MUSHINDO WA KUKAMBILA MUSHIKUA

4 | Kambila Mushikua Ku Bukuashi Bu’efile Mukulu

Bible amba’shi:

“Anka talayi kikuba kya kikudi: kifulo, muloo, butaale, lwishinko, kalolo, buuwa, lukumiino, kwiyeesha, butontshi bwa mbidi.”—BENA-NGALATEA 5:22, 23.

Ki’abipatuula:

Mbibofule bua kukambila mushikua ku bukuashi bu’Efile Mukulu. Kikudi kiaye kiselele nkilombene kutuusha muatudi ngikashi yatushii balombene kupeta mu’tue banabene. Biabia pamutue pa kutompa kukambila mushikua mu’tue banabene, bi buwa tutuule lukulupilo mu bukuashi buabatuusha kui Efile Mukulu. Su tubakitshi biabia atupusha nka bibapushishe Mpoolo mutumibua, pabaadi mufunde’shi: “Nemulombeene kukita bioso [mu bukwashi bwa] yawa ankankamika.” (Bena-Fidipe 4:13) Na, tui balombene kuamba’shi: “Bukuashi buande abutuukila kui Yehowa.”—Misambo 121:2.

Kiodia kukita:

“Yehowa mmushintuule naleka kuikala muntu sh’etombo nafika muntu a butaale.”—WALDO

Ela luteko kui Yehowa, omutekie n’eshimba diobe dioso buadia nkupa kikudi kiaye kiselele. (Luka 11:13) Mutekie akukuashe oleshe ngikashi yaaye mu muwa oobe. Longa akiamba Bible pabitale ngikashi ayikuasha bua kukatusha mushikua, kifulo, butaale, luishinko, butontshi bua mbidi. Kimba mushindo odia kupeta ino ngikashi mu nshalelo oobe. Na webungie pamune na bantu abakumiina kulesha ino ngikashi. Ba kuuku be bino abakukuasha “[kukunyingisha] mu kifulo na mu mifubo ibuwa.”—Bena-Ebelu 10:24.

Muanda ukitshikie—WALDO

Mmukambile mushikua wi bukopo

Waldo baadi na nshalelo e bukopo pabaadi akulu, baadi na mushikua ukile bukopo. Amba’shi: “Naadi nka naalu ngoshi mu kilayi na bantu abaudishaa bintu abikolanaa . . . Ungi musango, kingi kisaka kia ba ntomboshi kibaadi kifute mungi ntomboshi buadia kungipaa, kadi naadi mukite muande mooso bua kusuuka kunyima kua’bo kuntapa kapete.”

Waldo tabaadi musankie nsaa ibabangile mukashi aaye kulonga Bible na Tumonyi tua Yehowa nya. Amba’shi: “Naadi mushikue Tumonyi ngofu, na misango i bungi naadi nebakula bishima bi bubi. Anka abaadi abangaluula na butaale booso.”

Kunyima kua mafuku, Waldo namu babangile kulonga Bible. Amba’shi: “Tabibaadi bibofule buandia kutumikila mianda inaadi nalongo. Naadi mushinkamishe’shi bi bukopo buandia kushintuula etombo dinaadi nadio.” Anka kingi kintu kibaadi mulongie mu Bible kibaadi kimushintuule ngofu.

Waldo apatuula’shi: “Dingi efuku, Alejandro baadi alongo nami Bible, bantekiele buandia kubadika Bena-Ngalatea 5:22, 23. . . . Alejandro baadi mupatuule’shi ino ngikashi ntshi mulombene kuiyipeta mu’mi nabene nya, anka abitungu bukuashi bua kikudi ki’Efile Mukulu. Wawa muanda wa binyibinyi ubaadi ushintuule mmueneno ande!”

Pa kutuula lukulupilo mu bukuashi bu’Efile Mukulu, Waldo baadi moobeshe kukambila mushikua mu nshalelo aaye. Amba’shi: “Bena kifuko nami na ba kuuku bande abakaanya p’abamono biandi mushintulukie.” Amba dingi’shi: “Yehowa mmushintuule naleka kuikala muntu sh’etombo nafika muntu a butaale.”