Mikanda yatudi bafubishe mu Programe a bisangilo bia Buina Nkidishitu na mudimo wetu
© 2024 Watch Tower Bible and Tract Society of Pennsylvania
LUBINGO LUA 6-12/5
BUPETA BUA MUIYI DI’EFILE MUKULU MISAMBO 36-37
“Tofitshilanga bakitshi ba bi bubi munda”
Nkinyi akikabutulwa nsaa ayikafiki Bufumu bw’Efile Mukulu?
4 Bantu be bubi abetwinyongosha mushindo kinyi lelo uno? Mpoolo mutumibwa bakwile’shi, mu mafuku a ku nfudiilo, akukekala “bipungo bibukopo.” Na bakwile dingi’shi: “Bantu be bubi na bansesa mu lukumiino abayidididila mu bubi.” (2 Timote 3:1-5, 13) Tobandile kufumankana na ino myanda su? Bebungi ba kwatudi mbakyengyeshibwe na bantu babi be na kifita, be na ntondo y’ekoba, na bantu abakitaa bibeshi. Bangi ba kwabadi abakitshi myanda ibubi mpa na patoka apamono bantu. Bamo abamba’shi, abakwasha bantu aku namu bakwete kukita myanda ya bu ntomboshi. Na dingi, sunga twekala’shi tatwabandile kufumankana na bino bibeshi, tukwete kukyengyeshibwa na bantu babi. Abitutanyisha mitwe nsaa yatupusha kipaso kyabakwete kukyengyesha bana bakinga, bantu banunu, na bangi bantu bashii balombene kwikalwila. Bano bantu babi bakwete kukita myanda ayibekasha nka bu nyema ya bukyelo sunga ba demo. (Shake 3:15) Biya byoso, Eyi dy’Efile Mukulu aditupa lukulupilo.
Yehowa elelaa baaba abafuila bangi lusa miabi
10 Nsaa yatushaala na nsungu atuiluishisha atue banabene. Yehowa akumiina’shi tupete butaale abutukila mu kusumbula sunga kupela kutuula kua nsungu kuishimba. (Badika Bena-Efeso 4:31, 32.) Yehowa etulungula’shi, “leka nsungu sumbula etombo.” (Mis. 37:8) Su tu balondo dino elango adiketukuasha. Kulama nsungu kulombene kuluisha mbidi yetu na binangu bietu. (Nki. 14:30) Su tubalamina muntu nsungu, yaya nsungu t’ayimukalakasha, tui nka bu muntu mutome nsumu ishi ilombene kukita yawa muntu atudi balamine nsungu kintu. Nsaa yatufuila bangi lusa, tui nka bu babapete atue banabene kiabuntu. (Nki. 11:17) Atupete butaale bua mu binangu na bua muishimba na atuikala na mushindo wa kuenda kumpala mu mudimo watufubila Yehowa.
w03-F 1/12 14 ¶20
“Sangeela mui Yehowa”
20 Paapa, “beyishe abapyaana nsenga.” (Misambo 37:11a) Biabia bano “beyishe” mba nanyi? Kishima kia babadi baluule bu “beyishe” akituukila ku kishima “kupombeshibua, bepeleeshe.” Eyendo, “beyishe” mbano abatengiela bua’shi Yehowa alumbuule kukutua koso kua kululama ku’abebakitshina. “Abasangeela mu butaale bw’eyendo.” (Misambo 37:11b) Sunga mbinobino, tui bapete butaale bu’eyendo mu mpaladiso a mu kikudi pamune na bakuetu bena Nkidishitu.
Mabue a muulo a mu kikudi
it-2-F 341
Muengie, ma ngulu
Kushimata, kuikala kuanka bua loso, sunga bula. Miengie ayikalaa nka ishimate mbalo imune na ayikalaa nka kuanka bua loso. (Yesh 54:10; Ab 3:6; Tala Mis 46:2.) Biabia, ap’akula mufundi a misambo’shi kululama kua Yehowa kui bu “myengye y’Efile Mukulu” (Mis 36:6) baadi akiebe pangi kulesha’shi kululama kua Yehowa t’akusanyishuaa. Bu abikalaa miengie bula, baadi akiebe dingi pangi kulesha’shi kululama kua Yehowa nkukile kua bantu. (Tala Yesh 55:8, 9.) Pabitale kupoongolua kua kibakudi kia musambo kia nsungu y’Efile Mukulu, Kibafumbuilue 16:20 amba’shi: “Miengie ibaadi ishimine.” Bino abilesha’shi sunga bintu bi bula bu miengie ta mbilombene kusuuka kupongoolua kua nsungu y’Efile Mukulu.—Tala Yel 4:23-26.
LUBINGO LUA LUA 13-19/5
BUPETA BUA MUIYI DI’EFILE MUKULU MISAMBO 38-39
Sumbula bushito bua kuitopeka kukilekile bua miluisho ya kala
Banduluka otale myanda ayifiki kumpala
12 Badika 1 Yowano 3:19, 20. Ingi nsaa atwitopekaa bwa milwisho yatubadi bakite. Bu kileshesho, bangi abetopekaa bwa milwisho ibabadi bakite kumpala kwa kulonga bya binyibinyi. Bangi namu abetopekaa bwa milwisho yabadi bakite kunyima kwa lubatshisho. Bantu boso abepushaa nka bino. (Lom. 3:23) Eyondo, atukumiinaa kukita bi buwa. Anka “atukokolaa atwe booso mu bipaso bi bungi.” (Shak. 3:2, Kilombeeno kipya 2014; Lom. 7:21-23) Sunga t’atukumiinaa kwitopeka bwa milwisho ibatudi bakite, kwibikita a kwitukwasha. Mushindo kinyi? Akwitukwasha bwa kushintuula nshalelo etu, na kwata kitshibilo kya kupela kukita dingi yaya milwisho.—Eb. 12:12, 13.
