Mboko ya Yehowa ta ngiipi nya

1. Mushindo kinyi ubaadi Moyise muleshe lukulupilo mui Yehowa nsaa ibaadi mutuushe bena Isalele mu Ejipitu?

MU BANTU ba sha lukumiino babadi batemune mu mukanda wa bena Ebelu, umune a kuabadi nyi Moyise. (Eb. 3:2-5; 11:23-25) Baadi muleshe lukumiino nsaa ibaadi mutuushe bena Isalele mu Ejipitu. Ta baadi mutshiine Faraone na kiluilo kiaye nya. Baadi mukulupile Yehowa n’eshimba diaye dioso, na kusabusha muilo Kalunguka ka monga, akupu ebakunkusha mu kabaaka. (Eb. 11:27-29) Bena Isalele be bungi abaadi bakutue lukulupilo mu ngobesha ya Yehowa ya kuibapasukila, anka Moyise batungunukile na kumukulupila. Moyise baadi na kabingilo ka kukulupila Yehowa, muanda baadi mupe bena Isalele bia kudia na mema bua’shi tabafuanga mu kabaaka.a​—Efi. 15:22-25; Mis. 78:23-25.

2. Buakinyi Efile Mukulu bayipuishe Moyise’shi: “Eyasa dia Yehowa ndiipi su?” (Mbadiko 11:21-23)

² Anka, sunga bibaadi Moyise na lukumiino lui bukopo, kipua kunyima kua Yehowa kutuusha Isalele mu bupika, Moyise babangile kuiyipusha su Yehowa e na ngobesha ya kuibapa muita bu bibaadi mulee. Moyise ta baadi apuandikisha’shi Yehowa e kupa bantu midiyo muita awibalombana mu kaka kabaaka. Biabia, Efile Mukulu bepuishe Moyise’shi: “Eyasa dia Yehowa ndiipi su?” (Badika Mbadiko 11:21-23.) Kishima “eyasa dia Yehowa,” akilesha kikudi kiselele ki’Efile Mukulu, sunga bukome buaye. Binka bu’shi, Yehowa bepuishe Moyise’shi, ‘Omono’shi ntshi na bukome bua kukita kiakia kiandi mulee’?

3. Buakinyi muanda ubaadi ukitshikile Moyise na bena Isalele nguitutale?

³ Toodi muiyipushe su Yehowa alombasha nkalo yobe ya ku mbidi na ya kifuko kiobe su? Bioeyipusha sunga kukutua kuiyipusha, tutaleyi buakinyi Moyise na bena Isalele abaadi bakutue lukulupilo mu ngobesha ya Yehowa ya kulombasha nkalo yabo. Na atutaluula Bifundue abitukuasha bua kunyingisha lukulupilo luetu mui Yehowa’shi, mboko yaye ta ngiipi.

LONGIELA KUI MOYISE NA BENA ISALELE

4. Nkinyi kibaadi pangi kitakule muilo bua kuiyipusha su Yehowa alombasha nkalo yabo ya ku mbidi?

⁴ Buakinyi bena Isalele be bungi ababangile kuiyipusha su Yehowa ebapasukila? Muilo wa Isalele na “kisaka kikata kia bantu besangie” bashi bena Isalele kibakatukile mu Ejipitu, kibaadi nabo mu kabaaka munda mua mafuku bua kuenda mu Nsenga ya mulayilo. (Efi. 12:38; Det. 8:15) Kisaka kikata kia bantu besangie kibaadi kikookie kudia mana, mpa na bangi bena Isalele, na boso buabo nkubanga kuidila. (Mba. 11:4-6) Muilo ubaadi audidi kudia bidibua bibabadi nabio mu Ejipitu. Pa muanda muilo ubaadi aumuididila, Moyise baadi mumone’shi abitungu ebakimbile muita, kadi ta baadi auku kua kuiupeta nya.​—Mba. 11:13, 14.

5-6. Nkinyi kiatudia kulongiela ku bukitshishi bubaadi nabo kisaka kikata kia bantu kibaadi kisangie kui bena Isalele?

