“Kwibunga kwa mwilo”
1. Kikongeno kya distrike na kya maumbo ebungu nkipusheene naminyi na kwibunga kwa beena Isaleele kubaadi kukitshikye mafuku apeela kunyima kwabo kutuuka mu Ejiipitu?
1 Mafuku apeela kunyima kwabo kutuuka mu Ejiipitu, Yehowa baadi mulungule Moyiise bwa ‘kubunga mwilo’ ku Mwengye wa Sinayi bwa kuteemesha mayi Aaye bwa kumona bya Kumuntshiina na kulongyesha baana babo mu mashinda Aaye. (Miy. 4:10-13) Kibaadi kipungo kikata kya kutentekyesha na kya kunyingisha lukumiino lwabo! Mu myeshi ipeela muno, mwilo wa Yehowa aukyebe kwibunga pamune mu bikongeno bya distrike na bya maumbo ebungi bwa badya kulongyeshibwa na Yehowa. Nkinyi kyatudi balombeene kukita bwatudya kupetekyelwa mu programe ooso?
2. Nkinyi akitungu shi tubande kukita bwa ‘kwilumbûla’ pabitale kikongeno kyetu?
2 ‘Elumbûle’: Yehowa baadi mutekye beena Isaleele bwabadya “kwilumbûla” bwa kwibunga kwa ku Mwengye wa Sinaayi kwabashaala abatentekyesha. (Efi. 19:10, 11, EEM) Nyi bwakinyi kwilumbuula kalolo kwi na muulo kwi bano booso abakyebe kupetekyelwa mu bino bikongeno, ta nka penda bano abakyebe kukita mifubo kampanda nya. Bu kileshesho, bantu bebungi mbalombeene kwikala na lukalo lwa kwilumubuula bwa kwata nsaa yakubanda kutshiba mufubo wabo wa maasa. Pangi nshalelo oobe e mumune na a Neemi. Baadi akumiina kuleka mufubo waye wa bu mwedi mukata a malofu kwa Nfumu Artakesese bwashi ende akakwashe mu kwibakuula kwa bimano bya Yeelusaleeme, kadi baadi auku shi nfumu akyebe kupela. Neemi nkwela luteko na nka paapa, n’eshimba kunyinga aye nkwenda mu kuteka. Nfumu nkumulekyeela bwa kwenda na nkumupa bukwashi butale mudimo wa kwibakuula! (Ne. 2:1-9) Kukaasha kuteka kwa mukata oobe a mudimo, we mupwe kulombasha byooso abitungu pabitale lwendo na mbalo yodyaa nkashaala? Bakulu abekala na muloo wa kukwasha ooso e na lukalo lwa bukwashi bwa myanda i byabya. Ata kitshibilo kya kufika kumpala kwa nsaa efuku dyooso, na wate kitshibilo kya ‘kunyisha kulamata’ ku byabya byokyebe kuteemesha.—Eb. 2:1.
3. Nkinyi akikyebe kwitukwasha bwa kulumbuula mashimba eetu pabitale programe?
3 Ungi mwanda wi na muulo wa kwilumbuula kwetu nyi kulumbuula eshimba dyetu bwa kuteemesha myanda yatulongo. (Esd. 7:10) Abakyebe kwela programe a kikongeno ku internet mu jw.org na akyebe kuleesha mitwe ya myanda ya miisambo yooso pamune na verse umune sunga ibidi yabadi baatshile wawa mutwe wa mwanda wa mwisambo ooso. Ino miisambo ayitupa myanda ibuwa ya kutaluula mu Lulangwilo lwetu lwa mu Kifuko mu mbingo i peepi na mafuku a kikongeno kyetu kyabadi betwitamine. Bangi balungudi ba mukandu wibuwa abemprimee winyi programe na abafubu naye bwa kufunda tu myanda atwibasangasha mu kikongeno.
4. Mushindo kinyi ulombeene baledi kufuba na kikongeno bwa kulongyesha baana baabo?
4 ‘Lambukisha baana boobe’: Imune ya ku mpàngo ibabadi babungile mwilo ku Mwengye wa Sinaayi ibaadi bwashi baledi beena Isaleele ‘balambukishe baana baabo.’ (Miy. 4:10) Kikongeno akipa baledi mushindo wibuwa wa kulambukisha baana baabo. Abintu baledi bashaale na baana baabo nsaa ayitambuka programe na kwibakwasha bwabadya kuteemesha kalolo. Kunfudiilo kw’efuku dyooso, na kunyima kwa lulangwilo lwabo lwa mu kifuko, bifuko mbilombeene kwisamba pamume pabitale myanda ibabapusha mu kikongeno.
5. Mushindo kinyi watukapete bukwashi su twakatwela mu kikongeno ki kumpala?
5 Kipungo kya kikongeno ku Mwengye wa Sinayi kibaadi akikwasha beena Isaleele bwa badya kusangeela kinemo kyabo kya kwikala mwilo w’Efile Mukulu. (Miy. 4:7, 8) Kikongeno kyetu akifiki ki kwanka bwa kwitukwasha mu mushindo umune. Munda mwa mafuku asatu atukyebe kwikala na mushindo wa kutuuka mu kabaaka ka mu ndumbulwilo a Satana na kusangeela butaale bwa mu kikudi na bakwetu abetunyingisha mu mpaladiiso eetu a mu kikudi. (Yesh. 35:7-9) Bu bi efuku dya Yehowa dikwete kwisesela, tatukumanga kwilwankana uno mushindo aukitshika bwa tudya kwibunga pamune bwa kwiyingisheena ku muntu na muntu!—Eb. 10:24, 25.