13 Ku lungi lupese, twi balombene kwitopeka bikishekishe bwa milwisho yatubadi bakite, bino bikutungunuka mpa na kunyima kwa Yehowa kwitufwila lusa, atwe bapwe kwilanga. Kwitopeka kwa mu uno mushindo kwi masaku. (Mis. 31:11; 38:4, 5) Bwakinyi? Tutaluule kileshesho kya ungi mukwetu mukashi, badi mutungunukye nka na kwitopeka bwa milwisho yaye ya kala. Amba’shi: “Bibadi abingyelela bukopo bwa kufubila Yehowa ngofu, mwanda pangi ntankapashibwa.” Be bungi ba kwatudi be kwipusha nka bu uno mukwetu mukashi. Ndjo bwakinyi abitungu tudimukile kwitopeka kukilekile bwa milwisho ikile. Banda kupwandjikisha muloo wi kwikala nao Satana su twaleka kufubila Yehowa—sunga Yehowa ekala mupwe kwitufwila lusa!—Pwandjikisha na 2 Beena-Kodinda 2:5-7, 11.
w02-F 15/11 20 ¶1-2
Tui kukita kinyi bua’shi mafuku etu ekale na muulo kumpala kua Yehowa?
MAFUKU a muwa wetu ngapeela na aakidi lubilo. Mufundi a misambo Davide baadi munangushene pa buipi bua muwa na abio nkumutakula bua kuteka’shi: “Yehowa, nguukishe nfudiilo ande, na bungi bua mafuku ande, nguukie bii kufudiila kwande! Bula bwa muwa wande bwi bisumanga kumpala kobe.” Davide baadi ekalakasha bua’shi ekale na nshalelo asankisha Efile Mukulu, mu ngakuilo na mu bikitshino biaye. Bu bibaadi auku’shi mukulupile nka Efile Mukulu, bambile’shi: “Lukulupilo lwande lwi koodi.” (Mis 39:4, 5, 7) Yehowa baadi mumuteemeshe. Baadi mutaluule bikitshino bia Davide na aye nkumuelela miabi.
Lelo uno mbibofule bua kuikala na bi bungi bia kukita nsaa yoso yaya na bintu bia kukita bietukila bungi. Bino mbilombene kuitukalakasha ngofu, muanda atumono’shi tui na bi bungi bia kukita anka tui na nsaa ipeela ya kuibikita. Nka bu Davide, natue namu atuikalakasha bua kuikala na nshalelo asankisha Efile Mukulu su? Tushinkamishe’shi Yehowa ataluulaa oso akuatudi. Takudi bipua bifikie ku 3 600, Yobo muntu baadi atshinyi Efile Mukulu, baadi mushinkamishe’shi Yehowa baadi amumono na kubadika matabula aaye. Yobo baadi muiyipushe’shi: “Apafiki Efile Mukulu mu kungipusha, namualuula naminyi?” (Yob 31:4-6, 14) Kui mushindo wa’shi tuekasha mafuku a muwa wetu na muulo kumpala ku’Efile Mukulu pa kuikala na biubishi bi buwa bia mu kikudi, kukookiela miiya yaye, na kufubisha nsaa y’etu kalolo. Tutaluuleyi ino mianda kalolo.
Alushula dingi kipuano kiobe na Yehowa
Ikala webilungula Yehowa nsaa yoso. Nshobe auku tuinyongoshi todi nato bua bilubilo bioyikalanga mukite na mbilombene nkuikela bukopo bodia kumuteka. (Lom. 8:26) Kadi, “ikala na katshintshi mu nteko,” lungula Yehowa mushindo okumina kuikala dingi naye mu kipuano. (Lom. 12:12) Andrej atentekiesha’shi: “Napushaa lukalakashi ngofu mpa na buufu. Anka kunyima kua kuela luteko looso, bino bioso abinkatukaa. Na napushaa butaale mu binangu.” Su touku kia kuteka, we kutala kileshesho kia luteko lua Mfumu Davide lua kuilanga kuishimba luatupete mu Misambo 51 na 65.
Mabue a muulo a mu kikudi
Lesha’shi we muntu a kukulupilua
16 Butontshi bua mbidi, bui buwa su atukumiina’shi bangi betukulupile. Dino eyikashi aditukuasha buatudia kulama kukanua kuetu, nsaa y’abetutompo bua’shi tuakule mianda ifuame yabadi betulungule kui bangi. (Badika Nkindji 10:19.) Tui balombene kusangana’shi butontshi buetu bua mbidi, bubatudibua mu kitompuanga nsaa y’atufubisha internete. Su ta tui badimukie, tui kuasamuka tubapu kulungula bantu be bungi mianda ifuame ya bangi kushi tue kuiuka. Biabia, tuapua kupalakasha mianda mu internete, ta tui balombene kuuka mushindo wabakeyifubisha nya, sunga masaku ayidi ilombene kufuisha. Butontshi bua mbidi abuitukuasha dingi buatudia kushaala baumiine, nsaa i baluishi neetu abatompo kui tukitshisha bua’shi tuakule mianda ifuame ya bakuetu, ilombene kutuula bakuetu balume na bakashi mu masaku. Bino bi ku mueneka nsaa y’abetuele nkonko kui ba mpulushi mu ma mbolo abadi bemikie mudimo wetu, sunga abadi bakandikie ingi midimo yetu. Tui balombene kutumikila eyi dia kulonda adiamba’shi, “neele kishiko kukanwa” mu mianda i bino sunga mu ingi mianda. (Mis. 39:1) Tui na lukalo lua’shi bantu booso betukulupile, biabikala mu kifuko kietu, kui ba kuuku beetu, kui bakuetu balume na bakashi, mpaa na kui bangi bantu. Na dingi su atukiebe’shi bantu betukulupile, abitungu tuikale na butonshi bua mbidi.
LUBINGO LUA 20-26/5
BUPETA BUA MUIYI DI’EFILE MUKULU MISAMBO 40-41
Buakinyi abitungu kukuasha bangi?
Basha muloo mbano abapanaa na kalolo kooso
16 Bantu be na kalolo ka binyibinyi tabapaanaa na binangu bya’shi bebape namu nya. Yesu bambile’shi: “Pooteekyesha bya-kudya, itaanyina balanda, baa-sha-bikopo, abasumpikita, bampofu, byaabya opete mwabi, mwanda tabee na kya nkwalwisha.” (Luka 14:13, 14) Bible amba’shi: “Sha-kalolo asampibwa.” Amba dingi’shi: “Sha-mwabi nguno atentekyesha mulanda!” (Nkindji 22:9; Misambo 41:2) Atukekala na muloo wa binyibinyi su tubekala atukwasha bangi.
