Abakuata Yesu

Yesu na batumibua abaadi batambukie kubanga kuibanda dia Kidrone mpa na ku muengie wa Olive. Bibaadi kunyima kua midi ya bufuku na mueshi ubaadi ukumbane kishengu. Nsaa ibabafikile mu lupango lua Getesemani, Yesu bebalunguile’shi: “Shalaayi pano nutooshe bufuku naami.” Akupu Yesu baadi muisesele kapindi muifuba, aye nkukunama mu nsenga. Na kinyongua kikata, batekiele kui Yehowa’shi: “Bikitshikie bu biokiebe.” Akupu Yehowa batumine muikeyilu bua kukankamika Yesu. Pabaadi Yesu mualukie kui batumibua, aye nkupeta basatu ba kuabadi mu tulo. Aye nkuakula’shi: ‘Bukaayi! Ino ta nsaa ya kulaala nya! Nsaa ibalombana yandia kutudiibua mu maasa a beshikuanyi bande.’

Mu kapindi kapela Yundase bafikile na kibumbu kikata kia bantu be na mpete na tubongie. Yundase baadi auku kubaabadi balombene nkapeta Yesu muanda abaadi abafiki misuusa ibungi mu lualua lupango. Yundase balunguile basalayi mushindo wabadia kutundula Yesu. Bakatukile enda kui Yesu amulungula’shi: ‘Nakuimuna, Mulambukishi,’ kunyima bafifile Yesu milomo. Yesu bamulunguile’shi: ‘Yundase, Ompana na kunfifia milomo?’

Yesu baadi muifubuile kui kibumbu ebepusha’shi: “Anukimbi nnanyi?” Abo nkumualuula’shi: “Yesu a mu Nazarete.” Akupu Yesu nkuibaluula’shi: “Nnaami uno,” bantu nkualuka kunyima na nkupona paashi. Yesu bebayipuishe dingi’shi: “Anukimbi nnanyi?” Abamualuluile’shi: “Yesu a mu Nazarete.” Yesu nkuibaluula’shi: ‘Nenulungula’shi nnami uno. Lekayi bano bantu bende.’

Pabamuene Mpiele bibaadi bikitshikie, basomuene lupete, aye nkutshiba etui dia Malkuse mufubi a tshite muakuidi mukata e panundu. Kadi Yesu bakumine etui dia yawa muntu, aye nkumulunga dianka. Akupu Yesu balunguile Mpiele’shi: ‘Alusha lupete lobe mu mbalo yalo. Muanda baaba boso abakuata lupete, abakafuila ku lupete. Basalayi abakuatshile Yesu bamuanya mioshi ku maboko, batumibua nkusuuka. Akupu kibumbu kia bantu kibayile naaye kui Ana, mukata a ba tshiite muakuidi. Ana nkuela Yesu nkonko, akupu aye nkumutuma ku nshibo ya Kayifase baadi Tshite muakuidi Mukata e panundu. Kadi nkinyi kibaadi kifikile batumibua?