Abebatusha mu lupango lwa Edene

TALA akikyebe kukitshika binobino. Abatusha Adame na Eeva mu lupango lwibuwa lwa Edene. Ouku bwakinyi abebatusha mwanka su?

Mwanda abakitshi kintu kibubi bukile. Nyi bwakinyi Yehowa ebanyoko. Ouku kintu kibubi kibakitshi Adame na Eeva su?

Abakitshi kintu kyabekalanga bebatoshe kwi Efile Mukulu. Efile Mukulu bebalungwile shi mbakumbeene kudya bikuba bya mitshi ya mu lupango. Kadi kwi mutshi umune ubaadi Efile Mukulu mwi batoshe kudya bikuba, su abaadi abafu. Balamine wawa mutshi bu waye bupenka. Na dingi atuuku shi bibubi kwata kintu kyabeene, tanabyo su? Oolo, kadi nkinyi kibakitshikile?

Dingi efuku nsaa ibaadi Eeva bupenka mu lupango, nyoka besambile naaye. Banda kwela binangu! Balungwile Eeva bwashi adye kikuba kya mutshi ubaadi Efile Mukulu mwibatoshe shi tabadyanga. Aku namu, nsaa ibaadi Yehowa mukite nyoka tabamupangile bwashi ekale akula nya. Byabya bino abilesha shi nyi ngungi muntu baadi mwakushe nyoka. Yawa muntu nnanyi?

Tabaadi Adame nya. Baadi umune a ku bantu babaadi Yehowa mupangye kumpala kwa kupanga nsenga. Baba bantu mba miikeyilu, na tatwi balombeene kwibamona nya. Umune a ku ino miikeyilu babangile kwitatula. Babangile kwela binangu shi mulombeene kwikala nfumu bu Efile Mukulu. Baadi na lukalo lwa shi bantu bamukokyele pa mutwe pa kukokyela Yehowa. Naaye winyi mwikeyilu baadi mwakushe nyoka.

Uno mwikeyilu baadi na mushindo wa kudimba Eeva. Pabamulungwile shi mulombeene kufika bu Efile Mukulu su baadi kikuba, bakuminyine. Aye nkudya na Adame namu badiile. Adame na Eeva abakutshile kukokyela Efile Mukulu, nyi bwakinyi abebatushishe mu lupango lwibuwa lwa Edene.

Kadi kwi efuku adikyebe Efile Mukulu kukita bwashi nsenga ishima ikale ilongame bu lupango lwa Edene. Kunyima atukyebe kulonga mushindo oodi mukumbeene kukwasha mu kulongamisha kwa nsenga. Kadi binobino, tubande kutala kibaadi kikitshikile Adame na Eeva.