Mueshi wa 1

Yesu “bamwene” kenyongoshi ka nyina muana, na dingi “bapushiishe lusa pa mwanda waaye.” (Luk. 7:13) Anka Yesu ta baadi mupushe nka penda yawa nyina muana lusa nya; baadi mumuleshe lusa luaye lukata. Besambile naaye kushi mpaka, amulungula n’eyi dia kumushinkamiisha’shi: “Todilanga dimo.” Na dingi, buadia kukuasha yawa muana mukashi, basaanguile muana a yawa muana mukashi na ‘amwalwisha nyinaaye.’ (Luk. 7:14, 15) Nkinyi kiatudi balombene kulongiela ku kilengieleeshi kia Yesu kia kusaangula muana a mukashi kilele? Tubalongo’shi abitungu tuleshe lusa kui baaba benyongole. Anka, tui kuikadika na lusa bu Yesu pa kubekielanga baaba booso benyongole. Tui balombene kuata mpango ya kulesha lusa pa kuakulanga na kuibakitshiina mianda ilombene kuibakuasha na kuibanyingisha. (Nki. 17:17; 2 Kod. 1:3, 4; 1 Mp. 3:8) Sunga ntu bishima tupeela na tu bikitshiino tua kalolo, mbilombene kuibanyingisha na kuibasamba ngofu. w23.04 5-6 ¶13-15

Sunga Yesu bawukile’shi kuuku aaye ki’akatuka mu kufua, bashadile nka kuakua akita mafuku akile pa abidi, akupu enda ku Betani. Biabia, pa bafikile Yesu, Lazare tabaadi mupue kufua munda a mafuku ananka. Yesu pabafikile, bakitshiine kintu kampanda bua kukuasha ba kuuku baaye na kutumbisha Efile Mukulu. (Yo. 11:6, 11, 17) Atupete dilongiesha pabitale bukuuku ku uno muanda. Tubandeyi kutala bino: Pa baadi Mariya na Maata batume mukandu kui Yesu, ta babaadi bamutekie bua’shi afikie ku Betani nya. Babaadi baakule nka penda’shi kuuku aaye a kifulo e na maladi. (Yo. 11:3) Pa bafuile Lazare, Yesu baadi mulombene kumusangula nka kuakua kula kubaadi. Kadi, Yesu baadi mukumiine kuenda ku Betani bua nkemoneena na ba kuuku baaye Mariya na Maata. We na kuuku akumiinaa nkukuasha koshi mumutekie su? Dingi, we mulombene kumukulupila bua nkukuasha mu ‘kipungo kya mpombo.’ (Nki. 17:17) Anka bu Yesu, tui kuikadika kuuku e biabia bua bangi! w23.04 10 ¶10-11.

Patudi munkatshi mua kitompuanga, tui balombene kunangushena’shi, nsenga ipia ya Yehowa ta yaanafikie. Bino abilesha’shi lukumiino luetu ndubofule? Nya ta ngi biabidi. Tubandeyi kuata kileshesho, mu kipungo ki mashika e bukopo, tui balombene kumona’shi t’akuikalanyi kibobo. Aku namu, kipungo kia kibobo akifiki. Mu mushindo umune, su tui batshobolokie ngofu, tui balombene kupusha’shi nsenga ipia ta yaanafikie. Biabia, su lukumiino luetu ndunyingie, atuuku’shi milayilo y’Efile Mukulu, ayikalombana. (Mis. 94:3, 14, 15; Eb. 6:17-19) Biabia, na kino kishinkamiisho tui balombene kutungunuka na kutuula lulanguilo lua Yehowa pa mbalo ya kumpala mu nshalelo eetu. Abitungu dingi tunyingishe lukumiino luetu, bua kulungula mukandu wi buwa. Bantu be bungi bakuete kumona’shi, “mukandu wi buwa” pabitale kufika kua nsenga ipia y’Efile Mukulu t’aukalombana. (Mat. 24:14, Kilombeeno Kipya 2014; Es. 33:32) Abitungu tuikale bapasukie bua’shi tatukumanga kuikala na mpaka ya’shi abitulongiesha Yehowa t’abikitshika. Bua kupela’shi bino binangu bi bubi tabitufikilanga, abitungu tutungunukie na kunyingisha lukumiino luetu. w23.04 27 ¶6-7; 28 ¶14

Toodi muiyipushe namu su Yehowa aluulaa ku nteko yobe? Su mbiabia, tue bupenka’be. Bakuetu be bungi balume na bakashi abeyipushaa pabitale uno muanda, bikishekishe nsaa yabadi mu nkalakashi i bukopo. Su tukuete kukienga, na atue namu tui kumona uno muanda bu wi bukopo bua kutundula mushindo awaluulaa Yehowa ku nteko yetu. Tutaluuleyi buakinyi tui balombene kushinkamisha’shi Yehowa aluulaa ku nteko ya balanguidi baye. Bifundue abitushinkamiisha’shi Yehowa mmuitufule ngofu na tui na muulo kuadi. (Ang. 2:7; 1 Yo. 4:10) Ngi buakinyi akumiina’shi tumutekie bukuashi mu luteko. (1 Mp. 5:6, 7) Akumiina kuitukuasha buatudia kushaala peepi naye na buatudia koobesha kunyingiila nkalakashi y’atufumankana nayo. Atubadikaa misuusa yooso mu Bible’shi Yehowa baadi mualuule ku nteko ya bafubi baaye. We kunangushena ku kileshesho kampanda su? w23.05 8 ¶1-4