17 Pabadi Mpoolo mutemune mayi a Yesu aamba’shi, “muloo wa kupaana ngukile wa kupeebwa,” tabadi akwila nka penda bwa kupaana bintu bya ku mbidi nya. Twi balombene kupa bantu mayi a kwibanyingisha, malango a mu Bible, na kwibakwasha na bingi bintu. (Bikitshino 20:31-35) Ku mayi na ku bikitshino bya Mpoolo, badi mwitulongyeshe muulo wa kwikala atupaana nsaa yetu, bukome bwetu, sunga kwikala atupasukila bangi na kwibafula.
18 Bantu abakimbulaa myanda ya mu mwikelo wa bantu mbasangane dingi’shi kupaana akupeyaa bantu muloo. Muyile abilesha ungi mukanda, bantu bebungi abakulaa’shi be na muloo kunyima kwa’bo kukitshina bangi bantu myanda ibuwa. Bantu abakimbulaa myanda abamba’shi nsaa yatukwasha bangi, atupusha’shi nshalelo eetu balongama. Ngi bwakinyi bangi bantu balongye myanda ibungi abamba’shi bibuwa bantu bekale abakwasha bangi bwabadya kwikala na mbidi bukome na muloo. Byabya, ino myanda yabadi bafumbule tayitukemesha nya, mwanda Yehowa Mupangi eetu sha kifulo, mmupwe kwitulungula’shi kupaana akwitupetesha muloo.—2 Timote 3:16, 17.
Yehowa akakunyingisha
7 Su we na mukumbo, Yehowa akakunyingisha nka bu bibaadi mukite na bafubi baaye ba kala. Nfumu Daavide bafundjile bino: “Sha-mwabi nguno atentekyesha mulanda! Ngub’a malwa, Yehowa amupaasha, Yehowa amulama na muuwa.” (Misambo 41:2, 3) Byabya, Daavide tabaadi aleesha’shi muntu ebuwa baadi aneemeka miiya mu aa mafuku tabaadi mulombeene kufwa nya. Yehowa baadya kupasha yawa muntu naminyi? Daavide akula’shi: “Yehowa amunyingisha mu lusala lwaye paadi mu mukumbo, amùbèèsha kalolo ngub’a mukumbo waye.” (Misambo 41:3) Yehowa euku bafubi baaye bakwete kukumba, na te bya kwibayilwankana nya. Mulombeene kwibanyingisha na kwibapa kinangu. Yehowa baadi dingi mupangye mbidi yeetu mu kipaso kilombeene’shi y’epaasha inabeene.
Ambula lusa na kalolo ka Yehowa
17 Sunga byekala’shi kulesha bangi lusa na kalolo akwitukwasha mpa n’atwe banabene, kabingilo kakata ka kulesha ino ngikashi nka’shi atukumina kwambula Yehowa na kumutumbisha. Aye ngi nsulo ya kifulo, lusa na kalolo. (Nkindji 14:31) Mmwitulekyele kileshesho kipwidikye. Byabya twikitshisheyi na mwetu moso bwatudya kwambula Efile Mukulu pa’twe kulesha lusa na kalolo. Su tubakitshi byabya, atukefubwila pepi na bakwetu na atukekala mu kipwano kibuwa na bantu betwifunyishe.—Beena-Ngalatea 6:10; 1 Yowano 4:16.
Mabue a muulo a mu kikudi
it-1-F 1261
Yehowa
Bible mushima akuila kukaluila matalua a kumunana a Yehowa na bino abimueka patooka’shi, mpango ya kumpala ya Yehowa ngia kuikasha eshina diaye dia kishila. Kuidikasha dia kishila nkukita bia’shi tadikayibuanga. Kukatusha biabia, abitungu’shi bipangua bioso bi na binangu bi muiyilu na bi pa nsenga binemekie dino eshina, bidimone bu dia kishila. Dingi, abipatuula’shi abakumiina na kunemeka matalua a Yehowa a kumunana mu kukumiina kuabo’bo banabene, abakumiina kumufubila, na be na muloo wa kukita kikiebe ki’eshimba di’aye muanda mbamufule. Luteko lua Davide lui mu Misambo 40:5-10 alulesha kalolo lukalo luaye lua kuikasha eshina dia Yehowa dia kishila mu binyibinyi. (Mu Bena Ebelu 10:5-10, Mpoolo mutumibua alesha’shi bingi bipindi bia uno musambo mbitale Yesu Nkidishitu.)
LUBINGO LUA LUA 27/5–2/6
BUPETA BUA MUIYI DI’EFILE MUKULU MISAMBO 42-44
Tumikila malongiesha aafiki kui Yehowa
w06-F 1/6 9 ¶4
Mianda ikata ya mu mukanda wa Misambo
42:4, 5, 11; 43:3-5. Su bua kabingilo kampanda tuakutua mushindo wa kuikala na bena Nkidishito netu bua kapindi, kutentekiesha muloo wa tubaadi bapushe pabaatudi naabo pamune wi kuitunyingisha. Sunga biekala’shi kutentekiesha bino kui kuitutudila bushiye, mbilombene dingi kuitutentekiesha’shi Efile Mukulu nkifuamino kietu na’shi abitungu tumukulupile bua kupeta bukuashi
w12-F 15/1 15 ¶2
Bia kuikasha kuilongiela kua Bible bu nsaa ya muloo na ayikuasha
1 LUTEKO: Kintu kia kumpala akitungu kukita nyi luteko. (Mis. 42:8) Buakinyi? Abitungu tuikale atumono kuilongiela Eyi di’Efile Mukulu bu kipindi kia lulanguilo luetu. Nyi buakinyi abitungu tumutekie kikudi kiaye kiselele bua’shi tutume binangu ku bi’atulongo. (Luka 11:13) Barbara, t’aadi bipua bi bungi mu mudimo wa bu misionaire amba’shi: “Kumpala koso kua kubadika sunga kua kuilongiela Bible natekaa. Kunyima kua biabia, napusha’shi Yehowa e nami na’shi akumiina biabia biankitshi.” Kuteka kumpala kua kuilongiela akufungula binangu n’eshimba dietu bua kukumiina n’eshimba dimune biakudia bia mu kikudi bi kumpala kuetu.
“Maasa oobe taabofulanga”
11 Yehowa kwete kwitunyingisha dingi ku bukwashi bwa myanda yatulongo mu bisangilo bya beena Kidishitu, ku bikongeeno bya kifunda na bya mafuku asatu, mpa na mu tulasa twa teokrasi. Ino myanda ngilombeene kwitukwasha bwa kufubila Efile Mukulu na binangu bibuwa, kwiatshila bitshibilo, na kulombasha mashito a mu kakongye ka beena Kidishitu. (Misambo 119:32) Okuminaa kupeta bukome bwa Yehowa abutukilaa ku myanda yetulongyesha su?
