Mikanda yatudi bafubishe mu Programe a bisangilo bya Bwina Kidishitu na mudimo wetu
LUBINGO LWA 5-11/8/2018
BUPETA BWA MWIYI DY’EFILE MUKULU | 2 TIMOTE 1-4
“Efile Mukulu ta mwitupe kikudi kya moo”
w09-F 15/5 15 ¶9
Ba nsongwa—Kwenda kwenu kwa kumpala kumwenekye
9 Bwa kukwasha Timote, Mpoolo badi mumutentekyeshe shi: ‘Efile Mukulu nta mwitupe kikudi kya moo, anka nyi kikudi kya bukome, kya kifulo na kya lwishinko.’ (2 Tim. 1:7) Kikudi “kya lwishinko” akilesha ngobesha ya kwela kinangu na kunangushena. Nkitale dingi kukita myanda muyile byayidi kushi kukita muyile byokumina. Bangi ba nsongwa bashi banyingye mu kikudi abekalaa na kikudi kya moo na kupima kulubisha binangu byabo bwa myanda ibubi mu kutala TV, kulaala tulo tukile bungi, kukolwa, kukita misangeelo ikile bungi sunga kwipaana mu kutambuka lusandji. Beena Kidishitu mbanyingishibwe bwa “kuleka bubi na lwabi lwa bintu bya pa nsenga, bwa’shi tushala mu kino kipungo na kwiyeesha, bululame na kishima kwi Efile.”—Tt 2:12.
w03-F 1/3 9 ¶7
‘Ikala mukankamane na munyingye!’
7 Mpoolo badi mufundjile Timote amba shi: “Efile Mukulu nta mwitupe kikudi kya moo, anka nyi kikudi kya bukome, . . . Byabya toikalanga na buufu bwa kushinkamiisha bantu mwanda wa Nfumwetu.” (2 Tim 1:7, 8; Mak 8:38) Muyile bino bishima, twi kwiyipusha shi: ‘Nekalaa na buufu bwa lukumiino lwande su nekalaa n’eshimba dinyingye? Ku mbalo ya mudimo (sunga ku kalaasa), bantu abangukaa bu Temwe a Yehowa su nebafwamishaa? Nekalaa na buufu bwa kwikala mwilekeene na bangi su nekalaa na nfyendi pabitale kipwano kyande na Yehowa?’ Su wekalaa na binangu bibubi pabitale kulungula mukandu wibuwa sunga kumweneka mwilekene na bangi, tentekyesha elango dibadi Yehowa mupe Yooshwa dya’shi: “Ikala mukankamane na onyingy’eshimba.” T’okumaa kuluba shi, nta mweneno a beena mudimo neetu sunga beena kalaasa neetu e na muulo nya, anka a Yehowa na a Yesu Kidishitu.—Nga 1:10.
Kukimbuula bwa kupeta mabwe a muulo a mu kikudi
Ikala okimbi bupeta bw’eyendo
13 Na Timote namu badi na lukumino. Kunyima kwa’ye kwitanyina Timote bu “musalayi ebuwa a Kidishitu Yesu,” Mpoolo bamulungwile’shi: “Muntu su ngumune patwele mu kilwilo, tatwelakanaa mu myanda [ya busunga NWT] i nayo bashii basalayi su akyebe kusankisha mumwate mu busalayi.” (2 Tim 2:3, 4) Lelo uno, balondji ba Yesu, mpa na bantu bakile pa mudiyo umune be mu mudimo wa nsaa yoso, bakwete kwikitshisha bwabadya kutumikila dino elango dya Mpoolo. Bakwete kulwa bwa kukambila myanda ya mu uno ndumbulwilo ayibatakula mu kwikala na lwabi. Abatumikila dino eyi dya kulonda: “Sha kishiyo nyi mpika a mumwiyapushe.” (Nki 22:7) Satana akumina’shi tukishe nsaa yetu yoso mu kufuba na kukimba makuta. Bangi bantu bakwete kwiyapula makuta ebungi bwabadya kwibaka mashibo, kuula myotoka, kulonga tulasa twi bungi, sunga bwa kwibakila. Su twakutwa kudimuka, twi balombene kwata dibasa aditwata bipwa bibungi bwatudya kwidifuta. Atulesha’shi twi na binangu nsaa yatwikala na nshalelo mupelepele, kusuuka mabasa, na kwikala atutuusha makuta apeela. Su tubakitshi byabya, atwikala na bulungantu bwa kufubila Efile Mukulu pamutwe pa kwikala ba mpika ba myanda ya makuta ya uno ndumbulwilo.—1 Tim. 6:10.
