Yehowa atalaa muilo waye ooso

1. Buakinyi Yesu batekiele Yehowa buadia kutala balongi baaye?

BUFUKU kumpala kua’shi afue, Yesu baadi muele luteko lui pabualo kui Nshaye e muiyilu. Batekiele Yehowa bua’shi alame balongi baaye. (Yo. 17:15, 20) Biabia, Yehowa atalaa, apasukilaa na kulama muilo waye. Biabia Yesu baadi muukie’shi balongi baaye abakafumankana na buluishi bukata, abutukila kui Satana. Yesu baadi muukie dingi’shi, be na lukalo na bukuashi bua Yehowa buabadia kukambila buluishi bui bubi bua Diabulu.

2. Muyile Misambo 33:18-20, buakinyi t’abitungu tutshiine nkalakashi?

² Mu ino nsenga yabakuete kukunkusha kui Satana, mui nkalakashi i bungi ikuete kufuila bena Kidishitu ba binyibinyi lelo uno. Tukuete kupeta nkalakashi ilekeenelekeene ilombene kuitutshobolosha na kutompa lulamato luetu kui Yehowa. Anka bu biatukebimono mu uno muisambo, ta tutshinyi kintu su nkimune, Yehowa kuete kuitumona atue booso. Amonaa nkalakashi yatukuete kufumankana nayo, na akumiina kuitukuasha buatudia kuiyinyingiila. Tutaleyi bileshesho bibidi bia mu Bible, abilesha mushindo wi Yehowa “atalaa baaba booso abamutshinyi.”​—Badika Misambo 33:18-20.

YEHOWA ETUKUASHA NSAA Y’ATUIPUSHA BU BE BUPENKA

3. Nsaa kinyi yatudi balombene kuipusha bu be bupenka?

³ Sunga tuekala mu kifuko kikata kia balanguidi neetu, ingi nsaa tui kuipusha bu be bupenka. Bu kileshesho, ba nsongua be kuipusha bu be bupenka nsaa y’abapatuula bi lukumiino luabo kumpala kua bena kalasa nabo mu kalasa, sunga nsaa yabafiluka bua kuenda mu kakongie kapia. Bangi ba kuatudi be kuipusha bi bubi sunga’shi mbalombene kuikitshisha bua kukambila binangu bi bubi na kunangushena’shi mbalombene kunyingiila biabepusha abo banabene. Tui balombene kuitutuusha bua kulungula bangi biatuipusha, muanda atunangusheena’shi ta mbalombene kuitupusha, na ingi nsaa tui balombene kuiyipusha su kui muntu mulombene kuitupasukila binyibinyi. Kuipusha bu be bupenka nyi nkabingilo kamune kalombene kuitutakula mu kupuandikisha’shi ta kui muntu akuitukuasha, na bi kuituinyongosha. Yehowa takumiina’shi tuipushe mu uno mushindo nya. Buakinyi tui kuakula bino?

4. Buakinyi mutemuki Eliya bambile’shi: “Naashaala’mi buupeenka”?

⁴ Tubandeyi kutala kileshesho kia Eliya muntu sha lulamato. Baadi asuuku bua kupaasha muwa waye munda mua mafuku akile pa 40, pabaadi Yesabele muele mutshipo wa ku muipaa. (1 Bf. 19:1-9) Ku mfudiilo a bioso, pabaadi bupenka mu lubuebue, balunguile Yehowa’shi: “Naashaala’mi [mutemuki] buupeenka.” (1 Bf. 19:10) Kubaadi bangi batemuki pa nsenga, Obadia baadi mupaashe bangi batemuki lukama babaabadi abakiebe kuipaa kui Yesabele. (1 Bf. 18:7, 13) Buakinyi Eliya baadi muipushe bu e bupenka? Baadi anangushena’shi batemuki booso babaabadi bapaashe kui Obadia mbapue kufua su? Baadi muipushe bu e bupenka muanda bangi tababaadi bakile lupese luaye bua kufubila Yehowa kunyima kua kitompuanga kia Baale ku Muengie wa Karmele? Baadi mulombene kuipusha’shi, ta kui muntu auku mushindo wi masaku alombene kumufikila sunga’shi, ta kui muntu su ngumune mulombene kumupasukila? T’abapatuula mianda yoso pabitale bibaadi Eliya epusha nya. Anka kishinkamiisho kiatudi balombene kuikala nakio nkia’shi, Yehowa baadi euku bibaadi Eliya epusha bu e bupenka na baadi auku kibaadi akitungu bua kumukuasha.