12 Yehowa bakwashishe mwilo waye bwaudya kutshokola beena Amaleke na beena Etshopi, aye nkupa Neemiya na beena Yuuda bukome bwa kwibaka midimba ya Yeelusaleme. Mu mushindo umune, Efile Mukulu etupa bukome bwatudya kuyididiila na kulungula mukandu wibuwa sunga twekala na twinyongoshi na sunga kwekala bantu abetulwisha na abapele kwituteemesha. (1 Mpyeele 5:10) Yehowa tashimisha myanda yeetu mu kilengyeleshi nya. Anka, abitungu twitatshishe namu ku lwetu lupese. Mu mushindo kinyi? Abitungu tubadikye Eyi dy’Efile Mukulu efuku dyooso, kwilumbuula na kutwele mu bisangilo lubingo looso, kutungunuka na kwilongyela na kulonga Bible mu kifuko, na kuteka bukwashi bwa Yehowa mu luteko. Tatulekyelanga kintu su nkimune kikatushe binangu byeetu ku bintu bitupe Yehowa bwa kwitukankamika na kwitunyingisha. Su bopusha’shi maasa oobe abapu kubofula mu ino myanda ibatuteemuna, teka bukwashi bw’Efile Mukulu. Akupu okamono abikafubu bukome bwa kikudi ky’Efile Mukulu ‘munda moobe, bwa nkwikasha na nkukitshisha.’ (Beena-Fidipe 2:13) Obe namu we kunyingisha maboko a bangi bantu su?
Mabue a muulo a mu kikudi
it-1-F 417
Museu
Mu bifundue abateemuna museu mu ngakuilo a mu kifuanyi bua kuakuila muanda kapanda. P’akuila lukalakashi lubaadi nalo, Yobo alesha’shi bafikile “mukuabo na miseu.” (Yob 30:29) P’akuila kuishibua kua milongo p’abo kuibatshokola ku ngoshi, mufundi a misambo baadi pangi anangushena pa mbalo ibabaadi abaluila ngoshi mubaadi miseu ayifiki bua kudia bitanda (tala Mis 68:23), edidi’shi: “Bw’etusoso mu mbalo ya miseu.” (Mis 44:19) Kukuata kua Yelusalema kui bena Babilone mu 607 K.B.B. ku baadi kufuishe nsala muiumbo, na bino nkutakula ba nyina bana bua kukitshina bana baabo mianda na kikiso. Pa muanda wa bino, Yelemiya baadi muleshe’shi “muilo” wi na kikiso kukila mpa na kia miseu i na bana.—Kwi 4:3, 10.
LUBINGO LUA LUA 3-9/6
BUPETA BUA MUIYI DI’EFILE MUKULU MISAMBO 45-47
Loono pabitale eyibakishi dia Nfumu
Tusangeeleyi dibaka dya Mwana a mukooko!
8 Badika Misambo 45:14, 15a. Mukashi e na “kineemo [mulongame]” bwa dibaka dya Nfumu. Mu Bifumbulwe 21:2, mukashi abamupwandikisha na lupata, Yeelusaleme mupya na “mwilumbulwile mulume aaye.” Luno lupata lwa mwiyilu lwi na ‘ntumbo y’Efile Mukulu’ na ebaakanyi dyalo dibaadi “dya kupwandikisha n’ebwe dya muulo wi bukopo, bu ebwe dikile kuneema.” (Bif. 21:10, 11) Buwa bwa Yeelusaleme mupya mbebuleshe mu mukanda wa Bifumbulwe. (Bif. 21:18-21) Kushii mpaka mufundji a misambo alesha shi mukashi “mwilengyeshe”! Mu byooso, dibaka dya Nfumu adikitshika mwiyilu.
9 Mukashi abende naaye kwi mulume aaye—Mesiya Nfumu. Mmupwe kubanga kumulumbuula, ‘amutoosha pa kumutumpa na mema na ku bukwashi bw’eyi.’ Aye e ‘selele kushii kato.’ (Ef. 5:26, 27) Mukashi aaye e na kya kufwala kalolo bwa dyadya dibaka. Byabya ndjo byaadi. Na dingi, e na “nkandjo ilengyeshe na oòlo,” na “abafiki n’ê mu kumulubula kwi nfumu mmufwale bilamba byolwé na bukalamwino.” Bwa dibaka dya Mwana a mukooko, “abamupa matalwa a kufwala bilamba bineeme na biiselele, mwanda byabya nyi bikitshino bilulame bya be selele.”—Bif. 19:8.
Mukanda wa Kibafumbwilwe: Awakula kinyi pabitale mafuku oobe aafiki?
10 Yehowa akakita kinyi bua buno buluishi? Etulungula’shi: “Nakakwata nsungu ikata.” (Es. 38:18, 21-23, EEM) Mukanda wa Kibafumbwilwe shapitre 19 aulesha akikakitshika kunyima. Yehowa akatumu muana aaye, bua kukaluila muilo waye na bua kubutula beshikuanyi baabo. Yesu akafiki mu kulua ino ngoshi na “bilwilo bya mwiyilu”—ba mikeyilu baasha lulamato pamune na bedibue muimu 144 000. (Kibaf. 17:14; 19:11-15) Ino ngoshi ayikafudiila naminyi? Abakabutula bantu booso na ndumbuluilo yoso itombokiele Yehowa!—Badika Kibafumbwilwe 19:19-21.
11 Banda kupuandikisha mushindo aukapusha, baasha lulamato be pa nsenga bua kupaashibua ku kabutu kakata ka beshikuanyi b’Efile Mukulu! Akikekala kipungo kia muloo! Mpaa na muiyilu abakeele tukundakunda tua muloo nsaa y’abakabutula Babilone mukata, akukekadika’nyi kingi kintu akikebatuadila’nyi muloo ukata. (Kibaf. 19:1-3) Kiakia kintu, mu binyibinyi, ki na muulo ukata ki mu mukanda wa Kibafumbwilwe—nyi “eyibakishi dia muana a mukooko.”—Kibaf. 19:6-9, NWT.