Mariya baadi na kipuano kiaye aye nabene na Yehowa, baadi mulame lukumiino luaye lunyingie mui Yehowa. Mariya baadi muukie Bifundue kalolo. Baadi dingi aata nsaa ya kunangushena. (Luk. 2:19, 51) Kushi mpaka tui balombene kushinkamisha’shi kipuano kia Mariya na Yehowa kibaadi kimuikashe bu mukashi e buwa bukile. Lelo uno, bana bakashi be bungi bakuete kuikitshisha bua kukita mianda bu bibaadi Mariya akitshi. Bu kileshesho, mukuetu mukashi abetanyina bu Emiko amba’shi: “Pa naadi nki bukupi naadi na kiubishi ki buwa kia mianda ya mu kikudi. Anka nsaa inaadi muibakilue naadi musangane’shi mulume ande nyi, etuelela luteko, akunkusha lulanguilo lua mu kifuko, lukumiino luande lubaadi alukulupila nka ku biabia bibaadi akitshi. Naadi mutundule’shi bibaadi abitungu ndame kipuano kiande ami nabene na Yehowa kinyingie. Binobino ne muiatshile nsaa ya kushaala bupenka n’Efile Mukulu ande, bua kuela luteko, kubadika Bifundue, na kunangushena bi binangu biaye.” (Nga. 6:5) Bakashi, su nuatungunuka na kunyingisha kipuano kienu na Yehowa, balume beenu abekala na tubingilo tui bungi tua kuinusamuna na kuinufula.​—Nki. 31:30. w23.05 22 ¶6

T’atutandikuaa na kutshiina ku’Efile Mukulu nya; anka abitungu tudime dino eyikashi. Mushindo umune watudi balombene kukita bino mpa kutala bi bipangua. P’atunyiisha kumona bi binangu bia Yehowa, bukome buaye na kifulo kiaye kuatudi abimuenekiela mu bintu bipangibue, atunyiisha kuikala na kaneemo kakata na atunyiisha kumufula. (Lom. 1:20) Ungi mushindo wa kutshiina Efile Mukulu, mpa kuela nteko nsaa yoso. P’atunyiisha kuela nteko, Yehowa anyiisha kuikala kuatudi Efile a binyibinyi. Nsaa yoso y’atumutekie bukome bua kunyingiila nkalakashi, atutentekiesha biadi na bukome bushi na nfudiilo. P’atumutumbula bua kia buntu kia nkuulo ya Muana aaye, abitutentekiesha bi kifulo kia Yehowa kuatudi. Atuisendela Yehowa bua’shi etukuashe patudi na nkalakashi, atutentekiesha’shi Yehowa e na binangu bi bungi. Ino nteko ayinyiisha kutamisha kaneemo ketu bua Yehowa. Na ino ngikashi ayinyingisha kitshibilo kietu kia kuleka kukita kintu su nkimune, kilombene kuluisha kipuano kietu na Yehowa. w23.06 15 ¶6-7

Yehowa e nka bupenka mutuushe miiya ilulame, na akitaa misuusa yooso bua’shi miiya yaye ikale ibofule kui muilo waye bua kuiyipusha. Bu kileshesho, mu siekele a kumpala kasaka ka bakunkushi-bakulu, kabaadi katundule mishindo isatu ilombene muina Nkidishitu kushaala kushi kusanyishua: (1) kuleka lulanguilo lua mankishi, nkulanguila nka penda Yehowa, (2) nkulesha kaneemo bua mase ekale kintu kia kishila, na (3) nkukookiela mayi a kulonda a mu Bible, aetukuasha biatusha kupeta kinangu kia kutambuka masandi. (Bik. 15:28, 29) Lelo uno, bena Nkidishitu be kukookiela Yehowa mu ino mishindo isatu i pabuayo naminyi? Pa kulanguila Yehowa na kumukookiela. Yehowa baadi mulungule bena Isaleele buabadia kumulanguila nka penda aye. (Miy. 5:6-10) Na pabaadi Satana mutuushe bitompuanga, Yesu balesheshe kalolo’shi abitungu tulanguile nka penda Yehowa. (Mat. 4:8-10) Ngi buakinyi, ta tui balombene kulanguila ma nkishi. Dingi, ta tui kukita lulanguilo lua bantu, bu kulanguila bakata ba bipuilo, bakata ba mianda ya politike, lulanguilo lua nyenyenyi, kukisha kapapi, na kuibamona bu b’efile mukulu. Atulanguila nka penda aye “mupangi a bintu bioso.”​—Kbf. 4:11. w23.07 14-15 ¶3-4

Ndumbuluilo a Satana mmuluile na kutambuka lusandi na kubandila Pornografi. (Ef. 4:19) Ngi buakinyi abitungu kuikala na moo w’Efile Mukulu na kushikua bubi. Mu mukanda wa Nkindji shapitre 9 atubadika pabitale binangu na kulotakana kuabadi bapuandikishe na bana bakashi babidi ba mu kifuanyi. Booso babadi baleshe, be nka bu luitanyino lua bantu bashi na kapatupatu, “baaba bashi na binangu.” Ooso a kuabadi amba’shi: ‘Fikai mu nshibo mwande, nudye bidibua byande.’ (Nki. 9:1, 4-6, EEM) Anka baaba abakumiina ngitanyino ibidi, abapete bipeta bilekeene. Badika luitanyino lua “mukashi mulôtakane.” (Nki. 9:13-18) Eele musaase na kuitanyina baaba bashi na binangu’shi, “Fikai nutwele kuno” na nusangale nami pamune. Nkinyi kilombene kuibakitshikila? Anka “baaba bantu tabashingula’shi lufu aluibatengiela kwê.” Abetudimusha pabitale ‘mukashi sha lusandji’ na ‘sha lubombo.’ Abetulungula’shi: “Eshinda dya ku nshibo yê adyalala ku lufu.” (Nki. 2:11-19, EEM) Nkindji 5:3-10, adimusha pabitale ungi “muana mukashi sha lubombo” na ‘mwikêlo aukunkusha ku lufu.’ w23.06 21-22 ¶6-7