Bafubi ba Yehowa “mbafutaale bubi”
10 Lelo uno, bafubi ba Yehowa tabakwete kufumankana na bantu basumbule lukumiino misusa ibungi mu kakongye nya. Kadi, nsaa yatudi kumpala kwa malongyesha a madimi, sunga ekala aatukila mbalo kinyi, abitugu twate kitshibilo kya kwiasuuka. Kwelesha mpaka na bantu basumbule lukumiino, bikale kwisamba nabo mpala na mpala, mu mesage, sunga mu ungi mushindo nyi nkukutwa kwa binangu. Sunga byekala shi atukyebe kumukwasha, uno mwisambo tawipushena na ano malango aatukila mu Bifundwe abatukatuka mu kwisambila nya. Pamutwe pa byabya, bu byatudi bafubi ba Yehowa, atukyebe mu mishindo yooso kusuuka na kwilamuna kwi bantu basumbule lukumiino.
LUBINGO LWA 12-18/8/2019
BUPETA BWA MWIYI DY’EFILE MUKULU | TITE 1–FILEMONE
“Kutula bakulu mu kakongye”
w14-F 15/11 28-29
Nkonko ya bantu ababadikaa
Sunga byekala shi Bifundwe t’abipatuula kantu pa kantu bibabadi abapa bantu mashito mu tukongye mafuku a kumpala, kwi bingi bileshesho abilesha kipaso kibabidi abikitshika. Bifundwe abitulungula shi Mpoolo na Barnabe p’ababadi abalukiila mu lwendo lwabo lwa kumpala lwa bu misionere, ‘mu kakongye mooso babemusangwile bakulu, abo nkukita nteko pamune na kwishidika, abo nkwibatuula mu maasa a Yehowa, aye ababadi batudile lukulupilo lwabo.’ (Bik 14:23) Kunyima kwa bipwa, Mpoolo bafundjile mukwabo Tite ababadi abende naye mu ngyendo shi: “Su ne mukulekye mu Krete, nyi mbwa’shi wemulumbuule myanda, n’ashi otuule bakulu mu lupata looso, muyile elango dyande.” (Tt 1:5) Mu kipaso kimune, abimweneka shi Timote badi mutambukye kebungi na Mpoolo mutumibwa badi namu na buno bushito bumune. (1 Tim. 5:22) Eyendo, kuno kupa bantu mashito mu tukongye abadi abekukitshi kwi bakunki ba bifunda, kushii kwi batumibwa na bantu bakulu abadi mu Yelusaleeme.
Muyile kino kileshesho kya mu Bible, Kasaka ka Bakunkushi-Bakulu ka ba Temwe ba Yehowa nkabalumbuula mushindo wa kutula bakulu na bafubi ba midimo mu tukongye. Kubanga mu 1/9/2014, kupa bantu mashito akwikala akukitshi bino: Mukunkushi ooso a kifunda ekala atala mashina abamupa mu kifunda kyaye. P’afiki mu kukunka tukongye, e kupima kwitatshisha bwa kuuka bantu babadi bamufundjile na kutuka nabo mu mudimo wa bulungudi su kwi mushindo. Kunyima kwa kwisamba na bakulu ba mu kakongye bwa mashina abadi bamupe, mukunkushi a kifunda e na bushito bwa kutula bakulu na bafubi ba midimo mu tukongye twa mu kifunda kyaye. Ino mpango i mu kwipushena na bibadi abikitshika mu siekele a kumpala.