12 saa kinyi ayikakitshika eyibakishi? Bedibue muimu booso 144 000, abakekadika bapue kuenda muiyilu kumpala kua’shi ngoshi ya Armagedone ibangie. Biabia, kino t’akikekadika kipungo kia eyibakishi dia muana a mukooko nya. (Badika Kibafumbwilwe 21:1, 2.) Eyibakishi dia muana a mukooko, adikakitshika kunyima kua ngoshi ya Armagedone kukitshika, na booso beshikuanyi b’Efile Mukulu, babaapu kubutudibua.—Mis. 45:3, 4, 13-17.
it-1-F 1041
Ngoshi
Ku nfudiilo kua ino ngoshi, nsenga ayikekala mu butaale munda mua bipua kinunu. Misambo ayamba’shi: “[Yehowa] ayimika ngoshi nyaa na kufudiile nsenga. Atshyokola buta, asooso milumbu, ashiiki matempu mu kaalo,” ino milayilo ibaadi ilombane pabaadi Efile Mukulu mufuishe butaale mu nsenga ya bena Isalele pa kutshokola bina ngoshi bia beshikuanyi. Apakapu Nkidishitu kutshokola beshikuanyi mu ngoshi ya Armagedone, nsenga ishima ayikekala na muloo na butaale. (Mis 46:8-10) Bantu abakapete muwa wa ikalayika nyi mbano baate ‘mpete yabo ya ngoshi beyifusha bintu bia kudima nabio, na milumbu yabo beyikita bintu bia kupuupa nabio mitshi,’ na ‘bash’abalongo dingi bia kulua ngoshi.’ “Muanda mukanwa mwa Yehowa sha bukome booso nyi mubakula.”—Yesh 2:4; Mik 4:3, 4.
Mabue a muulo a mu kikudi
Nkinyi akikabutulwa nsaa ayikafiki Bufumu bw’Efile Mukulu?
9 Nkinyi akikapyana ino ndumbulwilo ibubi? Kunyima kwa Armagedone, pa nsenga tapakekala ndumbulwilo su ngumune? Bible akula’shi: “Twi batengyele eyilu dipya na nsenga ipya, mwamwa amukabikala bululame.” (2 Mpyeele 3:13) Mayilu a kala na nsenga ya kala nyi mbulamatadi ibubi na bantu babakunkusha. Kunyima kwa kulwishibwa, nkinyi akikebipyana? “Eyilu dipya na nsenga ipya.” Eyilu dipya adileesha mbulamatadi mupya, abakunkusha kwi Yesu Kidishitu na bantu 144 000. Nsenga ipya ayilesha bantu babakamunu kwi Bufumu bw’Efile Mukulu. Yesu na bantu abakamunana naye abakambula Yehowa mwikale Efile Mukulu a bulongame mu kipaso kipwidikye. (1 Beena-Kodinda 14:33) Byabya, “nsenga ipya” ayikala na myanda ilondene mu mulongo. Amukekala bantu balulame bwa kulama bintu kalolo. (Misambo 45:16) Bantu boso abakakunkushibwa na Kidishitu na bano bantu 144 000. Banda kupwandisha nsaa ayikakatuka ino ndumbulwilo yooso na kupyanyibwa na ndumbulwilo umune e na buumune na mushi’amukekala dingi kutshibibwa milomo!
LUBINGO LUA LUA 10-16/6
BUPETA BUA MUIYI DI’EFILE MUKULU MISAMBO 48-50
Ba nambutuile: Kuashayi bifuko bienu buabidia kuikala na lukulupilo mui ndumbuluilo a Yehowa
Lulanguilo lua binyibinyi alukukuasha bodia kuikala na muloo
11 Atulanguila Yehowa nsaa yatuibadikila Eyi diaye na kulongiesha bana betu pabimutale. Sabaato ibadi ayipa bena Isaleele mushindo bua badia kutuula midimo yabo ya kuifuku n’efuku ku lupese buabadia kutula binangu biabo ku kipuano kiabo na Yehowa. (Efi. 31:16, 17) Balanguidi ba Yehowa babadi mukantshi muabo babadi abalongiesha bana baabo pabitale Yehowa na biadi na kalolo. Lelo uno, n’atue namu tui balombene kuata nsaa yakuilongiela na kubadika Eyi di’Efile Mukulu. Kino nyi kipindi kia lulanguilo luetu bua Yehowa, na akitukuasha buatudia kuifubuila peepi naye. (Mis. 73:28) Na dingi patuibadikila Bible mu kifuko, tui balombene kukuasha kino kipungo kipia kia bana betu bakuete kukula—buabadia kutamisha kipuano kiabo kibuwa na Nshetu sha kifulo e muiyilu.—Badika Misambo 48:13.
w11-F 15/3 19 ¶5-7
We na kabingilo ka kuikala na muloo
‘Sembaayi mu milongo, nwifuunye Siyoona, badikayi tuleya (bitenta) tuaye. Kaanya bi bukata bua bimano biaye. Badika bungi bua ma mbalo aye a kushalela, bua’shi nuibilungule kipungo akifiki.’ (Mis. 48:12, 13) Mufundi a misambo baadi anyingisha bena Isalele bua kuenda mu nkatala Yelusalema pepi. We kunangushena mianda i buwa ibaadi bifuko bia bena Isalele abimono pababidi abiende mu kibundi kisele ku misangeelo ya ku kipua na nkabandila bi buwa bua ntempelo? Bino bibaadi abibatakula mu “kulondela bipungo abifiki.”
Banda kunangushena pabitale ndalamumba a ku Saba, baadi mubande kuela mpaka pabitale bufumu bua Salomone na binangu biaye bikile. Nkinyi kibaadi kimukuashe bua kushinkamisha’shi mianda ibaadi mupushe ngia binyi? Bambile’shi: “Panyikêle tanfikile mu kukumona ami nabêne na meso ande, ntanyibikumînanga ooo.” (2 Mya. 9:6) Biabia, mianda y’atumono na “meso eetu” i na bukitshishi bukata kuatudi.
