Kibafumbuilue kui Yowano

Pabaadi Yowano mutumibua mu lukano mu kisangi kia Patemose, Yesu bamulesheshe bimonua 16 sunga binfuanyi bia mianda ayikafiki. Biabia bimonua bibaadi abileesha abikekala eshina di’Efile Mukulu na kia kutumbishibua, Bufumu buaye na kia kufika na abikakitshika kikiebe ki’eshimba diaye pa nsenga bu biakikitshikaa muiyilu.

Mu kimonua kimune, Yowano bamuene Yehowa muiyilu ku lupuna nsulu luaye lua ntumbo, mbamuifunyishe kui bakulu 24 bafuale bilamba bitooka na bifulu bia ôlo ku mitue yabo. Etaata dia mipenyo ya mpeshi na mikungulo ya tupandapanda ibafikanga ku lupuna nsulu. Bakulu 24 abaadi babandame kumpala kua Yehowa na kumulanguila. Mu kingi kimonua, Yowano banuene kibumbu kikata kia bantu ba bisamba, miilo na ndimi yooso abalanguila Yehowa. Yesu, aye Muana a mukooko, ebakunkusha na kuibatuala ku mema a muwa. Kunyima, mu kingi kimonua, Yesu babangile kumunana bu Nfumu muiyilu, pamune na bakulu 24. Mu kimonua kibalondele, Yowano bamuene Yesu alu ngoshi na nyoka mukata muikale Satana, na ba demo biaye. Yesu nkuibasumbula muiyilu abo nkupona pa nsenga.

Akupu Yowano bamuene kinfuanyi kia Muana a mukooko na bantu 144 000 mbemane ku Muengie wa Siyona. Bamuene dingi muikeyilu apapama dia kipeepi na nsenga, alungula bantu buabadia kutshiina Efile Mukulu na Kumupa ntumbo.

Mu kingi kimonua kibalondele, bamuene ngoshi ya Armagedone. Mu yaya ngoshi, Yesu na kiluilo kiaye abaipaa ndumbuluilo ebubi a Satana. Mu kimonua kia nfudiilo, Yowano bamuene kuipushena kupuidikie muiyilu na pa nsenga. Satana na lutandua luaye abayipayibua bua loso. Boso be muiyilu na be pa nsenga abaata eshina dia Yehowa bu dia kishila na kumulanguila nka bupenka buaye.