Abitungu bakulu bekale bu bileshesho bibuwa bia nkatshinkatshi. (1 Ti. 3:2, 3) Bu kileshesho, mukulu ta mmulombene kukulupila’shi bakumiine nka mueneno aaye misuusa yooso, muanda’shi aye e na bipua bi bungi kukila bangi bakulu nya. Abitungu yawa mukulu aukie’shi kikudi kia Yehowa ki kutakula muntu ooso mu kasaka ka bakulu, bua kuakula muanda kampanda aukuatshishena ku bitshibilo bibuwa biabata. Na su mayi a kulonda a mu Bible ta ngatupilue, bakulu be na nkatshinkatshi abakumiina kukuatshishena kitshibilo kibaabakumiina kui bakulu bebungi, sunga kiakia kitshibilo kielekeena na aabo mueneno a mianda. Bena Nkidishitu abapetaa miabi ibungi p’abekala na nkatshinkatshi. Atusangeelaa kipuano kietu kibuwa na bakuetu balume na bakashi, na butaale mu kakongie. Atuikalaa na muloo wa ngikashi ibuwa ya bu muntu builekeene na bipikua bi munkatshi mua balanguidi ba Yehowa be mu buumune. Kintu ki na muulo ukata, tui na muloo wa kuuka’shi atuambula nkatshinkatshi y’Efile Mukulu eetu, Yehowa. w23.07 25 ¶16-17

Ndaniele baadi alongo matemuki na kabingilo ke buwa ka kuuka bia binyibinyi. Ndaniele baadi dingi muiyishe, na baadi awuku’shi Yehowa mmulombene kumukuasha buadia kupusha matemuki, nka su bashaala mu kipuano naye na kumukookiela. (Nda. 2:27, 28) Ndaniele baadi muleshe’shi e na kuiyisha p’aye kukulupila ku bukuashi bua Yehowa. (Nda. 2:18) Ndaniele baadi dingi elongiela ngofu. Baadi akimbuula Bifundue biyokielue bibaadi kuanka mu aa mafuku aaye. (Yel. 25:11, 12; Nda. 9:2) We kuambula Ndaniele naminyi? Nangushena buakinyi olongo matemuki a mu Bible. Kuilongiela koobe kua matemuki a mu Bible akukutakulaa bodia kuikala na lukalo lui bukopo lua kuuka bia binyibinyi? Su mbiabia, Yehowa akukuasha. (Yo. 4:23, 24; 14:16, 17) Bangi namu abalongaa na lukulupilo lua’shi bapete bishinkamiisho abilesha’shi Bible ta mmuyokielue n’Efile Mukulu. Abanangushena’shi su Bible ta mmuyokielue n’Efile Mukulu, bekuata kitshibilo abo banabene kia ki buwa na ki bubi. Ngi buakinyi abitungu tulongie na binangu bi buwa. w23.08 9 ¶7-8

Tui kuiatshila bushito bua mianda yatush’abalombasha, muanda tukuete kuipuandikisha na bangi. (Nga. 6:4) Su tubakitshi biabia, tui kuikala na luabi na kuipikeena. (Nga. 5:26) Su tuekitshisha bua kulombasha mianda yabadi bapue kulombasha kui bangi, bi kuitutakula mu kukita mianda ikile bukome buetu na ikile nshalelo atudi naye. Su “kukulupila kintu kyooshyoopete akunyengyesha kwishimba,” biabia abinyisha kuitutshobolosha kuishimba patutengiela kintu kampanda kia tush’anapete. (Nki. 13:12) Su tuibapue kukita biabia, bi kuitutshobolosha na kubofusha lubilo luetu lua ku muwa wa ikalaika. Tuekitshishanga obe nabene ngofu kukila abikutekie Yehowa. Yehowa taa na kutekie bua’shi omupe kintu kampanda kioshii nakio. (2 Ko. 8:12) Ikala mushinkamishe’shi Yehowa tapuandikishaa mianda yokitshi na abikitshi bangi nya. (Mat. 25:20-23) Yehowa ata mudimo oobe okitshi na muwa oobe ooso, na lulamato lobe looso, na kunyingiila koobe kooso na muulo. w23.08 29 ¶10-11

Yehowa baadi mualuule ku kuidila kua Samesone n’aye nkumukuasha mu kilengeleeshi p’aye kumutuushila ka musulo ka meema. Samesone pabatomene meema bapushiishe bukome, “mbidi nkumunyinga na aye nkwishinka.” (Bans 15:19) Abimueneka pangi’shi, kano ka musulo ka meema kapia, kabaadi kashaale bipua bi bungi kunyima kua mutemuki Samuele kuyokielua bua kufunda mukanda wa Bansushi. Bena Isaleele babaadi abamono ano meema aalaala, babaadi balombene kutentekiesha’shi be kukulupila mui Yehowa’shi, akuashaa bafubi baaye baasha lulamato nsaa yabadi mu lukalo. N’atue namu tui balombene kukulupila mui Yehowa’shi etukuasha, sunga tuekala na ngobesha i naminyi, binangu bi naminyi, sunga tuekala bapue kulombasha mianda kinyi mu mudimo waye. Abitungu tukumiine na kuiyisha kooso’shi koobesha kua binyibinyi akutuukaa nka nsaa y’atukulupila mui Yehowa. Anka bu bibaadi Samesone munyingishibue pabatomene meema ababamupeele kui Yehowa, n’atue namu atukanyingishibua mu kikudi, p’atudi bidibua bioso biabetupa kui Yehowa biatudi nabio binobino.​—Mat. 11:28. w23.09 4 ¶8-10