Mbikunyi biodi mulombene kukuasha bana bobe buabadia kuimuena bi buwa bua ndumbuluilo a Yehowa? Su kui biro bia filiale bi pepi nenu, etatshisheyi bua kuenda mu kutala. Bu kileshesho, Mandy na Bethany mbakudile mbalo i mu bilometre 1 500 bua nkafika ku Betele a muiumbo diabo. Anka baledi baabo abaadi baate mpango ya kuendanga mu kutala Betele, bikishekishe pabaadi ba nsonguakashi baabo abende na kukula. Abamba’shi: “Kumpala kua kuenda mu kutala ku Betele, tubaadi atupuandikisha’shi nyi mbalo ayishala penda bantu banunu. Anka tubaadi bekumone ba nsongua abaadi abafubu ngofu bua Yehowa na muloo oso. Tubaadi bamone’shi, ndumbuluilo a Yehowa ta penda yaya mianda ibatudi atumono ayikitshika mbalo ibatudi bashale na musango oso wa tubaadi atuende ku Betele tubaadi atualuka banyingishibue mu kikudi.” Kumona ndumbuluilo a Efile Mukulu pepi, kubaadi kutakule Mandy na Bethany bua kubanga mudimo wa bu mbala-mashinda na abo kuibetamina bua kufuba ku Betele bu bakuashi.
w12-F 15/8 12 ¶5
Ikalayi na shalelo muipushene na a bena Bufumu!
5 Longa mianda itale kipindi kia ndumbuluilo a Yehowa ki pa nsenga. Muntu akiebe kuikala muina eumbo mu mbulamatadi ya bana ba bantu, abitungu alongie mianda itale diadia eumbo. Mu mushindo umune, boso abakiebe kuikala bu bena Bufumu abitungu balongie mianda pabitale Bufumu bu’Efile Mukulu. Tuate kileshesho kia bana ba Kora, abaadi abafubu mu Isalele. Abaadi abasankila ngofu Yelusalema na mbalo yaye ya lulanguilo na kulondela bangi bantu mianda itale kibundi. Kibaadi akibakanyisha ta luibako lua kibundi, kadi nkiakia kibaadi akilesha kibundi na mbalo yakio ya lulanguilo. Yelusalema baadi “lupata lua Nfumu mukata,” Yehowa, muanda baadi mbalo ya lulanguilo lui selele. Kuakua nyi kubabaadi abalongiesha muiya wa Yehowa. Bantu bababaadi abakunkusha kui Nfumu mu Yelusalema nyi bababaadi baleshe kifulo ki na lulamato kui Yehowa. (Badika Misambo 48:1, 2, 9, 12, 13.) Nka bu’bo, we na lukalo lua kulonga na kulondela bangi pabitale kipindi kia ndumbuluilo a Yehowa ki pa nsenga su? P’onyisha kulonga bi bungi pabitale ndumbuluilo a Efile Mukulu na bi Yehowa akuatshishena muilo waye, Bufumu bu’Efile Mukulu abunyisha kufika bua binyibinyi ku meso kobe. Na wekala na lukalo lui bungi lua kulungula mukandu wi buwa.—Yel. 9:24; Luka 4:43.
Mabue a muulo a mu kikudi
it-2-F 799
Mapeta
Bu bibaudi muilo wi na bupeta, Isalele baadi na bia kudia na bia kutoma (1Bf 4:20; Mul 5:18, 19), na bupeta bubaadi abuibakaluila ku nkalakashi ya bulanda. (Nki 10:15; Mul 7:12) Biabia, sunga bibabidi bipushene na mpango ya Yehowa ya’shi bena Isalele bekale na bupeta ku mudimo wabo wi bukopo (tala Nki 6:6-11; 20:13; 24:33, 34), baadi dingi muibadimushe pabitale masaku a kumuilua aye baadi Nsulo ya bupeta buabo na kubanga kukulupila mapeta aabo. (Miy 8:7-17; Mis 49:6-9; Nki 11:4; 18:10, 11; Yel 9:23, 24) Abaadi bebatentekieshe’shi mapeta nga penda kapindi kapeela (Nki 23:4, 5), ta mbalombene kuiapa Efile Mukulu bua kukuula muntu ku lufu (Mis 49:6, 7), na taabadi na muulo kui bantu bafue (Mis 49:16, 17; Mul 5:15). Abaadi bebaleshe’shi kuata mapeta na muulo ukilekile kubaadia kuibatakula mu kukita mianda ya kukutua kululama na kukutua kukuminyibua na Yehowa. (Nki 28:20; tala Yel 5:26-28; 17:9-11.) Abaadi dingi banyingishibue bua “kutumbisha Yehowa na bintu [biabo] bia muulo.”—Nki 3:9.
LUBINGO LUA LUA 17-23/6
BUPETA BUA MUIYI DI’EFILE MUKULU MISAMBO 51-53
Kia kukita bua kusuuka kukita miluisho
We mulombene kubamba eshimba dyobe naminyi?
4 Mu Nkindji 4:23 mwaku “eshimba” mbeutemune bwa kulesha “muntu e munda” sunga “mpàngo ifwame. (Badika Misambo 51:5) Mu bingi bishima, “eshimba” adilesha binangu byetu, byatupusha, akitutakula mu kukita myanda, na nkalo yetu. Nyi mbyatudi munda mwetu, ta mbyatumweneka ku meso a bantu nya.
5 Banda kutala mushindo wi mbidi yetu ayilesha byatudi munda mwetu. Kya kumpala, bwa kulama mbidi yetu kalolo atusangulaa bidibwa abiyinyingisha na kukitanga kalashishi. Bi mumune bwa kulama eshimba dyetu dya mu kifwanyi kalolo, bibuwa twikale atubadika Bible na mikanda ayipatula Bible na kuleshanga nsaa yoso’shi twi na lukumino mwi Yehowa. Atulesha lukumino mwi Yehowa nsaa yatutumikila myanda yatulongo na kwakula pabitale lukumino lwetu. (Beena-Looma 10:8-10; Shake 2:26) Kya kabidi, muyile byatumweneka ku meso a bantu, twi kupwandikisha’shi twi na mbidi bukome sunga twekala na mukumbo munda. Bi mumune, muyile byubishi byetu bya mu kikudi, twi balombe kupwandikisha’shi lukumino lwetu ndunyingye, aku na mu nkalo ibubi i munda mwetu. (1 Beena-Kodinda 10:12; Shake 1:14, 15) Abitungu tutentekyeshe’shi Satana e na lukalo lwa kwitulwisha na binangu bibubi. Mmushindo kinyi wadi mukumbene kutompa kwibikita? Na twi balombene kwikalwila naminyi?