Nnanyi alombashaa mashito elekeene mu kuno kusangudiibwa? “Mpika a kishima na mupatulukye” nyi e pa mbalo ya kumpala na bushito bwa kudiisha ba mu nshibo. (Mat. 24:45-47) Bino mbitale mpa na kukimbuula Bifundwe ku bukwashi bwa kikudi kiselele bwa kutusha buludiki pabitale kufubila mayi akata a mu Bible muyile kipaso kya kulumbula tukongye twa mu nsenga ishima. Mpika a kishima nyi asangulaa bakunkushi booso ba bifunda na bena Komite a filiale. Akupu, filiale ooso atala kipaso kyadya kufubisha buludiki bubabatusha. Kasaka kooso ka bakulu ke na bushito bwa kutalula kalolo mu kakongye k’Efile Mukulu bakwetu balume balombashe myanda itekibwe mu Bifundwe. Mukunkushi ooso a kifunda e na bushito bukata bwa kutalula mu luteko mashina a bakwetu babadi bamupe kwi bakulu bwa kutula baba balombashe myanda itekiibwe.
Kukimbuula bwa kupeta mabwe a muulo a mu kikudi
w89-F 15/5 31 ¶5
Nkonko ya bantu ababadikaa
Mpoolo tabadi anyingisha bantu bwa kwikala na ntondo ya tubila pabitale bena Krete, mwanda badi auku shi mu Krete mubadi bena Kidishitu ba kishima babadi Efile Mukulu mukumine na kwibeela mwimu wa kikudi kyaye kiselele. (Bik 2:5, 11, 33) Mubadi bena Kidishitu abadi bepaane mu kutula tukongye mu “bibundji byoso.” Sunga byekala shi baba bena Kidishitu abadi bantu bakutwe kupwidika, t’ababadi ba sha madimi, baloofwa sunga ba sha budyangedyenge; mwanda Yehowa t’abadya kwikala mwibakumine su abadi byabya. (Fid 3:18, 19; Kibaf 21:8) Mu Krete mubadi bantu nka bu byatwibapete lelo mu bisamba byoso, bantu be na mashimba enyongole bwa myanda i butete ibefunyishe na be na mashimba aakumina mukandu wibuwa wa Kidishitu.—Ese 9:4; pwandjikisha na Bik 13:48.
w08-F 15/10 31 ¶4
Myanda ikata ya mu mukanda wa Tite, wa Filemone na wa Beena-Ebelu
15, 16—Bwakinyi Mpoolo tabadi mutekye Filemone bwadya kupa Onezime bulungatu? Mpoolo badi akyebe kushala mulamate bikata ku mudimo waye wa ‘kulungula mukandu wibuwa wa Bufumu bw’Efile Mukulu na kulongyesha myanda itale Mwanana Yesu Kidishitu.’ Nyi bwakinyi badi mwate kitshibilo kya kupela kutwelakana mu myanda ya mwilo, bu pabitale kwikala mu bupika.—Bik 28:31.
LUBINGO LWA 19-25/8/2019
BUPETA BWA MWIYI DY’EFILE MUKULU | 1 BEENA-EBELU 1-3
“Fula bululame na oshikwe bubi”
Sankilayi Kidishitu, Nfumu sha ntumbo!
8 Yehowa mmutuule Mwan’aaye bu Mesiya Nfumu mwiyilu mu 1914. ‘Mukombo waaye wa bufumu mmukombo wa bululame,’ byabya bululame na kulombana bi mu bufumu bwaye. Matalwa aaye ngalombane, mwanda ‘Efile Mukulu ndupuna nsulu lwaaye.’ Abilesha shi Yehowa ndjo kitako kya bufumu bwaye. Na dingi, lupuna nsulu lwa Yesu alwikala kwanka bwa “losoo.” Twi na muloo wa kufubila Yehowa ku bukunkushi bwa uno Nfumu e bukome abadi batuule kwi Efile Mukulu su?
