Tulongamisheyi mayele eetu mu mudimo wa bulungudi​—Mushindo wa kwaluula muntu mufiite munda

BWAKINYI BI NA MUULO: Bantu be bungi batukwete kufumankana nabo mu teritware eetu be na bukalanga. Kadi, Yesu baadi mutemukye’shi bangi bantu abaketushikwa. (Yo. 17:14) Byabya, su twafumankana na muntu mufiite munda ta mbilombeene kwitukemesha nya. Su bino byetufwila, twi balombeene kwaluula mu mushindo ausangasha yawa atukwete kuleesha mpala yaaye, Yehowa. (Lom. 12:17-21; 1 Mp. 3:15) Kukita kwa byabya nkulombeene kwikala bu kupela kwela mwimu mu kaalo. Abituusha dingi bu kamonyi kwi yawa muntu mpa na kwi baaba booso abetutala, na kwibatakula bwa kuteemesha bangi ba Temwe ba Yehowa abafiki mu nkebatala.​—2 Kod. 6:3.

MUSHINDO WA KWIBIKITA:

• Tokumanga kusuusa na oleeshe eyikashi dya bu muntu sha butaale. Bino abikukwasha bwa kutaadisha mwanda. Tokumanga kulonda byabya abikitshi yawa muntu. (Mul. 7:9) Mmulombeene kwikala na nsungu mwanda wa myanda imukalakashe sunga pa mwanda wa’shi bofiki nsaa i bubi. Sunga byekala’shi mpa mwanda wa mukandu wibuwa watudi nao ndjo ubamufiitshisha munda, misango ibungi mbikale nka’shi baadi mwidimbe.​—2 Kod. 4:4.

• Mwaluule na bishima bya kalolo na bya lutumbu. (Nki. 15:1) We mulombeene kumudimusha sunga kumutshiba mwisambo? Sunga byekala’shi t’atutekaa lusa bwa mudimo wetu, we mulombeene kuteka lusa na kwiyisha kooso bu bibokookola kwaye nsaa i bubi. Mmufiite munda pa mwanda wa nkumo i bubi itutale ibaadi mupushe su? Su mbyabya, we kwamba bino: “Ne mulombeene kuuka kikufiitshishe munda. Byabya, abimweka shi byabya biboodi mupushe pa mwanda wetu mbya madimi. Ne mulombeene nkupatwila byanka su?” Opelaa lumune lwa ku nkumiino yeetu, pangi lutale kutushiibwa mu kakongye sunga lutale mase? We kwamba bino: “Napusha kalolo. Bantu bebungi abekalanga nka na yawa mpushisho. Ne mulombeene nkuleesha akipatuula dyadya dilongyesha dya mu Bible?”

• Su yawa muntu mmufiite munda bikishekishe, mbikile buwa kukatuka kushii kutompa kumwaluula. Su amba’shi ntakyebe ba Temwe ba Yehowa abafiki mu nkatala dingi, we mulombeene kumushinkamiisha’shi atulondo kyakya kibwamba.