Okumiina kushintuula mushindo oobe wa kulongyesha su?

1. Bu bi myanda ya pano pa nsenga ikwete kwenda na kushintuluka abitungu kulumbuula myanda kinyi?

¹ Mu mukanda wa 1 Beena-Kodinto 7:31, Bible apwandjikisha nsenga na mbalo yabakitshi teyatre; bantu na bantu abafiki kyabo kipindji akupu bangi namu abafiki. Bu bi myanda ya pano pa nsenga ikwete kwenda na kushintuluka, abitungu shi nsaa na nsaa twikale atushintuula mishindo ya kulongyesha, programe etu, na mushindo wa kwisamba na bantu. Okumiina kushintuula mushindo oobe wa kulongyesha su?

2. Bwakinyi abitungu kushintuula mushindo wetu wa kulongyesha bwa kutambuka pamune na ndumbulwilo a Yehowa?

² Mishindo ya kulongyesha: Kubanga kala kakongye ka beena kidishitu kakwete nka kushintuula myanda. Pabaadi Yesu mutume balongi baaye bwa mususa wa kumpala, bebalungwile shi tabatwalanga mpaaya a bya kudya sunga mfwalanga bw’eshinda. (Mat. 10:9, 10) Sunga mbyabya, mafuku apeela kunyima Yesu baadi mushintuule yaaya miiya yaaye pa mwanda wa mushikwa wa bantu kwi balongi baaye na bwa kutamisha mudimo wa kulungula mukandu wi buwa mu bingi bipindji bya nsenga. (Luk. 22:36) Mu bipwa nkama bikile, ndumbulwilo a Yehowa mmufube na mishindo ibungi ya kulungula mukandu wi buwa—kupa bantu tukanda, kulambukisha ku bisaashi, na miotoka i na bikolo—muyile lukalo lubaadi kwanka aa mafuku. Mu ma mbalo ebungi lelo uno, tatukwete kusangana bantu ku mashibo abo nya, binobino, kukaasha mudimo wa ku nshibo na nshibo, mudimo wa bulungudi ubakamba kunemeena mu kulungula mukandu wibuwa pa mbalo i bantu bebungi, na kulungula mukandu wi buwa mu mpukapuka apamweka nsaa. Twi balombeene dingi kwenda mu kulungula mukandu wi buwa ku nshibo na nshibo ku kyolwa su bantu be ku mifubo mu kanya. Bu bi etempu dya mwiyilu dya Yehowa dikwete kushintuula mbalo yadyende, tukwete kwitatshisha bwa kutambuka pamune na ndumbulwilo aaye su?—Ez. 1:20, 21.

3. Kushintuula kwa myanda ya kwisamba na bantu nkulombeene kwitukwasha bwa kufuba kalolo mu teritware eetu naminyi?

³ Myanda ya kwisambila: Mmyanda kinyi ikwete kukalakasha bantu ba mu teritware eenu ano mafuku? Mmyanda ya makuta? Ngya nshalelo a mu kifuko? Su ngya ngoshi? Bibuwa kwiuka myanda yooso ikwete kukalakasha bantu na myanda ikitshikye mu teritware etu, bwa kwilumbuula kalolo pabitale myanda ya kwisamba. (1 Kod. 9:20-23) Nsaa i bantu batwisamba nabo abatuusha bi mu mashimba aabo, pamutwe pa kutuusha lwalulo lwatukimbi na kutungunuka na myanda yatudi balumbuule, bibuwa kushintuula mwisambo bwa kwisambila myanda ayibakalakasha.

4. Bwakinyi abitungu shi tukite bukidi bwa kushintuula mushindo wetu wa kulongyesha?

⁴ Kubashaala mafuku apela bwashi “bya pano pa nsenga” bifikye ku nfudiilo, na mpombo ikata ibangye. “Nguba baashaala peela.” (1 Kod. 7:29) Byabya, abitungu tushintuule mushindo wetu wa kulongyesha kushii kunyengakana, bwashi tobeshe kukita mudimo ukata autungu kukita mu ino nsaa ipeela ibashaala!