Sankilayi Kidishitu, Nfumu sha ntumbo!
7 Badika Misambo 45:7, 8. Pamwanda wa kifulo kikata kya Yesu bwa bululame na mushikwa waaye wa kintu kilombeene kukutwa kutumbisha Nshaaye, Yehowa baadi mumushingye mwimu bwadya kwikala Nfumu a Bufumu bwa Mesiya. Yesu babaadi bamushingye “mwimu wa muloo,” kukila ‘benaaye,’ kwamba shi, banfumu ba Yuuda ba ku musuku wa Daavide. Mu mushindo kinyi? Bwa kintu kimune, Yesu abaadi bamushingye mwimu kwi Yehowa aye nabeene. Na dingi, Yehowa bamushingile mwimu bwadya kwikala bu Nfumu na bu Tshiite-mwakwidi mukata e panundu. (Mis. 2:2; Eb. 5:5, 6) Yesu dingi baadi mushingwe mwimu wa kikudi kiselele kushii na mwimu wi bi ungi mwimu ooso nya, na bufumu bwaye ta mbwa pa nsenga mbwa mwiyilu.
Kukimbuula bwa kupeta mabwe a muulo a mu kikudi
it-1-F 1170 ¶4
Kinfwanyi
Yesu mwifwane bu muntu bwa Nshaye bwa kwikala naye nka mu kipaso kimune su?
Mwana’mbedi a Efile Mukulu, nyi bafikile kunyima bu Yesu mu kinfwanyi kya Nshaye. (2Kod 4:4) Bu bikale shi bibadi yawa Mwana ababalungwile kwi Efile Mukulu shi, “tukite muntu kwifwanyiko dyetu,” abilesha shi efwanyiko dya Mwana na Nshaye, Mupangi, dibadi kwanka kubanga pabadi Mwana mupangibwe. (Kib 1:26; Yo 1:1-3; Kol 1:15, 16) P’abadi pa nsenga bu muntu mupwidikye, badi muleshe ngikashi na bumuntu bwa Nshaye mu bushima bwaye muyile ngobesha ya bumuntu, nyi bwakinyi badi na kya kwakula shi “mummone mmumone Yaaya.” (Yo 14:9; 5:17, 19, 30, 36; 8:28, 38, 42) Byabya, kuno kwifwanena, kubadi kunyinshe kushinkamishwa pabadi Yesu musangukye bwa kwikala na muwa wa mu kikudi na mupete kwi Nshaye Yehowa Efile Mukulu “matalwa ooso . . . mwiyilu na pa nsenga.” (1Mp 3:18; Mat 28:18) Bu bikale shi Efile Mukulu ‘mumukaamishe kwiulu,’ Mwan’Efile Mukulu binobino mwifwane ntumbo ya Nshaye kukila na bibadi mwiyilu kumpala kwa kufika pano pa nsenga. (Fid 2:9; Eb 2:9) Binobino mmwikale “kifwatulo kyaye [Efile Mukulu], aye ngi mutwale byooso.”—Eb 1:2-4.
it-1-F 478 ¶1
Eyilu
Mayi e mu Misambo 102:25, 26 ngatale Yehowa Efile Mukulu, kadi Mpoolo mutumibwa alesha dingi shi ngatale Yesu Kidishitu. Bwakinyi? Mwanda shi Efile Mukulu badi mufube na Mwana aaye eeleka bwa kupanga eyilu na nsenga. Mpoolo alesha kwilekena kwa kwikala kwa Mwana a Efile Mukulu na eyilu na nsenga mwanda eyilu na nsenga su Efile Mukulu akumiina e ‘kwibifunga nka bu kikotshi’ na kwibituula ku lupese.—Eb 1:1, 2, 8, 10-12; pwandjikisha na 1Mp 2:3.
