandikisha shi bibaadi bibofule bwa mwipu a Mpoolo kulungula mukata a basalayi uno mwanda?— Nya, mwanda uno mukata a basalayi baadi muntu a kinemo kikata. Kadi mwipu a Mpoolo baadi n’eshimba dinyingye na aye nkulungula mukata a basalayi.

Mukata a basalayi baadi auku kalolo kibaadi akitungu kukita. Batshile basalayi balombeene kwikala 500 bwabadya kulama Mpoolo! Nkwibalungula bwa nkatuula Mpoolo ku Kezaree bwabwa bufuku. Mpoolo baadi mupande su?— Oolo, bano bantu babi tababaadi bapete mushindo wa kumwipaa nya! Lukuku lwabo lubi ta ndulombane nya.

Uno mwanda ngulombeene nkulongyesha kinyi?— Noobe namu we mulombeene kwikala n’eshimba dinyingye bu mwipu a Mpoolo. Abitungu twikale na mashimba anyingye nsaa yatulungula bangi bantu myanda itale Yehowa. Okyebe kwikala n’eshimba dinyingye na kutungunuka na kwakula myanda itale Yehowa su?— Su bokitshi byabya, we mulombeene kupaasha muwa wa ungi muntu.