5. Yehowa baadi mushinkamiishe Eliya’shi te bupenka naminyi?

⁵ Yehowa baadi mukuashe Eliya misuusa i bungi. Baadi munyingishe Eliya pa kuisamba naaye. Bayipuishe Eliya misuusa ibidi’shi: “Bwakinyi we pano?” (1 Bf. 19:9, 13) Nsaa yooso Yehowa baadi ateemesha Eliya pabaadi amufunguila eshimba diaye. Yehowa baadi aluula Eliya pa kumumuekiela na kumulesha’shi Naaye sha bukome booso. Baadi dingi mushinkamiishe Eliya’shi, kukii bena Isaleele be bungi baki’abamulanguila. (1 Bf. 19:11, 12, 18) Kushi mpaka, Eliya baadi mupushe butaale kunyima kua kufunguila Yehowa eshimba na kupusha biamualuula. Yehowa bapeele Eliya midimo i bungi i na muulo ukata. Baadi mu mulungule buadia kuela Azaele muimu bu mfumu a mu Siiri, Yehu namu bu mfumu a Isaleele mushima, na Elisha bu mutemuki. (1 Bf. 19:15, 16) P’aye kupa Eliya ino midimo, Yehowa baadi mumukuashe bua kutuma binangu biaye ku mianda i buwa. Efile Mukulu baadi mumupe dingi kuuku aaye e buwa, Elisha. Mmushindo kinyi odi mulombene kupeta bukuashi bua Yehowa nsaa yuepusha bu e bupenka?

6. Nkinyi kiodi mulombene kuteka nsaa yuepusha bu e bupenka? (Misambo 62:8)

⁶ Yehowa akumiina’shi omutekie. Yehowa kuete amono mianda yokuete kunyingiila, na akushinkamiisha’shi ateemesha nteko yoobe nsaa yoso. (1 Tes. 5:17) Ekalaa na muloo p’ateemesha bafubi baye. (Nki. 15:8) Nkinyi kiodi mulombene kuteka nsaa yuepusha bu e bupenka? Funguila Yehowa eshimba diobe bu bibakitshine Eliya. (Badika Misambo 62:8.) Mulungule mianda yoobe na mushindo wayikukalakasha. Teka Yehowa akukuashe, bua’shi oukie kiodi mulombene kukita pu’epusha bu e bupenka. Bu kileshesho, su wepusha bu e bupenka, na we na moo bua kulungula mukandu wi buwa ku kalasa, teka Yehowa akupe eshimba dinyingie diodi nadio lukalo bua kuakula. We mulombene kuteka Yehowa, binangu bua’shi opatuule bi lukumiino loobe na kaneemo. (Luk. 21:14, 15) Su okuete kulua na binangu bi bubi, teka Yehowa akukuashe bodia kulungula muina Kidishitu munyingie mu kikudi pabitale uno muanda. Teka Yehowa akukuashe opete muntu odia kulungula, akuteemesha. Funguila Yehowa eshimba diobe, na omone mushindo waluula ku nteko yoobe na okumiine bukuashi bua bangi, biabia tokamba kuipusha bu be e bupenka nya.

