“Bufumu bobe bufikie”

Yehowa balayile’shi: ‘T’akukekala kuidila, mitanyo, mikumbo sunga lufu. Nakakumuna mpolo yoso ku meso aabo. Bantu abakalubu mianda yoso ibubi ya kala.’

Yehowa batudile Adama na Eva mu lupango lua Edene bua kushala mu butaale na mu muloo. Abaadi na kia kulanguila Nshabo umune a muiyilu na kuusha nsenga na bana baabo. Adama na Eva abaadi batombokiele Yehowa, anka mpango yaaye tayibaadi ishintulukie nya. Tubamono mu uno mukanda’shi milayilo yoso y’Efile Mukulu ayilombanaa. Bufumu buaye abukafuisha miabi ibungi pa nsenga, nka bu bibaadi muibilee Abalahama.

Binobino, Satana, ba demo baaye na bantu boso bebubi t’abekala kuanka dingi nya. Bantu boso be na muwa abekala abalanguila Yehowa. T’atukakumbu maladi sunga nkufua. Anka, atuikala efuku dioso na mbidi bukome na kuikala na muloo muanda tui na muwa. Nsenga ayikafiki Mpaladiso. Muntu oso akekala na bidibua bibuwa na nshibo ibuwa. Bantu abekala na kalolo kushi buntomboshi sunga etombo. Nyema ya mu kisuku tayiketutshinyi n’atue namu t’atukeyitshinyi nya.

Akukeekala muloo ukata apakabanga Yehowa kusangula bantu ku lufu. Atukakukila bantu ba kala abakasanguka bu Abele, Nowa, Abalahama, Sara, Moyise, Luuta, Estere, na Davide. Abakafubu neetu bua kuikasha nsenga Mpaladiso. Akukekala nsaa yoso midimo ibungi i na muulo ya kukita.

Yehowa akumiina’shi okapetekielue. Okamuuku mu mushindo oshobandile kuelela kinangu. Biabia tuifubuileyi peepi na Yehowa efuku dioso kubanga binobino na bua loso!