Tulongamishe mudimo wetu wa bulungudi—Kufunda myanda itale yawa muntu

“Dimuka p’abikutale obe nabeene na bulambukishi bwobe.” (1 Tim. 4:16) Dino elango dya Mpoolo mutumibwa kwi Timotee difundjibwe ku bukwashi bwa kikudi kiseleele adilesha shi, byatwikala balungudi bapya sunga abaapu kwisha, abitungu tukite bukopo bwa kwenda kumpala. Bwa kwitukwasha, kwi mwisambo upya aubanga kutuuka mu Mudimo Wetu wa Bufumu wi na mutwe wa mwanda awamba shi: “Tulongamishe mudimo wetu wa bulungudi.” Mwisambo ooso aukyebe kwisambila mwanda wi na muulo, kulesha kalolo na kutuusha angi mayele atudi balombeene kukimba mushindo wa kwiatamisha. Kubanga mu uno mweshi, mbetutekye atwe booso bwa kufuba kalolo na uno mwisambo. Kunfudiilo kwa mweshi, mu kipindji kya Kisangilo kya mudimo abakyebe nketupa kipindji kyatudi balombeene kulesha miloo yatudi bapete p’atwe kwipana ngofu mu kufuba na aa mayele. Uno mweshi mbetutekye bwa kufuba na mayele a kufunda myanda itale yawa muntu.

Muulo wi nawo kukita kwa byabya: Bwatudya kulombasha mufubo wetu kalolo, abitungu tufube ngofu mu mudimo wa bulungudi. Abitungu tubande kwalukiila mu kutala baaba abekalanga baleeshe lukalo na kwibalongyesha, kumyamina meena ku ntete ya bya binyibinyi yatwikalanga bakune. (Mat. 28:19, 20; 1 Kod. 3:6-9) Bino abitungu nkemonena na muntu dingi, nkwisamba naye myanda imutale, na kwisambila pabitale mwanda watwikeele besambe mususa ushaale. Byabya, nsaa yatusangana muntu baleesha lukalo, bibuwa kufunda myanda imutale kwisaki.

Mushindo wa kwibikita:

• Shinkamisha shi bintu byooso mbikumbane mu kibuta kyoobe bwa kufunda myanda itale yawa muntu balesha lukalo. Lama karnee koobe kalolo kushii butshiafu, na wekale ofundu myanda ipya yanwisamba. Funda yaaya myanda anka paapa pa nukyanupu kwisamba.

• Funda myanda itale sha-nshibo. Eshina dyaaye na nimero ya lupango, ya telefone, sunga adrese yaaye ya ku Internet. Mwanda kinyi ubomono umutale na ulombeene kwikala na muulo mu kifuko kyaye?

• Funda kantu kooso kabanwisamba. Maverse abanubadika. Amba naminyi pabitale nkumiino yaaye? Mukanda kinyi okumiina kumulekyela? Funda nsaa, efuku, na efuku dya mweshi aditungu shi walukiile mu kumutala.

• Funda kyokyebe kukita mususa aufiki. Bomulungula shi anukyebe kutaluula kinyi? Okyebe nkaluka efuku kinyi?

• Efuku dyooso dy’waluka mu nkamutala funda ingi myanda ipya. Ta kwikadika mwanda sunga ngumune su ofunda myanda yoodi nayo lukalo.

Ebitompeyi munda mwa wawa mweshi:

• Nsaa yofundu myanda ya bantu bobwesamba nabo, lungula yawa ooso okwete kufuba naye mu mudimo wa bulungudi shi okwete kufunda.