Kulungula kwa mukandu wa Bufumu​—Kupalakasha kwa mukandu wibuwa pa nsenga ishima

BWELUMBUULA bwa kwenda mu kulungula mukandu wibuwa ku nakashika mwifuku dyoshi mwende ku mudimo. Eshimba dibabanda kupela, bobanga kupusha bu’be mukookye. Bomono shi pangi bibuwa oyikishe kwakwa ku nakashika. Bwele luteko pabitale uno mwanda akupu bwata kitshibilo kya kwenda. Bolungula mukandu wibuwa na mukwetu mukashi mununu, na dingi, katshintshi na kalolo kaaye kabakukumu kwishimba ngofu. Pokwete kulungula mukandu wa binyibinyi ku nshibo na nshibo, botentekyesha shi bangi bakwenu balume na bakashi bakwete kulungula uno mukandu umune mu nsenga ishima, abatumika na ino mikanda imune, na mbapete malongyesha amune bwa kukita uno mudimo kalolo. Pobwalukiila ku nshibo, bopusha mbidi ibakunyingi. We na muloo bu byoshi mushaale ku nshibo bisumanga!

Lelo uno, mudimo wa bulungudi nyi mudimo ukile bukata wa Bufumu bw’Efile Mukulu. Yesu baadi mutemukye shi mudimo wa bulungudi aukatama ngofu mu mafuku a ku nfudiilo. (Mat. 24:14) Mushindo kinyi ukwete kulombana buno butemuki bwaaye? Mu kino kipindji, atukyebe kwisamba pabitale bantu, mishindo, na bintu bi na muulo mu mudimo wa bulungudi, ukwete kukwasha midiyo ya bantu bwa kumona shi Bufumu bw’Efile Mukulu mbw’eyendo.