7. Nkinyi kiodi mulombene kulongiela ku kileshesho kia Mauricio?

⁷ Yehowa mmuitupe atue booso mudimo wi buwa wa kukita. Yehowa ataa kiakia kioso kiokuete okitshi na muulo bua kulombasha mudimo oobe, mu kakongie na mu bulungudi. (Mis. 110:3) Kushaala muipaane mu uno mudimo nkulombene nkukuasha naminyi nsaa yuepusha bu e bupenka? Tubandeyi kutala kileshesho kia ungi mukuetu mulume nsongua abetanyina bu Mauricio.b Mafuku apeela kunyima kua Mauricio kubatshishibua, umune a ku ba kuuku baaye babangile kukatuka ku kapeelakapeela mu bia binyibinyi. Mauricio amba’shi: “Nsaa inamumuene asumbushena Yehowa, napushishe bi bubi. Naadi neyipusha su ne mulombene kulombasha mutshipo wande, na kushaala mu kifuko kia Yehowa. Naadi nepusha bu e bupenka na binangu bia’shi ta kui muntu mulombene kupusha binaadi nepusha.” Nkinyi kibaadi kikuashe Mauricio? Amba’shi: “Naadi nakisha nsaa i bungi mu bulungudi.” Akula dingi’shi, “Kukita bino nkukuashe bua kuleka kunangusheena penda pa bi ntale’mi nabene, na mushindo unaadi nepusha. Naadi mupushe muloo na ntshinaadi nepusha bu e bupenka bu binaadi nakitshi bulungudi pamune na bangi.” Kukatusha biabia, sunga ta tui balombene kuenda na bena Kidishitu netu mu bulungudi, tui balombene kunyingishibua pa kufunda mikanda na kukita bulungudi ku telefone pamune nabo. Nkinyi dingi kikuashe Mauricio? Alombasha dingi’shi: “Naadi na bi bungi bia kukita mu kakongie. Naadi nakitshi muande mooso bua kuilumbuula kalolo, na bua kukita midimo yabampa mu bisangilo kalolo. Ino midimo ngi kuashe bua kuipusha bu e na muulo kui Yehowa na kui bangi.”

YEHOWA ETUKUASHA NSAA Y’ATUIPUSHA BATSHOBOLOKIE NA NKALAKASHI I BUKOPO

8. Mmushindo kinyi ulombene nkalakashi i bukopo kuikala na bukitshishi kuatudi?

⁸ Atutengiela’shi mu ano mafuku a ku mfudiilo atukapete nkalakashi i bungi. (2 Tim. 3:1) Pangi mbilombene kuitukaanyisha pabitale abitufikila ingi nkalakashi na mushindo wayidi ikale. Pangi tui balombene kuikala mu lukalakashi lua kukutua makuta, na’shi be kuitulungula kui munganga’shi tui na maladi e bukopo sunga’shi, tubafuisha muntu atudi bafule. Mu kino kipungo ki bino, tui balombene kuipusha benyongole na batshobolokie, bikishekishe su tubapete nkalakashi i bukopo ilondeene musuusa umune. Tutentekie’shi Yehowa etumonaa atue booso, na’shi ku bukuashi buaye, tui balombene kunyingiila lukalakashi looso lualua luatudi balombene kufumankana nalo na kushinkamisha kooso.

9. Lesha ingi nkalakashi ibaadi ifumankane nayo Yoobo.

⁹ Tutaleyi mushindo ubaadi Yehowa mukuashe Yoobo muntu sha lulamato. Baadi mufumankane na nkalakashi i bukopo bukile mu kipungo kipeela. Dingi efuku, babalunguile Yoobo’shi nyema yaye yooso ibataata mu kaalo sunga’shi ibaafu, na’shi bafubi baye na bana baye babaafu. (Yob. 1:13-19) Kunyima kua mafuku apeela aye Yoobo kinka mu maalo, bakumbile ngofu, biulua nkumuula pa mbidi. (Yob. 2:7) Muanda waye ubaadi bubi ngofu ubafikile Yoobo mu kuakula’shi: “Tánkôkanga namu, tankyebe kwikadidîla na mûw’ami.”​—Yob. 7:16, EEM.

10. Mmushindo kinyi ubaadi Yehowa mupe Yoobo kibaadi nakio lukalo bua kunyingiila nkalakashi yaaye? (Tala kifuatulo ki ku kipusu.)

¹⁰ Yehowa baadi atala Yoobo. Muanda Yehowa baadi mufule Yoobo, baadi mumupe kioso kibaadi nakio lukalo bua kunyingiila nkalakashi yaaye na kushaala na lulamato. Yehowa besambile na Yoobo, atentekiesha Yoobo bi binangu biaye bishi mpuilo na biapasukilaa bipangua biaye na kifulo. Amulungula pabitale nyema i bungi yakukanya. (Yob. 38:1, 2; 39:9, 13, 19, 27; 40:15; 41:1, 2) Yehowa baadi dingi mufubishe mungi nsongua sha lulamato abetanyinaa bu Eliwu bua kusamba na kunyingisha Yoobo. Eliwu baadi mumushinkamiishe’shi, Yehowa afutaa balanguidi baye misuusa yoso, bua kunyingiila kuabo. Na dingi, Yehowa baadi mufubishe Eliwu, buadia kupa Yoobo dingi elango dia kifulo. Eliwu baadi mukuashe Yoobo bua kuleka kunangusheena ngofu pa bimutale aye nabene, na kumutentekiesha’shi, atue booso tui bapeela patuipuandikisha na Yehowa Mupangi a eyilu na nsenga. (Yob. 37:14) Yehowa bapeele dingi Yoobo mudimo wa kutekiela baaba ba kuuku baye ba madimi basatu, babaadi bakite muluisho. (Yob. 42:8-10) Mmushindo kinyi ukuete Yehowa kuitukuatshisheena lelo uno, nsaa y’atupete nkalakashi i bukopo?

