Kisangilo kya mudimo wa bulungudi akilombasha mpàngo yakyo

1. Bisangilo bya mudimo wa bulungudi bii na mpàngo kinyi?

¹ Ungi musuusa, Yesu baadi mwibungye na balondji 70 kumpala kwa kwibatuma mu kulambukisha. (Luk. 10:1-11) Aye nkwibanyingisha p’aaye kwibalungula shi ta be bupenka nya, na shi abaadi abakunkushibwa na “Nfumu a biumbulwanga,” Yehowa. Baadi mwibape dingi miiya ya kulonda ibaadi ibakwashe bwa kukita mufubo, na kwibalonga “babidi-babidi.” Lelo uno, bisangilo by’atukitaa kumpala kwa kwenda mu bulungudi abikalaa nka na yaaya mpàngo i mumune​—ya kwitunyingisha, kwitukwasha na bii na mudimo, na kwitulonga mu mulongo.

2. Kisangilo kya mudimo wa bulungudi akibanga kukitshika mu minite inga?

² Binobino, kisangilo kya mudimo wa bulungudi tukwete kwikikita mu minite 10 na ku 15, mpa na kwabila kwa bantu, kwibapa ma teritware, na kwela kwa luteko byooso bikwete kukitshika nka mu yaaya minite. Binobino bibashintuluka. Kubanga mu mweshi wa Kananka, kisangilo kya mudimo wa bulungudi akibanga kukitshika mu minite itano na ku musambo. Byabya, su kwi kangi kakongye akakyebe kukita bisangilo, abitungu kupeelesha dingi minite, bu byabidi shi baaba abemutwele mbapwe kwikala na miisambo i buwa ya mu Bifundwe. Kukita kwa kisangilo kya mudimo wa bulungudi kiipi akukyebe kukwasha bantu booso bwa kukisha nsaa ibungi mu bulungudi. Na dingi, su ba mbaala-mashinda sunga bangi balungudi mbapwe kubanga kulungula kumpala kwa kufika ku kisangilo kya mudimo, kutshibisha kwa penda kapindji kapeela kwi na muulo.

3. Mushindo kinyi autungu kulumbuula bisangilo bya mudimo bwashi bikwashe balungudi?

³ Abitungu kulumbuula bisangilo bya mudimo wa bulungudi mu mushindo wa shi bikwashe balungudi. Mu tukongye twi bungi mbamone shi bi buwa kasaka kooso ka mudimo kebungye pabwako pamutwe pashi tusaka tooso twibungye mbalo imune. Bino mbilombeene kwikala bibofule bwashi balungudi bafikye mu kisangilo kya mudimo na kwenda pangi mpa na mu teritware. Balungudi mbalombeene kwilumbula bukidibukidi, na mbilombeene kukwasha mukunkushi a kasaka ka mudimo wa bulungudi bwadya kwibatabaleela. Kasaka ka bakulu nkalombeene kutalula myanda muyiile mbalo yabadi na kusangula kyakukita. Kumpala kwa kufudisha kisangilo na luteko lwipi, abitungu muntu ooso aukye eende naye na mbalo y’abakafubila.

4. Bwakinyi ta twibalombeene kumona bisangilo bya mudimo wa bulungudi bu bishadile ku bingi bisangilo bya kakongye?

⁴ Ta nkishadile ku bingi bisangilo bya kakongye nya: Bu byabidi shi bisangilo bya mudimo wa bulungudi abikitshikaa bwa kukwasha baaba abende mu bulungudi, kakongye kashima ta nkalombeene kwimutwela nya. Byabya, bino t’abileesha shi mbilombeene kwikala na muulo upeela sunga bu byabadi bakile kwi bingi bisangilo bya kakongye nya. Anka bi bingi bisangilo byooso, bisangilo bya mudimo nyi mbidibwa abifiki kwi Yehowa abitukwasha bwa kwinyingisheena ku muntu na muntu mu kifulo na mu midimo ibuwa. (Eb. 10:24, 25) Nyi bwakinyi, abitungu mukunkushi elumbuule kalolo mu mushindo washi mwisambo utumbishe Yehowa na kukwasha baaba abapetekyelwa. Su kwi mushindo wa kwibikita, abitungu balungudi abende mu bulungudi betatshishe mwabo mooso bwa kwimutwela.