Tui kukita naminyi nsaa y’atuikala mu muanda wi bukopo, bu nsaa i muntu kampanda asabuula eshina di’Efile Mukulu eetu, na kubepuula Bible? Abitungu tutekie Yehowa kikudi kiaye na binangu biaye buatudia kualuula na kupopeela. A we kukita naminyi su kunyima omona’shi tue mukite mianda mu mushindo wibuwa okumiinanga? We mulombene dingi kuteka pabitale wawa muanda na kunangushena ku mushindo odi mulombene kukita bibuwa musuusa aufiki. Dingi, Yehowa aketupa kikudi kiaye kiselele buatudia kuishinka, na kuikala na kupopeela. Ma verse e bungi a mu Bible, ngalombene kuitukuasha nsaa y’abituelela bukopo bua kuakula na kupopeela. Kikudi ki’Efile Mukulu nkilombene kuitutentekiesha ano ma verse mu binangu. (Yo. 14:26) Bu kileshesho, mayi a kulonda atupete mu mukanda wa Nkindji ngalombene kuitukuasha bua kuikala na kupopeela. (Nki. 15:18) Bible alesha dingi buakinyi bi buwa kushaala na kupopeela mu mianda ayituiyongosha.​—Nki. 10:19; 17:27; 21:23; 25:15. w23.09 15 ¶6-7

Mpiele mutumibua baadi muukie’shi taadi peepi na kufua. Munda a bipua bioso biadi mufube na lulamato, baadi mutambukie pamune na Yesu, na baadi mufube afungula ma terituare apia a kulungula mukandu wibuwa na kufuba bu muina kasaka ka bakunkushi-bakulu. Kadi mudimo wa Mpiele taubaadi ulombane ooso nya. Mu bipua 62-64, bino bipungo bietu (B.B.) Yehowa baadi muyokiele Mpiele mutumibua buadia kufunda mikanda ibidi ya mu Bible​—1 Mpiele na 2 Mpiele. (2 Mp. 1:13-15) Mpiele bafundile mikanda yaye iyokielue mu kipungo kibaadi bena Nkidishitu naye “benyongole muanda wa makienga elekeenelekeene.” (1 Mp. 1:6) Bantu be bubi, babaadi abatompo kutuesha malongiesha a madimi na muikeelo wi butete mu kakongie. (2 Mp. 2:1, 2, 14) Bena Nkidishitu babaadi bashaale mu Yelusalema, babaadi peepi na kumona “Nfudiilo a bintu bioso.” Kuamba’shi kubutula kiakia kibundi na ndumbuluilo a mianda a bena Yuda kui basalayi ba bena Loma. (1 Mp. 4:7) Kushi mpaka, mikanda ya Mpiele ibaadi ikuashe bena Nkidishitu bua kumona kiabadia kukita bua kunyingila bitompuanga bi kuanka na bua kuilumbuula bua bitompuanga bia mu mafuku aafiki. w23.09 26 ¶1-2

Nka bu Yesu, tui balombene kulonga bia kukookiela nsaa yatudi mu nkalakashi. Bu kileshesho, pababangile kipupa kia COVID-19, pababetulunguile’shi tuimikie kuenda mu bisangilo ku Nshibo ya Bufumu, sunga kulungula mukandu wibuwa ku nshibo na nshibo tubaadi na bukidi bua kukookiela su? Kukookiela koobe akukukaluila, kukuikasha mu buumune na bakuenu bena Nkidishitu, na akusankisha Yehowa. Binobino, ooso a kuatudi muilumbuule kalolo, bua kukookiela ku buludiki booso buabua buatukapete mu mpombo ikata. Muanda bua’shi tupashibue abitungu kukookiela! (Yob. 36:11) Kia kumpala atukumiina kukookiela Yehowa, muanda tui bamufule na atukumiina kumusankisha. (1 Yo. 5:3) Tatui balombene kufuta Yehowa bua bintu bioso biadi muitupe. (Mis. 116:12) Anka, tui kumukookiela na kukookiela baaba boso be na matalua kuatudi. P’atukookiela atulesha’shi tui na binangu. P’atuikala na binangu atusankisha eshimba dia Yehowa.​—Nki. 27:11. w23.10 11 ¶18-19

“Su muikeyilu baadi esamba nobe, bodia kumuteemesha ku bibaadi aakula su? Oolo, lelo uno, muikeyilu kuete akula na “bena eumbo dioso, kisamba kioso, ludimi loso, na muilo oso.” Kuete akula kinyi? Kuete akula’shi: “Tshinayi Efile Mukulu, na mutumbisheyi . . . languilayi Yawa bakitshine eyilu na nsenga.” (Kbf. 14:6, 7) Yehowa nyi Efile Mukulu umune a binyibinyi mulombene’shi bantu booso bamulanguile. Tui na lutumbu lukata bu biadi muitupe mushindo wa kumulanguila mu ntempelo aaye mukata a mu kikudi! A ntempelo a mu kikudi nkinyi, na mbalo kinyi yatudi balombene kupeta mbapatuule kantu pa kantu pa bimutale? Ntempelo a mu kikudi, ta nshibo yabadi bebakie na matafuadi nya. Nyi mpango ya Yehowa ya lulanguilo luadi mukumiine luimeene mu mulambu wa nkuulo wa Yesu Nkidishitu. Mpoolo mutumibua apatuula ino mpango mu mukanda waye ubaadi mufundile bena Nkidishitu ba mu Ebelu ba mu siekele a kumpala, babaadi bashaale mu Yudeya. w23.10 24 ¶1-2