11. Mmushindo kinyi ulombene Bible kuitukuasha patudi mu nkalakashi?

¹¹ Yehowa t’esambaa netu bu bibaadi muisambe na Yoobo nya, anka, esambaa neetu ku bukuashi bua Eyi diaye, Bible. (Lom. 15:4) Etunyingisha pa kuitupa lukulupilo lua mafuku aafiki. Tubandeyi kutala binangu bipeela abituukila mu Bible bilombene kuitunyingisha nsaa yatudi mu nkalakashi. Mu Bifundue Yehowa etushinkamiisha’shi ta kui kintu sunga nkalakashi i bukopo ‘kilombene kuituabuula ku kifulo [kyaye].’ (Lom. 8:38, 39) Etushinkamiisha dingi’shi: “E peepi na baaba booso abamuididi,” mu nteko. (Mis. 145:18) Yehowa etulungula’shi su tubakulupila muadi, tui balombene kunyingiila lukalakashi looso lualua, na kuikala na muloo sunga tuakienga. (1 Kod. 10:13; Shak. 1:2, 12) Eyi di’Efile Mukulu aditushinkamiisha dingi’shi nkalakashi yatudi nayo ngia kapindi kapeela, nsaa y’atuiyipuandikisha na miabi ya losoo y’aketupa. (2 Kod. 4:16-18) Yehowa akabutula baaba booso bakuete kuitufuishisha nkalakashi i bukopo, mu baaba booso mui Satana diabulu, na baaba bantu be bubi be buye. (Mis. 37:10) Bolamiina angi ma verse a mu Bible aa kukankamika, na alombene nkukuasha bua kunyingiila nkalakashi ya mu mafuku aafiki su?

12. Yehowa atengiela’shi tukite kinyi su atukumiina’shi Eyi dyaye ditukuashe?

¹² Yehowa atengiela’shi tuikale atuiatshila nsaa ya kuibadikila Bible pa kiubishi, na kunangusheena ngofu pabitale biatubadika. Nsaa yatutumikila biabia biatulongo, lukumiino luetu alunyisha kunyinga, na atunyiisha kuifubuila peepi na Nshetu e muiyilu. Bu kipeta, atuikala na bukome bua kunyingiila nkalakashi. Yehowa apa dingi baaba bakulupile Muiyi dyaye kikudi kiaye ki selele. Na kino kikudi kiaye akitupa “bukome bushii bwa kupwandjikisha nabo kintu” bua kunyingiila lukalakashi looso lualua.​—2 Kod. 4:7-10.

13. Bidibua biabatusha kui “mpika a lulamato na mudimukie” abitukuasha bua kunyingiila nkalakashi yetu naminyi?

¹³ Ku bukuashi bua Yehowa, “mpika a lulamato na mudimukie,” kuete kutusha miisambo i bungi, ma video, ngono ilombene kuitukuasha bua kunyingisha lukumiino luetu na kushaala bapasukie mu kikudi. (Mat. 24:45, NWT) Abitungu tuikale atufubisha bino bintu bioso biabetupa kui Yehowa kalolo. Ungi mukuetu mukashi mufikie mu États-Unis binobino, aleesha lutumbu luaye lukata bua bino bidibua bia mu kikudi amba’shi: “Munda mua bipua 40, biandi mufubile Yehowa, lulamato luande ndutompibue misuusa na misuusa.” Baadi mufumankane na nkalakashi i bukopo bukile. Nshaye kulu baadi muipayibue na shofere mukolue, nshaye namu baadi mukumbe maladi e bukopo aye nkufua, n’aye nabene namu babamukuatshile na Cancer misuusa ibidi. Nkinyi kibamukuashishe bua kunyingiila? Aye nabene apatuula’shi: “Yehowa baadi ampasukila misuusa yooso. Bidibua bia mu kikudi bibaadi ampa ku bukuashi bua mpika a lulamato na mudimukie, bibaadi abinkuasha bua kunyingiila. Pa muanda wa bino bidibua, ne mulombene kuipusha nka bibapushishe Yoobo, pabakuile’shi: ‘Mpaa na pa nkafuila, nalama kululama kuande!’”​—Yob. 27:5, NWT.