LUBINGO LWA 26/8/2019–1/9/2019
BUPETA BWA MWIYI DY’EFILE MUKULU | 1 BEENA-EBELU 4-6
“Kita moobe mooso bwa kutwela mu kwikisha kw’Efile Mukulu”
w11-F 15/7 24-25 ¶3-5
Kwikisha kw’Efile Mukulu—akulesha kinyi?
3 Kwi bishinkamisho bibidi abitutakula mu kwakula shi efuku dya musambo dibadi ditungunukye mpa na mu siekele a kumpala B.B. Kya kumpala atwikipete mu mayi a Yesu abalungwile beshikwanyi naye p’ababadi bamutopekye bwa bibadi mupaashe muntu mwifuku dya Sabaata, pa kwibimona bu bakitshine mudimo. Mwanana bebalungwile shi: “Nshami mpaa naa binobino e ku mufubo, n’ami naamu nee ku mufubo.” (Yo 5:16, 17) Badi akyebe kwamba kinyi? Abafundjile Yesu shi kwete kufuba mwifuku dya Sabata. P’aye kwalula shi: “Nshami mpaa naa binobino e ku ku mufubo,” badi mutushe lwalulo. Byabya, Yesu badi alungula bantu abadi abamwipula shi: ‘Nshami n’Ami tukwete kukita mufubo umune. Bu bikale shi Nshami kwete kutungunuka na kufuba mu Sabata ya binunu na binunu bya bipwa, ne na bulunguntu bwa kutungunuka na kufuba mpa na mwifuku dya Sabata.’ Yesu badi alesha shi efuku dya musambo dibadi nka kwaka sunga mu mafuku abadi pa nsenga. Mu aa mafuku, Efile Mukulu badi ayikisha bwa mufubo ubakitshine bwa kupanga nsenga. Anka badi atungunuka na kufuba bwa kulombasha mpango yaaye.
4 Kishinkamisho kya kabidi mbekitushe kwi Mpoolo mutumibwa. P’abadi ateemuna Kibangilo 2:2 pabitale kwikisha kw’Efile Mukulu, Mpoolo bafundjile ku bukwashi bwa kikudi kiselele shi: “Atwe bakumiine, atukatwele mu kikiisho.” (Eb. 4:3, 4, 6, 9) Byabya, efuku dya musambo dibadi aditungunuka mpa na mu mafuku a Mpoolo. Dyadya efuku dya kwikisha dibadya kutungunuka munda mwa mafuku bungi kinyi?
5 Bwatudya kwalula ku lwalwa lukonko kalolo, abitungu tutentekyeshe kabingilo ka efuku dya musambo. Mukanda wa Kibangilo 2:3 aupatuula kyadilesha pawamba shi: “Efile Mukulu nkusampa efuku dya musamboobidi, kwidikita diselele.” Yehowa badi mwikashe dyadya efuku ‘diselele’—edisampa sunga kwiditula pa bwadyo bwa kufisha mpango yaaye ku nfudiilo. Yaaya mpango ngya’shi nsenga ishadiibwe na bantu abamukookyela abeyibamba na byoso bi na muwa panka. (Kib. 1:28) Pa mwanda wa kulombasha yaya mpango, Yehowa Efile Mukulu na Yesu Kidishitu ‘Mwanana a Sabata’ be nka “ku mufubo.” (Mat. 12:8) Efuku dya kwikisha dy’Efile Mukulu aditungunuka mpa na p’akalombesha mpango yaye yooso p’abitale nsenga na bantu ku nfudiilo kwa Bipwa Kinunu bya Kumunana kwa Kidishitu.
w11-F 7/15 25 ¶6
Kwikisha kw’Efile Mukulu—akulesha kinyi?