Mu kipua kia 522 K.B.B., beshikuanyi naabo babaadi bobeshe kuibemika bua kuibakuula ntempelo a Yehowa. Anka Sekadia baadi mushinkamiishe bena Yuda’shi Yehowa mmulombene kufubisha bukome bua kikudi kiaye bua kukatusha bikokoshi bioso. Mu kipua kia 520 K.B.B., Nfumu Dariuse baadi muibalekiele bua’shi batungunukie na mudimo wa kuibakuula ntempelo, na aye nkuibapa makuta buabadia kukita uno mudimo. Na dingi baadi mutume eyi kui mbulamatadi bua’shi e bakuatshishene. (Esel. 6:1, 6-10) Yehowa baadi mulee muilo waye’shi, mmulombene kuibakuasha nka su babatuulu mudimo wa kuibakuula ntempelo aaye pa mbalo ya kumpala. (Ang. 1:8, 13, 14; Sek. 1:3, 16) Kunyima kuabo kuibanyingisha kui batemuki, bena Yuda ababangile dingi mudimo wa ntempelo mu kipua kia 520 K.B.B., na babamupuile kumpala kua’shi bipua bitaano tabialombeene. Pa muanda wa’shi babaadi batuule kikiebe ki’eshimba di’Efile Mukulu pa mbalo ya kumpala sunga mbibakudi nkalakashi, babaadi bapete bukuashi bua Yehowa. Bu kipeta, babaadi balanguile Yehowa na muloo.​—Esel. 6:14-16, 22. w23.11 15 ¶6-7

Sunga bikale’shi bantu be bungi mbapushe pabitale Abalahama, anka ta bauku bi bungi pa bimutale nya. Biabia obe ouku mianda i bungi pabitale Abalahama. Bu kileshesho, ouku’shi Abalahama babaadi ba muitanyine bu “Nshaye na boso be na lukumiino.” (Lom. 4:11) We mulombene kuiyipusha’shi: ‘Ne kutambukila mu matabula a Abalahama na kuikala na lukumiino bu lubaadi nalo su?’ Oolo, we kuibikita. Mushindo umune watudia kuikala na lukumiino bu lubaadi nalo Abalahama, mpa kuilongiela kileshesho kiaye. Eyi di’Efile Mukulu aditulungula’shi Abalahama bakatukile mu nsenga yabo, aye nkuenda mu kushaala mu tushibo tua mapema munda mua bipua bi bungi, na baadi mutompibue buadia kulambula muana aye a kifulo Isake. Abalahama bakitshine ino mianda yooso muanda baadi na lukumiino lui bukopo mui Yehowa. Lukumiino lua Abalahama na bikitshino biaye, bibaadi bimutuale mu kukuminyibua n’Efile Mukulu, na kuikala naye mu kipuano. (Yak. 2:22, 23) Yehowa mmuitufule atue boso, mpaa noobe. Buatudia kukuminyibua naaye na kuikala naye mu kipuano. Ngi buakinyi baadi muyokiele Mpoolo mutumibua na Yakobo buabadia kufunda kileshesho kia Abalahama mu Bible. w23.12 2 ¶1-2

Bakuetu bakashi bekale na mushindo wa kuteemesha na kuakula na kalolo kooso. Abitungu’shi muina Nkidishitu ekale akula kalolo na bangi. Pabitale uno muanda mutumibua Yakobo etupa elango di buwa nsaa y’akula bino bishima bi kunundu. Nsaa y’oteemesha kalolo apakula bangi, olesha’shi buetuulu pa mbalo yaabo. (1 Mp. 3:8) Su otundula’shi t’okuete opusha akiakula muntu kalolo sunga bi’apusha, ela nkonko i buwa na dingi ata nsaa ya kunangushena kumpala kodia kuakula. (Nki. 15:28) Eyipushe obe nabene’shi: “Bino biankiebe kuakula mbia binyibinyi na mbilombene kunyingisha winyi andungula?” Nakula na kaneemo na kalolo su? Longiela kui bakuetu bakashi banyingie mu kikudi abauku kuakula kalolo na bangi. (Nki. 31:26) Tuula binangu biobe ku mushindo w’abakula. P’onyiisha kulonga ino ngobesha, onyiisha kuikala mu kipuano ki buwa na bangi. w23.12 21 ¶12

Lelo uno, Yehowa mmulombene kufubisha kifuko kietu, ba kuuku beetu, sunga bakulu buabadia kuitukuasha. Biabia su tui batapikie kuishimba, abitungu tui bilungule namu bangi. Pangi tui kukumiina nka’shi tuikale pa bupenka. Kukita biabia ta kui bubi nya. Kadi we kukita kinyi bua kupeta bukuashi bua Yehowa? Tuetolanga pa bupenka. Nsaa y’atuitolo pa bupenka, atukambaa kutuula binangu bietu nka ku mianda yatudi naayo, na atukambaa kunangushena nka pa bitutale atue banabene. Na mianda yatudi nayo ayinyinshaa kutama. Kunangushena mu uno mushindo, kui kuikala na bukitshishi ku bitshibilo bi’atuata. Mu kipungo kia nkalakashi, atue booso atuikalaa na lukalo lua kuikala pa bupenka, bikishekishe su tubafumankana na muanda ukata, awituinyongosha. Biabia, su buetolo pa bupenka, we nka bu’shi bopele mishindo yabakuete kufubisha kui Yehowa bua kuitukuasha. Biabia, kumiina nka bukuashi bua kifuko kiobe, bua ba kuuku, na bua bakulu. Obe mona biabia bioso nka penda’shi Yehowa kuete akukuasha.​—Nki. 17:17; Yesh. 32:1, 2. w24.01 24 ¶12-13

