Londa kileshesho kya balungudi abauku mudimo kalolo

Atunemekaa bikile balungudi abauku mudimo kalolo batudi nabo mu kakongye. Bangi takudi bipwa bi bungi bakwete nka kufubila Yehowa na bululame booso. Bangi namu pangi abauku bya kukita mudimo wa bulungudi kalolo nka mu mafuku apeela abashaala’mu. Baaba balungudi mbamone mushindo wi Yesu kwete kukunkusha kakongye ka beena Kidishitu mu ano mafuku a nfudiilo p’abo kutamisha mudimo wabo wa bulungudi na kufwisha bantu bu balongi. (Mat. 28:19, 20) P’abo kwipaana mu uno mudimo, mbapete “bukome bushii bwa kupwandjikisha nabo kintu” nsaa y’abafumankana na myanda na nkalakasho. (2 Kod. 4:7) Kwi myanda i bungi ya kulongyela kwi baaba balungudi abauku mudimo kalolo. Pakudi mushindo, abasangalaa nsaa y’abalongyesha bangi myanda ibabadi balongye. (Mis. 71:18) Nyi bwakinyi, abitungu twate nsaa ya kulongyela kwabadi. Mushindo kinyi watudi balombeene kwibikita?

Mu bulungudi: Bwa kwikala mulungudi auku kulambukisha kalolo, abitungu kukwasha balungudi bapya sunga baaba bashambandjile kuuka bya kufuba kalolo. Muntu mmulombeene kulonga ngofu nsaa yakwete kutala balungudi abalambukishaa kalolo mushindo wabakwete kukita mudimo wabo. (Tala Kitenta kya Mulami kya 1/2/2015, kii na mutwe wa mwanda awamba shi: “Lama katshintshi koobe bwa mudimo wa bulungudi”, mu kikoso kya katano ki muushi mwa kamutwe ka mwanda akamba shi: “Kwasha balungudi bapya.”) Mushindo kinyi ukukwashe bangi mu mudimo wa bulungudi?

We mulombeene kuteka balungudi abauku mudimo kalolo bwashi nulambukishe pamune su? Su yawa mulungudi mmulemane, ingi misusa we mulombeene kwenda na mulongi oobe a Bible bwashi nukalongyele kwaye. Kunyima kwa kulonga, ipusha yawa mulungudi bibamono na mayele oodi mulombeene kutumikila.

Ata namu nsaa ya kushaala nabo: Eukeene na balungudi abauku mudimo kalolo p’okisha nabo nsaa ibungi. Itamina umune a kwabadi mu lulangwilo lobe lwa mu kifuko na omwele nkonko. Su yawa mulungudi mmulemane, we kwata mpàngo ya nkakitshina lulangwilo lwenu lwa mu kifuko kwaye su? Shinguula bibaadi mulongye bya binyibinyi. Miloo kinyi yadi mupete? Mmyanda kinyi ya mu ndumbulwilo yaadi mumone ayende kumpala? Miloo kinyi yaadi mupete p’aaye kufubila Yehowa?

Abitungu kwikala na mpushisho e buwa mpa na nkatshinkatshi p’abitale bukwashi bwatudya kupetela kwabadi. Anka bu ooso a kwatudi, bano balungudi be na byabuntu bilekeenelekeene mu bulungudi. (Lom. 12:6-8) Bangi mbapwe kukula ngofu, na bino mbilombeene kwibakutshisha kukisha nsaa ibungi netu. Sunga mbyabya, twi na bya kulongyela myanda ibungi kwabadi p’abo kufubila Yehowa na lulamato looso.