6 Efile Mukulu badi mupatulwile kalolo Adame na Eeva mpango yaye, anka tababadi beyikwatshishena nya. Mbya malwa mwanda Adame na Eeva nyi abadi bantu ba kumpala kukutwa kukookyela. Na midiyo ya bantu mbebalonde mu dyadya eshinda dimune. Sunga mwilo ubadi Efile Mukulu mwisangwile wa bena Isaleele, abalondele kileshesho kya kukutwa kukookyela. Nyi bwakinyi Mpoolo badi mudimushe bena Kidishitu ba mu siekele a kumpala shi abadi n’abo namu bya kupona mu wawa muteo umune bu bibakitshine bena Isaleele. Bafundjile shi: “Twinyinsheeyi bwa kutwela mu kino kikiisho bwa’shi kyakya kileshesho kimune kya kushii kokookyela t’akikumanga kuponesha muntu.” (Eb. 4:11) Lamiina shi Mpoolo alesha kukutwa kukookyela na kukutwa kwa kutwela mu kwikisha kw’Efile Mukulu. Byabya abilesha kinyi bwetu? Su twa tombokyela mpango y’Efile Mukulu mu mushindo kampanga, twi kukutwa kutwela mu kwikisha kwaye su? Eyendo, lwalulo ku lwalwa lukonko lwi na muulo ukata bwetu, tubande kunyinsha kwilutaluula. Anka tubande kutaluula bingi byatudi balombene kulongyela pabitale kutwela mu kwikisha kw’Efile Mukulu pa kutala kileshesho kibubi kya bena Isaleele.
w11-F 7/15 28 ¶16-17
Kwikisha kw’Efile Mukulu—akulesha kinyi?
16 Lelo uno, takwi mwina Kidishiatu e kukumina shi abitungu kulonda bipikwa bya bena Isaleele bwa kupeta kipandjilo. Ku bukwashi bwa kikudi kiselele, Mpoolo badi mulungule bena Efeso patooka shi: “Mwanda nku buntu kwabadi beenupaashiishe, muyiile lukumiino, anwe tanwi bakite kintu, nkya buntu ky’Efile Mukulu. Kipandjilo t’akituukila ku mifubo yeenu bwa’shi tala muntu su ngumune eetumbisha.” (Ef. 2:8, 9) Binobino, kutwela mu kwikisha kw’Efile Mukulu bwa bena Kidishitu akulesha kinyi? Yehowa mmutule efuku dya musambo,—efuku dyaye dya kwikisha—bwa kulombasha mpango yaaye bwa nsenga. Twi kutwela mu kwikisha kwa Yehowa—sunga kwibunga naye pamune—p’atwe kufuba na kukookyela mu kwipushena na mpango ikwete kwenda kumpala muyile byabakwete kwitulesha yanka mu ndumbulwilo aaye.
17 Mu ungi mushindo, su atubepuula malango a mu Bible atukwete kupeta kwi mpika a kishima na mupatulukye, pa kulonda eshinda dya bulungantu, tukwete kutombokyela mpango y’Efile Mukulu. Bino bi kulwisha kipwano kyetu na Yehowa. Mu mwisambo aulondo, atukyebe kutalula myanda ipeela ya mu nshalelo eetu a efuku dyoso ikwete kutula kukookyela kwetu mu masaku, na kumona su bitshibilo byetu byatwata mu yaya myanda abilesha shi twi mu kwikisha kw’Efile Mukulu.
Kukimbuula bwa kupeta mabwe a muulo a mu kikudi
w16.09-F 13
Nkonko ya bantu ababadikaa
“Eyi dy’Efile Mukulu” dyabalesha mu Beena-Ebelu 4:12 shi “di na muwa na bukome” nkinyi?
▪ Muyile mwanda wabesambila, Mpoolo badi alesha mukandu sunga bishima bya mpango y’Efile Mukulu muyile byabidi mu Bible.