Twi balombeene kushaala beselele
5 Mushindo umune wa kuleesha’shi twi bakulupile kwi Yehowa n’eshimba dimune, nkumuleesha mu luteko by’atwitatshisha bwa kukatusha binangu bibubi. Nsaa yatwifubwila peepi na Yehowa mu luteko, aye namu efubwila peepi neetu. Na kalolo kooso etupa kikudi kyaye, akitukwasha bwa kunyingisha kitshibilo kyetu kya kukambila binangu bibubi na kushaala beselele. Byabya tulunguleyi Yehowa lukalo lwetu lwa kumusankisha na myanda yatunangusheena mu mashimba eetu. (Mis. 19:14) Tumutekyeyi bwa’shi ataluule mashimba eetu bwadya kutundula “eshinda [dyooso] dii masaku” —lwabi sunga binangu byooso bibubi—mbikumbeene kwitutakula ku mulwisho. (Mis. 139:23, 24) Tumutekyeyi efuku dyooso bwadya kwitukwasha bwa kulama lulamato lwetu nsaa yatudi kumpala kwa kitompwanga.—Mat. 6:13
6 Kipaso kyabadi betukushe na mwikeelo wetu wa kala wi bya kutamisha mwatudi lukalo lwa kukita myanda yabadi bapele kwi Yehowa. Sunga mbyabya, e bya kwitukwasha bwa kushintuluka bwa’shi tumone bya kumufubila. Nfumu Daviide baadi mushinkamishe uno mwanda. Kunyima kw’aye kutambuka lusandji na Betsabee, batekyele Yehowa’shi: “Panga eshimba diiselele munda mwande; otweshe munda mwande kikudi kipya.” (Mis. 51:10, 12) Kinangu kya kukita mulwisho nkilombeene kukaka mbidi yeetu ibofule, kadi Yehowa e kwituwusha na kinangu kya kumukookyela. Sunga lwabi lwibubi ndupalakane na alukyebe kushimisha bwiselele bwetu bwa mu binangu, Yehowa e kwitukunkusha bwa’shi tukookyele miiya yaaye na kwikala na nshalelo mwipusheene nayo. E kwitukwasha dingi bwa kukambila mwanda ooso ulombeene kwitukabila.—Mis. 119:133.
Mabue a muulo a mu kikudi
it-1-F 663
Doege
Baadi muina Edome, mulami mukata a mikooko ya Nfumu Saule, baadi na mudimo ukata wa bukunkushi. (1Sam 21:7; 22:9) Kushi mpaka Doege baadi mukumiine malongiesha a bena Yunda. Pa muanda baadi “mulamue kumpala kua Yehowa” ku Nobe, pangi pa muanda wa mutshipo, butete sunga pangi bua nsudi. Kuakua, Doege bamuene Tshite muakuidi mukata Ahimeleke apa Davide mikate ya kulesha na lupete lua ngoshi lua Goliate. Kunyima, pabaadi Saule mulungule bafubi baye’shi bakuete kumudiila lukuku, Doege baadi muakule bioso bibaadi mumone ku Nobe. Kunyima kuaye kuitamisha tshite muakuidi mukata na bangi ba tshite muakuidi ba ku Nobe, na kunyima kua kuela Ahimmeleke nkonko, Saule baadi mutume eyi bua’shi bebayipee. Bu bibaadi bantu baaye bapele, kuiyi dia Saule Doege baadi muipee kushi kuikoka ba tshite muakuidi 85. Kunyima kua bino, Doege baadi mubutule kibundi kia Nobe, nkuipaa bantu boso, bana, bantu banunu mpa na bimunuanga biabo.—1Sam 22:6-20.
Nka bu abibilesha Misambo 52, Davide baadi mufunde pabitale Doege, amba’shi: “Edjimi dyobe ndjisambulwe nka bu bwembe, we mufule kuisamba bi bubi kukila bi buwa, kudimba madimi namu pe kuakula bia binyibinyi, we mufule’nyi yoso ayilwîshaa bantu mashimba, mulamalama’be!”—Mis 52:2-4.
LUBUNGO LUA 24-30/6
BUPETA BUA MUIYI DI’EFILE MUKULU MISAMBO 54-56
Efile Mukulu e ku lupese loobe
w06-F 1/8 22 ¶10-11
Ikala na binangu: Tshina Efile Mukulu!
10 Ungi musango, Davide baadi musukile kui Akishe mu Gate, kibundi kia bena Filistine, mubaadi mutandikilue Goliate. (1 Samuele 21:10-15) Bafubi ba Nfumu abaadi bamulungule’shi Davide muishikuanyi a kibundi kiabo. Nkinyi kibaadi kikite Davide mu uno muanda wi bukopo? Baadi mufunguile Yehowa eshimba diaye mu luteko. (Misambo 56:1-4, 11-13) Sunga bibaadi muidimbe bu kitesha, Davide baadi aukushi Yehowa nyi baadi mumupaashe pa kumuelela miabi bua kuikitshisha kuaye. Davide baadi muleshe’shi atshinyi Efile Mukulu binyibinyi pa kumukulupila n’eshimba diaye dioso.—Misambo 34:4-6, 9-11.
11 Nka bu Davide, atulesha’shi atutshinyi Efile Mukulu pa kukulupila mu mulayilo waye wa kuitukuasha bua kunyingiila nkalakashi. Davide bambile’shi: “Tûla myanda yobe yôso mwi Yehowa, mukulupile ê namu akakukwasha.” (Misambo 37:5) Bino t’abikiebe kulesha’shi atutuulu mianda yetu yoso mu masa a Yehowa kadi kushi kukita kintu, na kukulupila’shi etukuasha. Davide ta baadi mutekie Efile Mukulu bukuashi kushi kukita kintu. Baadi mufubishe binangu na ngobesha ibaadi Yehowa mumupe bua kumona bia kukila na lualua lukalakashi. Anka Davide baadi auku’shi ta penda mu kuikitshisha kuaye kubaadia kobesha. Nyi mueneno atungu’shi tuikale naye natue namu. Tukite kiakia kiatudi na ngobesha ya kukita, akupu tulekie mianda mu masa a Yehowa. Anka misango i bungi, tui kukutua kia kukita, biabia abitungu tukulupile kui Yehowa. Mu nsaa i bino, nyi amutungu’shi muntu na muntu ekale atshinyi Efile Mukulu pa bupenka buaye. Tuikunyingishibua na ano mayi a Davide, bambile’shi: “Yehowa nyi nkuku a kifulo a baba abamutshînyi.”—Misambo 25:14.
