Mayi a mbangilo

Mukanda wa Bifundue abikuasha mu nshalelo a buina Nkidishitu, aukukuasha bua kupeta ma verse a mu Bible na miisambo ilombene nkukuasha bua kumona bia kukila na nkalakashi y’ofumankana nayo. Aukukuasha dingi bua kupeta bifundue biodi nabio lukalo bua kukuasha bangi bua’shi baate bitshibilo abisankisha Yehowa. Sangula penda muisambo odi nao lukalo, na tadiila bua’shi nkonko na bileshesho bia mu Bible bikukuashe. (Tala kashibo akamba’shi “Bia kufubisha uno mukanda.”) Musango umune, opete kifundue Muiyi di’Efile Mukulu akikunyingisha. Opete dingi mabue a muulo odia kuisamba na bangi, kuamba’shi verse mulombene kuibanyingisha sunga kuibakuasha.

Bia kufubisha uno mukanda

Bua kupeta muisambo kampanda, fubisha kashibo ka kukimba, sunga kutala mu ma kategori. Mukanda wa Bifundue abikuasha mu nshalelo a buina Nkidishitu mbeutshibuule mu bipingi musambobidi: Nkalakashi, muikeelo, kakongie, Nshalelo a efuku n’efuku, Kifuko, Kipuano kietu na Yehowa, na Nyikashi. We kupeta muisambo okimbi mu ma kategori. Sangula kategori ke buwa, akupu osangule muisambo okimbi. Biabia, su touku kategori kokimbi, sangula ma kategori oso na obangie kukimba mpa na p’omuena muisambo okimbi. Muushi mua muisambo oso, opete tu mitue tua muanda tufiite ngofu. Ingi nyi milongo na ingi namu i bu nkonko. P’obadika bifundue biabadi beele kuushi kua ka mutue ka muanda, kimba bia kumona mushindo wabidi bipushene na kamutue ka muanda sunga biabitusha lualuulo ku lukonko. Ingi nsaa, muisambo mbeutshibuule mu bipindi bua nkukuasha bodia kupeta tu mitue tua muanda. Na dingi, mbafubishe kipindi akiamba’shi, “Tala dingi” ki na bingi bifundue. Mu bino bifundue mui binangu abikuatshishena mutue wa muanda. Misango i bungi, opete dingi “Bileshesho bia mu Bible bilombene nkukuasha.” Kuushi kua bino, abapatuula muanda kampanda wi mu verse abadi batemune. P’obadika kino kifundue, nangushena ku biobobadika.

Mutue wa muanda oso wa uno mukanda ta wi na bifundue bioso nya. Kadi mbeukite bua’shi opete bifundue bi buwa abikukuasha, na we kufubisha ingi mikanda bua kukimbuula. (Nki 2:1-6) Bua kukimbuula ngofu, fubisha bifundue biabadi baleshe (références marginales) na ma note a kuilongiela e mu La Bible. Traduction du monde nouveau. Fubisha Mukanda aukwasha ba Temwe ba Yehowa bwa kukimbuula myanda sunga Index des publications des Témoins de Jéhovah bua kupusha kifundue kalolo na bia kuikitumikila mu mishindo ilekene. Badika mikanda ipia bua kushinkamisha’shi we na mpushisho e buwa abifundue.

Biabia, mukanda wa Bifundue abikuasha mu nshalelo a buina Nkidishitu ukukuashe bua kutundula binangu, kiukilo, na mpushisho e buwa a Bifundue bi selele. P’ofubisha uno mukanda, wekala mushinkamishe dingi’shi “Eyi di’Efile Mukulu di na muwa na bukome.”—Eb 4:12.