Mwanda wa 5

Makyenga ababanga

PAASHA pa lupango lwa Edene, Adame na Eeva abapetele nkalakasho ikile bungi. Bibaadi abitungu shi batumikye ngofu bwa kupeta bya kudya. Pamutwe pa mitshi ya bikuba bibuwa, abamwene meeba na milobo ibaadi ayimene mbalo yooso. Nyi kibaadi kifwile Adame na Eeva nsaa ibabakutshile kukokyela Efile Mukulu na kuleka kwikala mu bukuuku Naaye.

Kadi kubaadi kingi kintu kikile bubi, Adame na Eeva ababangile kufwa. Tentekyesha shi, Efile Mukulu baadi mwibadimushe shi abafu su abaadi kikuba kya mutshi kampanda. Oolo, kubanga efuku dibabekidiile ababangile kununupa akupu abo nkufwa. Tala mushindo ubabakutshile binangu pabo kupela kukokyela Efile Mukulu!

Baana ba Adame na Eeva abatandikile kunyima kw’Efile Mukulu kutuusha baledi baabo mu lupango lwa Edene. Bino abilesha shi baana namu abaadi na kya kununupa na kufwa.

Su Adame na Eeva abakokyele Yehowa, abo na baana baabo abadya kushaala na muloo. Abo booso abadya kwikala na muwa wa looso na muloo pa nsenga. Takwi muntu badya kununupa, kukumba na kufwa nya.

Efile Mukulu e na lukalo lwa shi bantu bekale na muloo na muwa wa looso, na etulaa shi kwifuku adikala bantu na wawa muwa. Ta nka penda nsenga ishima ayikalumbuluka nya, kadi bantu booso abakekala na mbidi bukome. Muntu ooso pa nsenga akekala na kipwano kibuwa na muntu naaye mpa n’Efile Mukulu.

Kadi Eeva tabaadi dingi kuuku a Efile Mukulu nya. Nyi bwakinyi pa kutanda kwa baana baaye, baadi na nkalakasho ibungi. Baadi mupete mitanyo. Kupela kwa kukokyela Yehowa kubaadi kumutwadile mpombo ibungi, tanabyo su?

Adame na Eeva abaadi na baana bebungi, balume na bakashi. Pabatandikile mwana aabo a kumpala mulume, abamupele eshina dya bu Kaayine. Mwana akabidi abamupele eshina dya bu Abele. Nkinyi kibaadi kibakitshikile? We kiuku su?

Kibangilo 3:16-23; 4:1, 2; Bifumbulwe 21:3, 4.