14. Yehowa mmufubishe balanguidi neetu bua kuitukuatshisheena mu kipungo kia nkalakashi naminyi? (1 Bena-Tesalonika 4:9)

¹⁴ Yehowa kuete kulongiesha muilo waye bua kuifuleena na kuinyingisheena ku muntu na muntu kipungo kia nkalakashi. (2 Kod. 1:3, 4; badika 1 Bena-Tesalonika 4:9.) Mu kuambula kua Eliwu, bakuetu balume na bakashi be kuanka bua kuitukuasha, bua’shi tushale na lulamato nsaa y’atupete nkalakashi i bukopo. (Bik. 14:22) Bu kileshesho, tubandeyi kutala kakongie ka Diane bibakadi kamunyingishe, na ku mukuasha bua kushaala munyingie mu kikudi, kunyima kua mulume aaye kupeta mukumbo wi bukupo. Amba’shi: “Bibaadi bukopo bukile. Anka naadi mupushe bi bukome bua mboko ya Yehowa na kifulo kiaye mu kino kipungo ki bukopo. Kakongie ketu kabaadi kakite mianda i bungi bua kuitukuasha. Babaadi betutembele, kuitubasha ku telefone, na kuituanya biipa. Bino bioso bibaadi bitukuashe bua kunyingiila. Kubanga nka paapa, ntshinaadi na mushindo wa kutambusha mootoka, anka bakuetu balume na bakashi babaadi ba nshinkamiishe’shi, ne kupeta mushindo wa kuenda mu bisangilo na kuenda mu bulungudi nsaa yandi nabio lukalo.” Nyi mmuabi ukata wa kuikala mu kino kifuko kia mu kikudi, ki na kifulo!

TUI NA LUTUMBU LUKATA BUA ABITUPASUKILA YEHOWA NA KIFULO

15. Buakinyi tui balombene kushinkamisha’shi, tui kukambila ino nkalakashi yooso?

¹⁵ Atue booso tukuete kufumankana na nkalakashi ilekeenelekeene. Anka bu biatudi bebilongie, nsaa y’atupete nkalakashi, ta tui balombene kuipusha bu be bupenka nya. Nka bu Nshe baana sha kifulo, Yehowa misuusa yooso etumonaa. E ku lupese luetu, e kuanka bua kuitupusha p’atumutekie bukuashi, na e kuanka bua kuitukuatshisheena. (Yesh. 43:2) Atushinkamisha’shi tui balombene kukambila ino nkalakashi yooso, muanda kuete etupa bintu bioso biatudi nabio lukalo na kalolo kooso bua kunyingiila. Mmuitupe kia buntu kia luteko, Bible, na bidibua bia mu kikudi bi bungi, na bakuetu baasha kifulo be mu nsenga ishima buabadia kuitukuasha nsaa yatudi na lukalo.

16. Tui kushaala mu bulami bua kifulo kia Yehowa naminyi?

¹⁶ Tui na lutumbu lukata, p’atue kuikala na Nshetu e muiyilu kuete kuitutala! ‘Mashimba etu e na mulô muadi.’ (Mis. 33:21, EEM) Tui balombene kulesha Yehowa lutumbu luetu bua mushindo w’etupasukila na kifulo kioso, pa kufubisha bintu bioso biakuete kuitupa bua kuitukuasha kalolo. Na tui na dingi lukalo lua kukita muetu mooso bua kushaala mu bulami bu’Efile Mukulu. Mu ungi ngakuilo, su tubakitshi muetu mooso, bua kukookiela Yehowa na kukita mianda i buwa ku meeso kuaye, Atungunuka na kuitutala bua losoo!​—1 Mp. 3:12.