Banazi babaadi abakitshi mutshipo wa kupela kutshiba nyene yabo. Bino bibadi abilesha’shi abakokiela Yehowa n’eshimba dimune. Muanda wa malua, ingi nsaa bangi bantu tababadi abanemeka banazi sunga kuibakuatshishena nya. Biabia, bibadi abitungu’shi Banazi bekale n’eshimba dinyingie bua kulama mutshipo wabo, na kuikala bu belekene na bangi. (Am. 2:12) Bu biatudi basangule bua kukokiela Yehowa, tui belekene na bangi bantu betuifunyishe. Biabia, tui na lukalo n’eshimba dinyingie bua kulungula bangi’shi tui Tumonyi tua Yehowa ku mudimo sunga ku kalaasa. Bu abiende na kuluila muikelo na bikitshino bia bantu ba pa nsenga, mbilombene kuituelela bukopo bua kulama nshalelo muipushene na mayi a kulonda a mu Bible, na kulungula bangi mukandu wibuwa. (2 Ti. 1:8; 3:13) Kadi ikala otentekiesha’shi ‘atusankisha eshimba dia [Yehowa]’ p’atulesha eshimba dinyingie na kuikala belekene na bantu bash’abamufubila.​—Nki. 27:11; Mal. 3:18. w24.02 16 ¶7; 17 ¶9

Tubandeyi kutaluula bantu belekeene babaadi mu kakongie ka mu Loma. Munkatshi muabo ta mubaadi nka penda bena Yudeya babaadi bakule na kukookiela Muiya wa Moyise nya, anka mubaadi dingi bantu ba bingi bisamba babaadi bakule na bipikua bilekeene ngofu. Bangi bena Nkidishitu babaadi ba mpika, bangi namu babaadi bantu balungantu. Pangi bangi babaadi mpaa na bu bakata ba ba mpika. Mmushindo kinyi ubaadi baaba bena Nkidishitu batungunukie na kuileshena kifulo munkatshi muabo, sunga mbibaabadi bakudile mu bipikua bilekeene? Mpoolo mutumibua baadi muibanyingishe buabadia ‘kuikuukishena.’ Bino abilesha kinyi? Kino kishima kiabadi baleshe bu ‘kukuukila’ akilesha kutambula muntu kampanda na kalolo kooso, bu bantu ba mu nshibo yoobe, sunga ba kuuku boobe. Bu kileshesho, Mpoolo balunguile Filemone, biadia kukuukila Onesime baadi ende amba’shi: ‘Mukuukile na kalolo koso.’ (Fil. 17) Na Priskila na Akila babakuukiile Apolose, baadi ki muenyi mu buina Nkidishitu abamuatshile na “bamupatuluila eshinda di’Efile Mukulu kalolo.” (Bik. 18:26) Baaba bena Nkidishitu, tababaadi balekiele kuilekeena kuabo bua’shi kutuushe bilumbu pankatshi paabo nya. w23.07 6 ¶13

Kabingilo kakata akatungu’shi w’elambule kui Yehowa obe nabene nka’shi we mumufule. Kifulo kiobe takimeenanga nka ku bi’opusha mu binangu biobe nya. Anka abitungu kikale kimeene ku “kiukilo kia binyibinyi” na “mpushisho a mu kikudi,” kuamba’shi yaya mianda yodi mulongie pabitale Yehowa ayikukuasha bua’shi kifulo kinyiishe kutama buaye. (Kol. 1:9) Kuilongiela koobe kua Bible akukushinkamiisha ino mianda isatu: (1) Yehowa e kuanka binyibinyi, (2) Bible nyi Eyi diaye diyokielue, na (3) afubishaa ndumbuluilo aaye bua kulombasha kikiebe ki’eshimba diaye. Bano booso belambule abo banabene kui Yehowa, abauku malongiesha a kitako atupete muiyi di’Efile Mukulu, na be na nshalelo muipushene na mayi aaye a kulonda. Abekitshishaa muabo mooso bua kulungula bangi pabitale mianda yabadi balongie. (Mat. 28:19, 20) Kifulo kiabo akinyiisha kutama bua Yehowa na be na lukalo lua kumulanguila nka penda aye. Nnobe namu we na luno lukalo su? w24.03 4-5 ¶6-8

Abigaile baadi muibakilue na Nabale, abateemunaa mu Bible bu ntomboshi na baadi bubi bukile. (1 Sam. 25:3) Bibaadi bukopo bukile bua Abigaile kushaala na uno muntu e biabia. Abigaile baadi namu na mushindo wa kupela mulume aaye? Oolo. Abigaile bapetele uno mushindo, nsaa ibafikile Davide baadi na kia nkekala bu nfumu a bena Isalele mu mafuku aafiki, bua’shi ayipee mulume aaye baadi mumusabuule na basalayi baye. (1 Sam. 25:9-13) Abigaile baadi mulombene kusuuka na kutadiila’shi Davide ayipee mulume aaye. Anka tabaadi mutadiile’shi bino bikitshikie nya, na baadi mubofushe Davide bua’shi alekie Nabale na muwa. (1 Sam. 25:23-27) Buakinyi bakitshine biabia? Abigaile baadi mufule Yehowa na kuneemeka mayi a kulonda a Yehowa muiyibakishi diaye. Abigaile baadi auku’shi Yehowa amonaa eyibakishi bu kintu kia kishila. Baadi akumiina kusankisha Efile Mukulu, na ngi kibaadi akimutakula bua kuibikita bua’shi apaashe ba mu nshibo muaye mpaa na mulume aaye. Abigaile baadi mukite mianda lubilubilo bua kutosha Davide bua’shi tala ayipaa Nabale. w24.03 16-17 ¶9-10