5. (a) Mudimo kinyi wi nawo mukunkushi a mudimo wa bulungudi mu kukita kwa programe a kisangilo kya mudimo wa bulungudi? (b) Mushindo kinyi ulombeene mukwetu mukashi akunkusha kisangilo kya mudimo wa bulungudi?

⁵ Kwilumbuula kwa mukunkushi a kisangilo: Bwashi muntu elumbuule kalolo ku mwisambo w’akyebe nkakita mu bisangilo bya kakongye, abintungu bamupe wanka kumpala. Nwi balombeene kukita nka byabya na bisangilo bya mudimo wa bulungudi. Byabya, nsaa i tusaka twa mudimo wa bulungudi atwibungu palaa-pala, bakunkushi sunga baaba abebakwashaa abakunkusha bisangilo bya tusaka twabo. Su kakongye akakyebe kukitshiina kisangilo kya mudimo pamune, mukunkushi a mudimo wa bulungudi apa muntu umune bwa kukunkusha. Bangi bakunkushi ba mudimo wa bulungudi abapeyaa bakunkushi booso programe na kumulamika dingi kwibaya dya nguukisho. Mukunkushi a kisangilo kya mudimo wa bulungudi mmulombeene kwikala na ngyelo a binangu e buwa nsaa y’aapa bangi bwa kukunkusha, ekale mulamiine shi kulongama kwa byabya bisangilo akutuukila ku mushindo wa kulongyesha na kulumbuula biubishi bya baaba abakunkusha. Su ta kwi mukulu sunga ngumune, ta kwi mufubi na midimo, sunga ungi mukwetu mulume mubatshishibwe abadi balombeene kupa bwabwa bushito bwa kukunkusha aa mafuku, mukunkushi a mudimo wa bulungudi mmulombeene kupa mukwetu mukashi mubatshishibwe e na mushindo wa kukunkusha bwadya kukunkusha kyakya kisangilo.​—Tala mbalo yabadi bafunnde shi: “Nsaa ayitungu shi mukwetu mukashi akunkushe.”

6. Bwakinyi bii na muulo bwashi yawa abadi bape mudimo wa kukunkusha kisangilo kya mudimo wa bulungudi elumbuule kalolo?

⁶ Nsaa y’atupete mwisambo wa kukita mu Kalasa ka mudimo wa teokrasi, sunga mu Kisangilo kya mudimo, atwiwataa na muulo na kwiulumbuula kalolo. Bangi bakwatu mbalombeene kutengyela nsaa itabende ku kisangilo, ndjo babangye kunangusheena kyabakyebe nkakula. Kukunkusha kwa kisangilo kya mudimo wa bulungudi abitungu kwikumona nka wawa mushindo umune. Binobino, bu by’abakyebe kupeelesha nsaa ya kisangilo kya mudimo wa bulungudi, kwilumbuula kwi buwa kwi na muulo ukata bwashi kisangilo kikwashe bantu na kifudiile pa nsaa. Kwilumbuula kwi buwa dingi nkutale kupeta kwa ma teritware kumpala.

7. Myanda kinyi ayitungu shi mukunkushi a mudimo ataluule?

⁷ Myanda ya kwisamba: Bu byabidi shi myanda ngilekeene muyiile ma teritware, mpika a kishima ta muleeshe abitungu kukita bwa kisangilo kyooso kya mudimo wa bulungudi nya. Esambile ingi myanda i mu kashibo akamba shi: “Nsaa ya Kisangilo kya mudimo wa bulungudi, abintungu obande kutaluula.” Misusa ibungi, kisangilo akikitshikaa bu mwisambo na bantu. Ingi nsaa, nwi balombeene kukita dingi kileshesho kyabadi belumbuule kalolo sunga ungi video a mu jw.org akwila myanda ya bulungudi. Nsaa y’elumbuula bwa kisangilo kya mudimo wa bulungudi, abitungu mukunkushi anangusheene pa bitale myanda ikumbeene kunyingisha na ayikwasha baaba abende mu bulungudi dyadya efuku.