Takwi kintu kilombeene “kwitulamuna ku kifulo ky’Efile Mukulu”
9 Yehowa asangalaa dingi na kunyingiila kwetu mu nkalakasho. (Mateo 24:13) Tentekyesha shi Satana akimbaa mwaye mooso bwa kwitupambusha kwi Yehowa. Efuku dyooso dyatushaala na balulame kwi Yehowa, atumupaa mushindo wa kwaluula kwi yawa kwete kumupeesha. (Myeele 27:11) Ingi nsaa kunyingiila mu nkalakasho ta kubofule nya. Nkalakasho ya ku mbidi, kukutwa kwa makuta, kukalakashibwa mu binangu, na ingi myanda yatukwete kufumankana nayo ngilombeene kwikasha efuku dyooso adikidi bu kitompwanga kwatudi. Kukulupila kintu kyatushapetele nkulombeene kwitukookyesha kwishimba. (Myeele 13:12) Kunyingiila kwetu mu ino nkalakasho i bino akusangasha eshimba dya Yehowa. Nyi bwakinyi Daavide baadi mutekye kwi Yehowa bwashi atengyeleshe mpolo yaaye “mwilondo,” nkukumbasha dingi shi: “Tambifundwe mu mbadiko yoobe su?” (Misambo 56:9) Oolo, Yehowa alamaa kalolo mpolo yooso yatukwete kutuusha na makyenga ooso atukwete kukambila bwa kushaala balulame kwadi. Byabya bi na muulo ku meso kwaye.
Mushindo awitukuasha kifulo bua kukambila moo
16 Satana auku’shi tui bafule muwa wetu. Apuandikisha’shi, tui balombene kuleka bioso, na kipuano kietu na Yehowa bua kukaluila muwa wetu. (Yob. 2:4, 5) Satana e bubi ngofu! Na dingi, aye ngi muikale na “matalwa a lufu,” satana kuete kutompa kufubisha moo wa lufu watudi nao bua’shi tusumbusheene Yehowa. (Eb. 2:14, 15) Misuusa i bungi, bantu ba Satana bakuete kuipaa balanguidi ba Yehowa, muanda bakuete kupela kuleka lukumiino luabo. Mu ingi mianda, mmulombene kukimba bia kuitobesha nsaa yatukiebe kubukibua bikishekishe su tui na mukumbo wa lufu, akiebe’shi atue tulekie kukookiela abiamba Yehowa. Munganga sunga mungi muina kifuko shii mulanguidi a Yehowa, mmulombene kuitukitshisha pa bukopo buatudia kukumiina’shi betuele mase, aku bino nkuipa muiya w’Efile Mukulu. Mungi muntu, mmulombene kutompa kuitukuminyisha ungi mushindo wa kubukiibua wi kutuene na mayi a kulonda a mu Bible.
17 Sunga biatusha atukumiinaa lufu, atuuku’shi Yehowa t’analekie kuitufula nya sunga tuafua. (Badika Bena-Looma 8:37-39.)Nsaa ayifu bakuuku ba Yehowa, abashaalaa mu binangu biaye nka bu bakii na muwa. (Luk. 20:37, 38) Akumiina kebabusha dingi bua kuibapa muwa. (Yob. 14:15) Yehowa baadi mutuushe kintu ki na muulo ukata bua’shi tuikale “na muwa wa iikalayika.” (Yo. 3:16) Atuuku mushindo wi bukata bui kifulo kia Yehowa kuatudi na bi’etupasukilaa. Pamutue pa kusumbusheena Yehowa nsaa yatudi na mukumbo sunga yabakiebe kuituipaa, tui balombene kukulupila kuadi buatudia kupeta kunyingishibua, binangu, na bukome. Bino ngi bibakitshine Valérie na mulume aaye.—Mis. 41:3.
Mabue a muulo a mu kikudi
it-2-F 646
Kubadiila kuuka mianda ishakitshikile, kubadiila kulumbuula mianda
Bulamalama bua Yundasa Iskariote bubaadi bulombashe matemuki a Efile Mukulu na kulesha ngobesha ya Yehowa na ya muan’aye Yesu ya kubadiila kuuka mianda ishiakitshikile. (Mis 41:9; 55:12, 13; 109:8; Bik 1:16-20) Anka, ta tui kuamba’shi Yehowa badi mubadiile kulumbuula’shi Yundasa akekala na uno muikelo. Matemuki abaadi apue kulesha’shi kuuku aaye a p’eshimba nyi akamupaana, kadi taabaadi aatemuna eshina dia yawa muntu. Pano dingi, mayi a kulonda a mu Bible aalesha’shi Efile Mukulu ta baadi mubadiile kulumbuula bikitshino bia Yundasa. Mpoolo mutumibua baadi muakule eyi diyokielue adiamba’shi: “Totentekanga muntu su ngumune maasa bukidibukidi; totuelakananga mu miluisho ya bangi bantu, elame kushi kalema.” (1Ti 5:22; tala 3:6.) Buakulesha’shi baadi na lukalo lua kusangula kalolo batumibua baye 12, Yesu baadi mukishe bufuku bushima mu kuteka na kuukisha Nshaye kumpala kua kuata kitshibilo. (Luk 6:12-16) Su abaadi babadiile kulumbuula Yundasa bua kupaana Yesu, bukunkushi na buludiki bua Yehowa ta bubaadia kuikala buwa, na muyile muiya, bibaadia kuikasha Efile Mukulu bu bakuatshishena Yundasa mu kukita muluisho.
Abimueka’shi nsaa ibabaadi basangule Yundasa bu mutumibua, eshimba diaye ta dibaadi na kitunduilo kia bulamalama su nkipeela. Baadi mutadiile ‘mushi wa lulengo wamena,’ na kumuikasha butete, bu kipeta aye nkupambuka, nkupela kukumiina bukunkushi bu’Efile Mukulu, kadi aye nkukumiina bua’shi Satana amukunkushe, bino nkumutakula mu kuiba na kumuikasha bu sha mpala ibidi. (Eb 12:14, 15; Yo 13:2; Bik 1:24, 25; Yak 1:14, 15; tala YUNDASA No. 4.) Pa baadi apende na kutama kuno kupambuka, Yesu baadi mulombene kubadika muishimba na kuuka yawa akamupaana.—Yo 13:10, 11.