Mu kakongie kenu mui bakuetu abakiebe kupelapesha nshalelo abo bua’shi bamone bia kuipana ngofu mu mudimo wa Yehowa su? Ouku ba nsongua abakaluila lukumiino luabo ku kalaasa n’eshimba dinyingie, sunga biekala’shi ta mbibofule? Kui abetatshisha bua kushala na lulamato aku abebakiengiesha kui bifuko biabo su? Tukimbeyi mishindo yoso bua kuisamba nabo na kuibanyingisha pa kuibashinkamisha’shi tukuetu kusanka bua biabesumina ingi miloo na biabadi n’eshimba dinyingie. (Fil. 4, 5, 7) Yehowa, Auku’shi atukiebe kukita n’eshimba dimune mianda ayimusankisha, n’ashi atukumiina kuisumina ingi miloo buatudia kuikala na nshalelo muipushene na mutshipo wetu. Etupa kinemo kikata, nsaa y’etupa mushindo wa kumulesha’shi tui bamufule. (Nki. 23:15, 16) Atue boso tuikale na kitshibilo kia kutungunuka na kufubila Yehowa, na kumupa kiakia kiatudi nakio kibuwa n’eshimba dietu dioso. w24.02 18 ¶14; 19 ¶16

Nangusheena ku muanda ubakitshikile mu kipua kia 29 bino bipungo bietu (B.B.) pa babangile Yesu mudimo waye wa bulungudi, Yesu na nyinaye Mariya, babaadi bebetanyine ku musangeelo wa eyibakishi mu Kanaana. Mariya, pangi baadi akuasha mu kupa kua bantu abafiki mbalo. Anka mu musangeelo wa eyibakishi, maalua nkupua. Mariya bayiile lubilo kui Yesu aye nkumulungula’shi: “Ta be nanyi mâlwa a nfinyo.” (Yo. 2:1-3, EEM) Yesu bakitshiine kinyi? Bakitshiine kilengieleeshi kia kualuula meema afika “mâlwa a nfinyo akile buwa.” (Yo. 2:9, 10, EEM) Yesu bakitshiine bilengieleeshi bi bungi mu mudimo waye wa bulungudi. Baadi mufubishe bukome buaye bua kukita bilengieleeshi, bua kukuasha binunu bia bantu. Bu kileshesho, penda nka bilengieleeshi biaye bibidi, badishiishe bana balume 5 000, na kunyima adiisha nyii bana balume 4 000 pangi bungi bua bantu booso bubaadi bukile pa 27 000 su tuasanga bana bakashi na bana babaadi panka. (Mat. 14:15-21; 15:32-38) Mu bino bioso bilengieleeshi bibidi, Yesu baadi mupaashe dingi bantu babaadi na maladi be bungi.​—Mat. 14:14; 15:30, 31. w23.04 2 ¶1-2

Kunyima kua muanda awituinyongosha ngofu kuitukitshikila, aa mafuku tui balombene kuipusha’shi tui bakookie ku mbidi mpaa na mu binangu. Nka bu Eliya tui kupusha’shi abitungu tuikitshishe ngofu, sunga’shi abitungu tuukie nka penda kulaala. (1 Bf. 19:5-7) Tui na lukalo na bukuashi bua’shi tutungunukie na kufubila Yehowa mu mudimo waye. Mu ino mianda yooso, Yehowa etushinkamiisha, bukuashi buaye bui mu mayi e mu Kifundue kia lelo uno. Nfumu Davide baadi mupete buno bukuashi. Nsaa ibaadi Davide mupete nkalakashi ibukopo na beshikuanyi baaye, balunguile Yehowa’shi: ‘Mboko yoobe ilume ayiinyingisha.’ (Mis. 18:36) Yehowa etukuashaa dingi pa kutuma bangi bua’shi betukuashe. Bu kileshesho, nsaa ibaadi Davide epusha mubofule, kuuku aaye Yonatane bafikile mu kumumona, amukuasha mu binangu na bishima abimukankamika. (1 Sam. 23:16, 17) Mu mushindo umune, Yehowa baadi musangule Elisha buadia kuikala akuasha Eliya.​—1 Bf. 19:16, 21; 2 Bf. 2:2. w24.01 23-24 ¶10-12