8. Myanda y’atwisambila mu bisangilo bya mudimo wa bulungudi mu ma dya Mpooso na mu ma dya Lubingo ngilombeene kwitukwasha naminyi?

⁸ Bu kileshesho, mu ma dya Mpooso, balungudi bebungi abaleshaa bantu Kitenta kya Mulami na Réveillez-vous! Bebungi abendaa mbulungudi mu ma dya Mpooso t’abatuukaa munkatshi mwa lubingo nya, byabya mbalombeene kwikala na lukalakasho lwa kutentekyesha mayele a kubanga mwisambo na bantu abamwene mu Lulangwilo lwabo lwa mu kifuko. Nyi bwakinyi, bibuwa mukunkushi ambuule dingi mushindo umune wa kuleesha bantu ma jurnale wabadi baleeshe kunyima kwa Mudimo wetu wa Bufumu. Angi mayele ngatale kwisambila mushindo wa kutwesha kintu sunga mwanda upya aukyebe kukitshika mu mbalo y’anudi, sunga efuku dya feete kampanda mu nsaa y’atuleesha muntu jurnale. Sunga kwisambila mushindo wakwisamba na muntu batwesha ungi mwisambo, mwanda, sunga feete mupya, na mushindo wa kuleka lukonko kampanda bwa kwalukiila su yawa muntu bakumiina ma jurnale eetu. Su bangi bantu be mu kisangilo kya mudimo wa bulungudi tabapwile kufuba na ma jurnale aatungu kuleesha bantu, mukunkushi mmulombeene kwibateka bwabadya kwilesheena aa mayele eepi sunga kulonda myanda yabadi bafumankane nayo ayinyingisha. Mu ma dya Lubingo, mukunkushi a kisangilo mmulombeene kusangula bwa kikita angi mayele e byabya atale mushindo wa kuleesha bantu mikanda mu wawa mweshi. Mikanda ya kulonga bu broshire a Mukandu wibuwa, Pushisha Efile na mukanda wa Akilongyesha Bible nwi balombeene kwiyileesha bantu efuku dyooso, byabya mukunkushi mmulombeene kutaluula mu kikoso mushindo wa kutuusha umune wa ku yaaya mikanda.

9. Nkinyi akitungu kwisambila mu mpooso mwanudi na kampanye ke pa bwako?

⁹ Su kakongye kakwete kukita kampanye ke pa bwako mu mpooso, mukunkushi a mudimo mulombeene kutaluula mushindo wa kwabila bantu ma jurnale a wawa mweshi n’esaki dya lwitanyino sunga trakte, sunga shi mulombeene kutalula kya kukita su muntu baleesha lukalo. Ungi mushindo wa kukita ngulombeene kwikala wa kwilesheena myanda yabadi bafumankane nayo ayileesha muulo wi nao kaaka kampanye.

10, 11. Bwakinyi kwilumbuula kwa balungudi kwi na muulo bwashi kisangilo kya mudimo kikitshikye kalolo?

¹⁰ Kwilumbuula kwa balungudi ba mukandu wibuwa: Balungudi mbalombeene kukwasha namu bwashi kisangilo kya mudimo kikidikye kalolo. P’abo kwilumbuula kumpala bwa kwenda mu bulungudi, pangi mu lulangwilo lwabo mu kifuko, mbalombeene kwikala na mwanda wa kwikwasheena na bangi balungudi. Kwilumbuula kwi buwa nkutale dingi kupeta ma jurnale na ingi mikanda kumpala kwa kufika ku kisangilo kya mudimo wa bulungudi, byabya bantu booso mbalombeene kwenda mu teritware kushii kunyengakana.

