Mu nsenga ishima mui mianda ayikalakasha binangu
“Naadi nenyongola nka nsaa yooso, sunga mpa naadi nashaala nka ami nabene mu nshibo.”
“Kukiila ku mianda yandi mumone, nauku’shi nsaa yampusha muloo wi bungi, kunyima kua kapindi kapeela napushaa bubi ngofu.”
“Nekitshishaa bua kutuula binangu biande ku mianda ayikitshika efuku dioso. Anka ingi nsaa, musuusa umune napushaa tuinyongoshi pabitale ingi mianda i bungi.”
Ino mianda yooso ibatuleesha ayikatukila kui bantu be na lukalakashi lua mu binangu. Obe namu we na luno lukalakashi lua mu binangu, sunga’shi okuete kupasukila muntu e nalo su?
Shinkamisha’shi tue bupenka nya. Bantu be bungi lelo uno bakuete kupeta mianda ayibakalakasha mu binangu, biabikala abo banabene sunga bakuabo babadi bafule.
Kushi mpaka, tui bashale mu “bipungo biibukopo” abifuisha tuinyongoshi tui bungi. (2 Timote 3:1) Ungi muntu mulongie ngofu mmusangane’shi, mu nsenga ishima muntu umune pa bantu muanda kuete anyingiila lukalakashi lua mu binangu. Pa muanda wa kipupa kia Corona-Virus, bantu bakile pa 26 pa 100 mbapete tuinyongoshi tui bungi kukila mu kipua kia 2019, na bantu bakile pa 28 pa 100 mmbakiengie na maladi a mu binangu kukila mu kipua kia 2019.
Lukalakashi lua mu binangu bantu booso be nalo, ta mbakambe kuukibua kalolo nya. Anka bi na muulo bua kuuka biuepusha na abipusha bakuenu boodi mufule su nui biya.
Lukalakashi lua mu binangu nkinyi?
Poodi na binangu bishi bikalakashibue, wepusha bi buwa na mbilombene kufuba kalolo. We mulombene kukambila tuinyongoshi, ofuba kalolo, na kuikala na muloo mu nshalelo.
Muntu e na lukalakashi lua mu binangu . . .
TA nkuamba’shi muntu mubofule nya.
NDUKALAKASHI alutungu kumona munganga, muanda alufuisha tuinyongoshi tui bukopo, alukutshishua muntu kunangushena kalolo, kukutua luishinko lua mu binangu, na kuluisha muikeelo wa muntu.
Ngulombene kukutshishua muntu buadia kuikala na ba kuuku, na kukutua kukita mudimo waye w’efuku dioso.
Ngulombene kukuata bantu ba bipua bilekeene, bipikua, ekoba, tubila, bipuilo, bantu balongie na bashi balongie.
Peta bukuashi bua nkalakashi ya mu binangu
Su noobe sunga muntu oodi mufule omono’shi bashintuluka ngofu mu bumuntu buaye, bu kukutua kua kulaala kalolo, kukutua kudia kalolo, kuikala na kenyongoshi kash’akapu, sunga kupusha bi bubi nsaa yooso, we mulombene kukimba bukuashi kui ba munganga bua’shi batundule na kubuka kiinyi akifuisha lualua lukalakashi. Nkunyi koodi mulombene kuenda bua nkakimba bukuashi?
Muntu sha binangu Yesu Kidishitu pa baadi ki pano pa nsenga, bambile’shi: “Ta mbee na mbidi bukome bee na lukalo na munganga, anka baa-sha-mikumbo.” (Mateo 9:12) Baaba be na mikumbo ngi abapetaa buanga bulombene kuibabuka, na bulombene kupeelasha bitunduilo bia maladi, na kuibakuasha buabadia kuikadika na nshalelo e buwa na a muloo. Bi buwa bua bano bantu kukutua kutengiela kuibukisha su bitunduilo bia maladi bikuete kuenda na kutungunuka sunga kuenda na kutama.a
Sunga Bible ta mukanda wa ba munganga, autuushaa bukuashi bulombene kuitukuasha ku nkalakashi yeetu ya mu binangu. Atukutekie na muloo ooso, bodia kubadika ino miisambo ayilondo, ayisambila mushindo ulombene Bible kuitukuasha bua kunyingiila nkalakashi ya mu binangu.
a Kino Kitenta kia Mulami ta kituusha kubukibua kooso nya. Muntu ooso yawa abitungu apasukile mushindo w’abukibuaa kumpala kua kuata kitshibilo kia pa bupenka.