Yehowa e na kalolo na nsha bintu bi bungi. Ino ngikashi ayilesha “binangu bia binyibinyi” biabadi baleshe bu muana mukashi. Ino ngikashi ayilesha binangu bia binyibinyi, mbeyileshe mu mukanda wa Nkindji shapitre 9 bu muana mukashi. Uno muanda awamba’shi uno muana mukashi a mu kinfuanyi baadi mulumbuule biakudia, maalua a nfinyo, na kutuula biakudia ku mesa kalolo mu nshibo yaye. (Nki. 9:2) Biabia, muyile verse 4 na 5: “Binangu bia binyibinyi [biabetanyina bu muana mukashi] abilungula bantu booso bakutue binangu’shi: ‘Fikai nudye kiakudya kyande.’” Buakinyi abitungu tuende ku nshibo ya binangu bia binyibinyi na kudia bidibua biabitupa? Muanda Yehowa akumiina’shi bana baye bekale na binangu na bapashibue. T’akumiina’shi tupete malongiesha a mu nshalelo mu mushindo wi bubi nya. Na t’akumiina’shi tukite bilubilo bilombene kuitutapa kuishimba nya. Ngi buakinyi ‘abikila balulame binangu.’ (Nki. 2:7, EEM) Su tui na moo wibuwa pabitale Yehowa, atukitshi mianda ayimusankisha. P’atutemesha elango diaye dia binangu, atuikala na muloo wa kuiditumikila.​—Yak. 1:25. w23.06 23 ¶14-15

Sunga tuapusha’shi tui na ngobesha ipeela yatushi bia kukita bi bungi mu mudimo w’Efile Mukulu, abitungu tushaale bashinkamishe’shi Yehowa asankilaa kuikitshisha kuetu bua kumusankisha n’eshimba diaye dioso. Atuibiuku naminyi? Mu mafuku a Sekadia, Yehowa batekiele mutemuki aaye buadia kukita lubango lua Oolo, na lua Arja, bibaabadi abatumu kui bena Yuda babashadile mu Babilone. (Sek. 6:11) Luno “lubango lua bufumu,” lubaadi lulombene kukuasha bu “kitentekiesho” bua bia buntu biabo bibaabadi abatusha na kalolo kooso. (Sek. 6:14) Abitungu tushinkamishe’shi Yehowa t’anayiluankane kuikitshisha kuetu n’eshimba dietu dioso bua kumufubila mu kino kipungo ki nkalakashi nya. Kushi mpaka, atukatungunuka nka na kufumankana na mianda i bukopo mu ano mafuku a ku nfudiilo. Mpaa na nshalelo akanyiisha kuluila mu mafuku aafiki. (2 Ti. 3:1, 13) Biabia, t’abitungu’shi tukambe kuikalakasha bua ino mianda nya. Tentekiesha mayi a Yehowa kui muilo waye mu mafuku a Angai abaadi aamba’shi: “Nee neenu . . . Tanutshiinanga kintu sunga nkimune.” (Ang. 2:4, 5) N’atue namu abitungu tushinkamishe’shi Yehowa ekala netu, nka su tubatungunuka na kuikitshisha bua kukita kikiebe ki’eshimba diaye. w23.11 19 ¶20-21

Yehowa badia kupela kufundisha bilubilo bia Mpiele mutumibua mu Bible. Anka Baadi muibifundishe mu Bible bua’shi bitulongieshe muanda kampanda. (2 Ti. 3:16, 17) Kulonga pabitale kubofula kua uno muana mulume, na bibaadi epusha nka bu atue, nkulombene kuitukuasha bua kumona’shi Yehowa t’etutekaa bua’shi tuikale bapuidikie nya. Akumiina’shi tutungunukie na kumufubila sunga mbiatudi bantu be na kubofula. Buakinyi bi na muulo bua’shi tutungunukie na kufubila Yehowa? Sunga kunyima kuatue kupusha’shi tui bapue kukambila kubofula kampanda, tui kukita nka kilubilo dingi. Anka t’abitungu tubofule na kulumbuula mudimo wetu. Atue booso atuakulaa sunga kukita muanda kampanda awituinyongosha kunyima. Biabia su tuakutua kubofula, Yehowa aketukuasha buatudia kutungunuka na kuenda kumpala. (1 Mp. 5:10) Yesu balesheshe Mpiele lusa sunga mbibaadi na bilubilo, lualua lusa lui kuitutakula namu n’atue bua kutungunuka na kufubila Yehowa. w23.09 20-21 ¶2-3

Yesu baadi mulombene kupaasha Lazare, nka bu bibakuile Maata mayi e mu kifundue kietu kia lelo. Anka Yesu baadi akumiina kukita ungi muanda aukaanyisha ngofu. Amulaa’shi: ‘Mukwenu akasaanguka. Bambile dingi’shi: “Ami, ne lusaangukilo na muwa.” (Yo. 11:23, 25) Eyendo, Efile Mukulu bapeele Yesu bukome bua kubusha bafue. Kumpala, basanguile ka nsonguakashi ako kaki’akakatuka mu kufua, asangula nyi ka nsongualume, abimueka’shi diadia efuku, kubafuile muana mulume. (Luk. 7:11-15; 8:49-55, Kilombeeno Kipya 2014) Anka, baadi mulombene kubusha muntu kampanda tabaadi mupue kufua takudi mafuku ananka na mbidi yaye tayibaadi ipue kunyanga su? Mariya ungi mukuabo mukashi na Lazare, bayile mu kufumankana na Yesu. Mariya, baadi muakule naye nka ano mayi amune amba’shi: “Mwanaana, su boody’a kwikala panka, mukwetu tabaady’a kufwa nya.” (Yo. 11:32) P’aye kuibamona na kupusha Mariya na bangi bana bakashi bakuete kudila, Yesu baadi mupushe bubi bukile. Ku muanda baadi mupushe lusa lukile bua ba kuuku baaye, baadi mudile atusha mpolo. Baadi mupushe bi’abikiengieshaa kuishimba nsaa i muntu oodi mufule afu. Mu binyibinyi, e na kinsukunsuku kioso kia kupudisha mianda ibaadi itushe mpolo yabo! w23.04 10-11 ¶12-13