Ntshinaadi nakumina kufwa nya!

BINAADI KALA

Ne mutandikwe mu Paddington, kipindji kya kibundji kya Londre ki na bantu bebungi ngofu, mwiumbo dya Angleterre. Tubaadi bashale na mama na ba taata bande basatu. Nshami baadi na kyubishi kya kwenda na kwaluka mbalo ibaatudi bashaale pa mwanda wa maalwa abaadi akwatshika.

Panaadi mukinga, mama bandongyeshe bya kwela luteko bufuku booso. Naadi na ka Bible kapeela kabaadi na penda mukanda wa Misambo, na naadi mukimbe bya’shi ngikale neyiyimbi bu loono. Mu ungi mukanda unaadi nao, naadi mwimubadikye uno mwaku wankii mulamine nka na binobino: “Dingi efuku bintu byooso bi pa nsenga abikabutuka.” Uno mwanda ubaadi auntakula bwa kubuuka bufuku na kubanga kunangusheena bwa mafuku aafiki. Naadi nele binangu’shi: ‘Kwi ungi mwanda wi na muulo wa kukita mu muwa wande. Naadi neyipusha’shi bwakinyi ne na muuwa?’ Ntshinaadi nakumina kufwa nya!

Naadi na kisukusuku kya kuuka myanda ya mmufito. Naadi natompo kwisamba na bafwe, kwenda ku mashaama na beena kalasa nami, na tubaadi atubandila nabo ma filme aakwatshisha moo. Tubaadi atwele binangu’shi ayitusankisha na kwitutshinyisha.

Nabangile kwikala na kapeesha panalombeeshe bipwa ekumi. Nabangile kutoma nfwanka, na munda mwa mafuku apeela nafikile nka bu mpika a nfwanka. Kunyima kwa mafuku nabangile kutoma kabangi. Panalombeeshe bipwa ekumi na kimune, naadi mupwe kwikala ntomi a maalwa. Sunga binaadi ntaneapusha buuwa mukanwa, naadi neakumiina mwanda aankwata. Naadi mufule dingi kuteemesha ngono na kusha. Naadi nende mu ma mbalo abatomaa maalwa na mu ma mbalo amushalaa ba ndumba bufuku efuku dyooso dyankumiina. Naadi natuuku mu nshibo mu bufyefye bufuku na kwaluka mu bufyefye pa kutooka. Bu binaadi nafiki mukookye, butookye naadi nasuuku ku kalasa misusa ibungi. Efuku dinaadi natwele mu kalasa, naadi natomo maalwa nsaa yabalongyesha.

Naadi napanga na mpwee ipeela ngofu ku mpwilo kwa kipwa. Bu bibaadi mama tauku bwakinyi naadi na kano kapeesha, baadi enyongola na kufiita munda ngofu. Tubaadi atwikakeena, akupu nasuukile nakatuka kwetu. Munda mwa mafuku, naadi mushale na nsongwalume baadi ekupi dyande. Eshina dyaye mbu Tony, baadi mu kisaka kya ba Rasta (Rastafarian). Tony baadi mu kisaka kya bantu abakitshi bibeshi na abaudisha bintu abikolwanaa. Na bantu bebungi abaadi abamuuku’shi ntomboshi. Napetele eyimi munda mwa mafuku apeela, na panalombeeshe bipwa 16, natandjile mwana mulume.

MUSHINDO UBAADI BIBLE MWALUULE NSHALELO ANDE

Nafumankeene na ba Temwe ba Yehowa panaadi mushaale ku nshibo ya bakashi be bukupi na bana baabo. Bakata ba kibundji nyi babaadi bampe mbalo ya kushaala mu ino nshibo. Bana bakashi babidi ba Temwe ba Yehowa abaadi na kyubishi kya kufika mu kutala bangi ba nsongwakashi abaadi na bana baabo. Dingi efuku natwelele mu mwisambo wabo. Naadi na lukalo lwa kuleesha’shi ba Temwe bebubi. Anka, abaadi baluule nkonko yande yooso mu butaale ku bukwashi bwa Bible. Abaadi na kalolo mpa na kupopeela, ino ngikashi ngi ibaadi inkakye kwabadi. Nyi bwakinyi nakuminyine kulonga nabo Bible.

