Mushindo ulombene nkukwasha nteko

Pamela pabadi na mukumbo wi bukopo bakimbile bukwashi bwa munganga. Na dingi baadi mutekye Efile Mukulu bwashi amupe bukome bwa kunyingila ku nkalakashi yaaye. Luteko lubamukwashishe su?

Pamela alesha’shi: “Pababadi abambuku mukumbo wa cancer nadi napusha moo ukile. Anka pa naadi nele nteko kwi Yehowa Efile Mukulu, naadi napusha butaale na naadi na mushindo wa kwela binangu kalolo. Naadi mutungunukye na kukyenga na uno mukumbo ushawupu, anka luteko lubaadi alunkwasha ngofu bwandya kwikala na mweneno e buwa. Pababadi abanyipusha kwi bantu bya mpusha, naadi nebalula’shi ntampusha bi buwa nya anka nena muloo!”

Byabya, tabitungushi tutengyele apetukwata mukumbo wi bukopo nyi tutekye nya. Oso akwatudi apetaa nkalakashi ikata sunga i pela, na twi na lukalo na bukwashi bwa kwiyinyingila. Luteko lwi nkukwasha su?

Bible amba’shi: “Tuula myanda yobe yooso kwi Yehowa e namu akakukwasha, takumina’shi baaba abamukokyela bapone ooo.” (Misambo 55:23, EEM) Bino abinyingisha ngofu! Byabya luteko ndulombene nkukwasha naminyi? Nsaa yotekye Efile Mukulu mu mushindo wi buwa, akakupa kyodi nakyo lukalo bwa kunyingila nkalakashi yoobe.—Tala kashibo akamba’shi “Kilombene kwitutwadila nteko.”

Kilombene kwitutwadila nteko

Butaale bwa mu binangu

“Anka, nguba ooso, mu nteko, mu kwiyaaya na mu ntumbu, uukishaayi Efile Mukulu nkalo yeenu. Naa butaale bw’Efile Mukulu abo butabukile binangu byooso, abulama mashimba eenu na binangu byeenu munda mwa Yesu Kidishitu.” (Bena-Fidipe 4:6, 7) Nsaa yolungula Efile Mukulu myanda yobe yooso akukwasha bodya kwikala na butale na bodya kukita myanda na binangu nsaa yoodi mu nkalakashi.

Binangu abifiki kwi Efile Mukulu

“Su umune a kwanudi mmukutwe binangu, eebitekye kwi Efile Mukulu ebipeeyaa boso, mu kwiyisha, dingi kushi kutopeka.” (Shake 1:5) Nsaa yatudi mu nkalakashi i bukopo kebungi tatwataa bitshibilo bi buwa nya. Su oteka binagu, Efile Mukulu mulombene nkukwasha, bwa kutentekyesha mayi a kulonda alombene nkukwasha e mu Bible Eyi dyaye.

Bukome na kunyingishibwa

“Ne mulombeene kukita bioso [mu bukwashi bwa] yawa ankankamika.” (Bena-Fidipe 4:13, Kilombeeno kipya 2014) Bu byadi Efile Mukulu sha bukome boso, Yehowa mulombene nkupa bukome boodi nabo lukalo, bwa kunyingila mu nkalakashi yoobe sunga nkukwatshishena mu mpombo yoobe. (Yeeshaya 40:29) Bible ayitanyina dingi Yehowa bu “Efile mukulu sha kusambana mu byoso.” Mulombene kwitusamba mu “malwa eetu oso.”—2 Bena-Kodinda 1:3, 4.