Mbakambe kuteemuna mukanda wa Bena-Ebelu 4:12 mu mikanda yetu bwa kulesha shi Bible e na bukome bwa kushintula muntu, na mbilombane kumufubisha mu kyakya kipaso. Anka, bi kwitukwasha su twatalula mukanda wa Beena-Ebelu 4:12 muyile mwanda wabesambila. Mpoolo badi anyingisha beena Kidishitu ba mu Ebelu bwa kufuba mu kwipushena na mpango y’Efile Mukulu ibabadi baleshe kebungi mu bifundwe bya kishila. Mpoolo badi mufubishe kileshesho kya beena Isaleele babadi bapashe pa kutuuka mu Ejiipitu. Abadi na lukulupilo lwa kutwela mu nsenga ya mulayilo ‘ayalaala mabeele na buuki’ mubabadi na kya kwikala mu kwikisha kwa binyibinyi.—Efi. 3:8; Mi. 12:9, 10.
Nyi bibadi mpango y’Efile Mukulu. Anka, beena Isaleele abadi bapapishe mashimba pa kukutwa lukumiino, nyi bwakinyi be bungi ba kwabadi abakutshilwe kutwela mu kwakwa kwikisha. (Mba. 14:30; Yos. 14:6-10) Kadi Mpoolo akumbasha shi: “Mulayilo wa kutwela mu kikiisho kyaye [Efile Mukulu]” ubadi ukii kwanka. (Eb. 3:16-19; 4:1) Wawa “mulayilo” ngwikale mu mayi a Efile Mukulu bwa mpango yaaye. Nka bu bena Kidishitu ba mu Ebelu, twi kutundula mpango yaye na kufuba naye pamune. Bwa kulesha shi wawa mulayilo wi mu Bifundwe, Mpoolo badi muteemune bipindji bya mayi e mu mukanda wa Kibangilo 2:2 na Misambo 95:11.
Eyendo, abitukumu ku mashimba pa kuuka shi, kukii “mulayilo wa kutwela mu kikiisho kyaye [Efile Mukulu].” Atukulupila shi twi kutwela mu kwakwa kwikisha su atukitshi myanda ipushena nako. T’atukimbi bwa kulonda Miiya ya Moyiise sunga kukuminyibwa na Yehowa pa kukita mifubo kampanda. Anka, atutungunuka na kufuba pamune na muloo na lukumiino bwa mpango y’Efile Mukulu. Kukatusha byabya, nka bu byatwibimonanga kunundu, binunu bya bantu mu nsenga ishima bakwete kulonga Bible bwa kuuka bi mpango y’Efile Mukulu. Bebungi ba kwabadi bakwete kushintuula nshalelo aabo bwa kwikala na lukumiino na kubatshishibwa bwa kufika beena Kidishitu. Kipaso kyabakwete kushintuluka akilesha binyibinyi shi “Eyi dy’Efile Mukulu di na muwa na bukome.” Mpango y’Efile Mukulu muyile byabadi beyileshe mu Bible ngishintuule nshalelo eetu, na ayitungunuka na kulesha bukome bwayo mu nshalelo eetu.
it-1-F 799-780 ¶7
Lukulupilo
Luno lukulupilo lwa muwa wa ikalaika na kukutwa kwa kulwishibwa lwa bano “bapete lwitamino lwa mwiyilu” (Eb 3:1) mwanda wa binyibinyi, na mbalombene kwiukulupila na kushinkamisha kooso. Ndushimeete pa bintu bibi bishi bilombene Efile Mukulu kudimba madimi, kwamba shi, mulayilo na mutshipo waye, na luno lukulupilo ndwimeene mwi Kidishitu mwikale binobino na muwa ushii bya kufwa mwiyilu. Byabya, luno lukulupilo ndwikale ‘kishinkamiisho kya muwa, kishinkame na bukome akisambushena lushiko lwa nshibo ikata ya mwiyilu [bu bibadi tshiite mwakwidi mukata e panundu atwele mu mbalo ikile kishila mwifuku dya kulekyelewa kwa milwisho], mwamwa nyi mwitutwelele Yesu bu mulombwe, aye mwikale tshiite mwakwidi mukata bwa looso bu bibadi Melkisedeke.’—Eb 6:17-20.