Mu mafuku apeela, nalongyele myanda mu Bible ibaadi ishintuule nshalelo ande. Kubanga ku bukinga bwande, naadi natshinyi kufwa. Anka binobino ne mufikye mu kushingula malongyesha a Yesu pabitale lusangukilo! (Yowano 5:28, 29) Na dingi, nalongyele’shi Efile Mukulu etatshishaa pa mwanda wande. (1 Mpyeele 5:7) Mayi e mu mukanda wa Yeelemiya 29:11 abaadi ankume kwishimba ngofu. Uno verse amba’shi: ‘Ami nabeene naawuku mpango yandi mwinwelele-ngi abyaakula Yehowa; nyi mpango ya mwabi ishii ya malwa: anukapete buuwa mu mafuku aakafiki na lukulupilo.’ Nabangile kukumiina’shi ne mulombeene kwikala na lukulupilo lwa muwa wa ikalaika pa nsenga yaluulwe Mpaladiiso.​—Misambo 37:29.

Ba Temwe ba Yehowa abaadi bandeshe kifulo kya binyibinyi. Panatwelele mu bisangilo byabo musango wa kumpala, bantu booso abaadi bankuukile na kibobo na kalolo kooso! (Yowano 13:34, 35) Bino binaadi mumone ku Nshibo ya Bufumu bibaadi bilekeene ngofu na binaadi namono ku kipwilo kinaadi natwele. Ba Temwe ba Yehowa abaadi bankuukile sunga mbinaadi mu uno nshaleelo. Abaadi abashaala nami kipindji kibula, abampasukila, mpa na kunkwasha na bintu misango ibungi. Naadi napusha bu’mi batwele mu kifuko kikata mwabadi banfule.

Mu kulonga kwande kwa Bible, nafikile mu kushinguula’shi abitungu nshintuule myanda ibungi mu nshalelo ande bwandya kwikala mwipusheene na miiya ilulame y’Efile Mukulu. Kuleka kutoma nfwanka takubaadi mwanda ubofule nya. Nafikile mu kuuka dingi’shi ingi misambo inaadi nateemesha ibaadi ayintakula mu kutoma kabangi, nyi bakinyi nalekyele kwiyiteemesha. Bwa kupela kukwatshika maalwa, nayimikile kwenda mu ma mbalo abatomo maalwa, na mu ma mbalo amwendaa ba ndumba bufuku. Mwanda ano ma mbalo abaadi aantakula mu kutoma. Akupu nakimbile bangi baloole abaadi na bukitshishi bwibuwa kwandi na kunkwasha mu nshaleelo ande mupya.​—Nkindji 13:20.

Mu aa mafuku amune, Tony babangile kulonga Bible na ba Temwe ba Yehowa. Bu bibaadi ba Temwe bamwaluule nkonko yaye yooso ku bukwashi bwa Bible, n’aye namu baadi mushinkamishe’shi myanda yalongo ngya binyibinyi. Baadi mushintuule myanda ibungi mu nshalelo aye. Baadi mulekye ba kuuku baye ba ntomboshi, akatuka mu kisaka kya ba Rasta, na kuleka kutoma nfwanka. Bwa kukyeba kusangasha Yehowa mu myanda yooso, booso bwetu tubaadi bashintuule mwikeelo wa lusandji bwa kulekyela mwan’etu kileshesho kibuwa. Tubaadi beyibakisheene mu kipwa kya 1982.

Naadi nakimbi mu Kitenta kya Mulami na Réveillez-vous !a miisambo ya bantu abaadi bobeshe kushintuula myanda yankyebe kushintuula. Bileshesho byabo bibaadi binkankamikye ngofu! Bibaadi abimpa bukome bwa kutungunuka na kwitatshisha pamutwe pa kubofula. Naadi natekye Yehowa bwa’shi tandekyelanga. Ami na Tony tubaadi babatshishibwe bu ba Temwe ba Yehowa mu mweshi wa Musambo mu kipwa kya 1982.

MUSHINDO WABIDI BINKWASHE

Kwikala mu kipwano kibuwa na Yehowa Efile Mukulu nkupaashe muwa wande. Ami na Tony twi bamone dingi kipaso kitukwashe Yehowa mu kipungo kya nkalakashi. Twi balongye bya kukulupila mwi Efile Mukulu nsaa yatudi na nkalakashi, na atupusha’shi nsaa yooso kwete kwitukwasha mu kifuko kyetu.​—Misambo 55:22.

Naadi na muloo wa kukwasha bana beetu bwabadya kuuka Yehowa nka bu’mi. Binobino ne na muloo pa kumona baabo bana namu bakwete kukaamisha kiukilo ky’Efile Mukulu.

Ntambukaa dingi bufuku bwa kunangusheena pabitale mafuku aafiki sunga bwa lufu nya. Ami na Tony twi bepaane mu mudimo wa kwenda mu tukongye twa ba Temwe ba Yehowa twilekeeneleekene lubingo looso bwa kwibakankamika. Tukwete kufuba nabo mudimo wa kulambukisha bantu’shi su abekala na lukumiino mwi Yesu, n’abo namu abakapete muwa wa ikalaika.