Lwitamino lwa pabwalo
1. Kwitamina kwa bantu ku bikongeno bya 2014 akubanga mafuku kinyi?
1 Su okwete kulumbuula kyakudya ki pabwakyo bwa bakuuku bobe sunga beena kifuko, bwa kwibikita abikutungu makuta ebungi na kwitatshisha ngofu bwa kwibiteeka, abitungu wekale na katshintshi ke byabya nsaa ywabila bantu masaki a lwitamino. Mu mushindo umune, kwi midimo ibungi ibatubanga kukita bwa kulumbuula bidiibwa bya mu kikudi abitungu nkatuusha mu kikongeno kya distrike na kya maumbo ebungi kya 2014. Mbingo isatu kumpala kwa kikongeno, atwikala na bushito bwa kwitamina bantu booso bwabadya kupetekyelwa mwanka. Nkinyi kilombeene kwitukwasha bwatudya kwabila masaki a lwitamino na katshintshi?
2. Nkinyi akitutakula bwa kufuba ngofu mu kwabila kwa masaki a lwitamino?
2 Twi balombeene kufuba ngofu mu mudimo wa kwabila kwa masaki a lwitamino su atubanda kunangusheena pa wawa mwanda, mushindo watupete bukwashi abutuukila ku kidibwa kya mu kikudi akitupa Yehowa ku bikongeno. (Yesh. 65:13, 14) Abitungu tushinguule dingi shi kampanye keetu ka ku kipwa kyooso akatushaa bipeta bibuwa. Bangi bantu batwitamina abafiki mu kupetekyelwa netu. Pabitale bungi bwa bantu abafiki mu kupetekyelwa, abimweka shi, mufubo wi bukopo watukwete kukita mu kampanye autumbisha Yehowa na kuleesha kalolo kaaye.—Mis. 145:3, 7; Bif. 22:17.
3. Mushindo kinyi autungu kwabila masaki a lwitamino?
3 Kasaka kooso ka bakulu akakyebe kuleesha mushindo aukyebe kakongye kaabo kwabila masaki a lwitamino, na pa bitale mushindo wa kuleka ku mashibo a bantu bashii kwanka sunga nsaa yabakwete kulungula mukandu wibuwa mu ma mbalo e bantu bebungi e mu teritware eenu. Su kwi mushindo, nwibalombeene kwabila bantu ma jurnale pamune na masaki a lwitamino mu dya Mposo na mu dya Lubingo dyooso. Su dya Mposo dya kumpala dya mweshi dibatwele munkatshi mwa mafuku a kampanye, abitungu kubanda kwipaana mu kwabila kwa masaki a lwitamino pamutwe pa kubanga kulonga na bantu Bible. Kunyima kwa kampanye, atwikala na muloo wi kashaa wa kuuka shi atwikalanga bafube na muloo ooso na shi atwikalanga betanyine bantu bebungi bwabadya kufika su kwi mushindo twibungye pamune ku kidibwa kya mu kikudi kyabadi betupe kwi Yehowa!