¹¹ Bii na muulo dingi bwa kwata mpàngo ya kufika ku kisangilo kya mudimo wa bulungudi minite ipeela kumpala kwa kubanga. Na dingi, atwitatshisha bwa kufika pa nsaa mu bisangilo byetu byooso. Byabya, mbilombeene kukalakasha su tukwete kufika mu kisangilo kya mudimo wa bulungudi kunyima kwa nsaa. Mu mushindo kinyi? Mukwetu kwete kukunkusha e na myanda y’atala kumpala kwa kwabila bantu. Su balungudi mbapeela, mmulombeene kusangula bwa kutuma muntu ooso mu teritware abashii bafube ngofu. Su bangi kwabende ku kisangilo kya mudimo na ku teritware aabo pe bula, mbalombeene kwibabila na bano be na myotoka. Su mu teritware mwi etombo dikilekile, mbalombeene kupa bakwetu balume bwa kufuba na bakwetu bakashi, sunga kwikala nabo peepi. Balungudi balemane mbalombeene kwibateka bwa kulambukisha mu museese ushii bipoko na myengye sunga mashibo ashii na bitenta. Balungudi bapya mbalombeene kwibapa baaba abauku kufuba kalolo. Kadi, su mulungudi bafiki kunyima kwa nsaa, ababanga kupanguula dingi sunga kukimba bya kupetela yawa bafiki kumongo aye muntu akufuba naye kalolo. Kadi, dingi efuku nkulombeene kwikala mwanda awitufwisha kunyima kwa nsaa. Byabya, su atufikaa kumongo nka musango ooso, twi balombeene kwiyipusha su t’atwataa bisangilo bya mudimo wa bulungudi na muloo, sunga shi mpa mwanda washi t’atulumbuulaa bintu byetu kumpala kwa nsaa.

12. Su okumiina kwipusheena na bantu kumpala bwa kwenda nabo mu bulungudi, abitungu otaluule myanda kinyi?

¹² Balungudi abafiki mu kisangilo kya mudimo mbalombeene kwipusheena kumpala kwa kubanga kisangilo, sunga shi be na muntu abadi bapwe kwibapa. Su okumiinaa kwipusheena na bantu kumpala, we mulombeene namu “kwiukeena na bangi” nsaa y’ofubu na balungudi ba mukandu wibuwa belekeenelekeene kushii kufuba nsaa yooso nka penda na bakuuku sunga baloole boobe. (2 Kod. 6:11-13) Ingi misusa, we mulombeene kwipusheena na mulungudi kii mupya bwa kumukwasha bwashi atamishe mushindo waye wa kulogyesha su? (1 Kod. 10:24; 1 Tim. 4:13, 15) Teemesha elango dyooso dyabakupa, mpa na mbalo y’abakulungula bwa kubanga kulambukisha. Ku nfudiilo kwa kisangilo, tokumanga kushintula mbalo ibabenupa bwa kufuba sunga muntu atunganga shi ofube naye na abitungu nwende mu teritware bukidibukidi.

13. Su balungudi booso abauku shi bisangilo bya mudimo wa bulungudi bi kwanka na abebikwatshisheena, mbilombeene kwitukwasha mushindo kinyi?

¹³ Kunyima kwa kulambukisha, balondji 70 bababatumine kwi Yesu mu bulungudi “babalukiile na muloo.” (Luk. 10:17) Kushii mpaka, kisangilo kya Yesu kibakitshine nabo kumpala kwa kwenda mu bulungudi, kibaadi kibakwashe bwa koobesha. Lelo uno, bisangilo bya mudimo wa bulungudi mbilombeene kwikala na bukwashi bwi mumune. Su balungudi booso abauku shi byabya bisangilo bi kwanka na abebikwatshisheena, abitukwasha, kwitunyingisha, na kutuula myanda mu mulongo bwatudya kukumbasha mudimo wetu witupebwe bwa “kuleesha bu kamonyi kwi maumbo ooso.”​—Mat. 24:14, Kilombeno kipya 2009.