⁵ Kisaka kikata kia bantu besangie t’akibaadi na lutumbu bua bioso bibaadi Yehowa muibape, na bena Isalele nkubanga kunangushena nka bu baaba bantu. Bino bi kuitukitshikila. Nsaa i bantu betuifunyishe ta be na lutumbu, natue namu tui kukutua lutumbu bua bintu abitupa Yehowa. Bino bi kukitshika su tuekala atutungunuka na kutentekiesha bintu bibaatudi nabio, sunga kuikala na kiutu bua bintu bi nabio bangi. Anka, atuikala na muloo su tuekala atusanka na biatudi nabio sunga tuekala na nshalelo e naminyi.

⁶ Bena Isalele abadia kutentekiesha bibaadi Efile Mukulu muibashinkamiishe’shi, su abakafika mu Nsenga ya mulayilo, abakekala na bintu bi bungi bi buwa. Uno mulayilo ubaadi na kia kulombana mu Nsenga ya mulayilo, kushi pababadi muishinda, mu kabaaka. Mu mushindo umune, pamutue pa kutuula binangu ku bintu biatushi nabio mu uno ndumbuluilo, tutuleyi binangu ku bintu bitulee Yehowa’shi aketupa mu nsenga ipia. Na dingi, tui kunangushena ku bifundue abitukuasha bua kunyingisha lukulupilo luetu mui Yehowa.

7. Nkinyi akitushinkamiisha’shi mboko ya Yehowa ta ngiipi?

⁷ Anka, we kuiyipusha buakinyi Efile Mukulu bepuishe Moyise’shi: “Eyasa dia Yehowa ndiipi su?” Yehowa baadi pangi akiebe kukuasha Moyise bua kunangushena kushi penda ku bukome buaye, kadi mpa na kulombene mboko yaye nkafika. Efile Mukulu baadi mulombene kupa bena Isalele muita wi bungi sunga bibabaadi mu kabaaka. Na “ku bukome bw’eyaasa,” Efile Mukulu baadi muleshe’shi e kukuasha muilo waye mbalo yoso yaya yaudi. (Mis. 136:11, 12, BB) Biabia nsaa yatudi na lukalakashi, tatuiyipusha su mboko ya Yehowa ayifiki mpa na kuatudi.​—Mis. 138:6, 7.

8. Nkinyi ki kuitukuasha bua kupela kukita kilubilo bu kibaadi kikite bantu be bungi mu kabaaka? (Tala dingi kifuatulo.)

⁸ Yehowa baadi mukite nka biabia bibaadi mulee, na aye nkutumina muilo waye tonyi tua tupopo. Bena Isalele ta babaadi batumbule Efile Mukulu bua kino kilengieleshi. Anka, be bungi abaadi baleshe luabi. Munda mua bufuku na kaanya, abaadi nka abasangula tupopo tui bungi. Yehowa baadi mufitshile “bantu abaadi baleshe luabi” nsungu, na aye nkuibanyooka. (Mba. 11:31-34) Akitulongiesha uno muanda. Abitungu tudimukie tala tuekala na luabi. Biatuikala balanda sunga ba mpeta, abitungu tuipaane mu ‘kuilamina mapeta muiyilu,’ pa kunyingisha kipuano kietu na Yehowa na Yesu. (Mat. 6:19, 20; Luk. 16:9) Nsaa y’atukitshi biabia, tushinkamishe’shi Yehowa etupa biabia biatudi nabio lukalo.

9. Nkinyi akitungu’shi tushinkamishe pabitale bukuashi bu’Efile Mukulu?

⁹ Mboko ya Yehowa ikuete kufika mbalo yoso i muilo waye lelo uno. Anka, bino t’abilesha’shi, tatuina tukutue bintu bia ku mbidi sunga bidibua.b Anka, Yehowa ekala nka netu, t’etusumbushena. Etukuasha sunga tuekala na lukalakashi lui naminyi. Mbikunyi biatudia kulesha lukulupilo’shi Yehowa alombasha nkalo yetu? Tutaluuleyi mianda ibidi: (1) Nsaa yodi na lukalakashi lua kupeta makuta, na (2) nsaa yatuikalakasha su atukekala na makuta mu mafuku aafiki.

NSAA YODI NA LUKALAKASHI LUA KUPETA MAKUTA

10. Ndukalakashi kinyi lua makuta luatudi balombene kupeta?

¹⁰ Bu abiende na kuifubuila nfudiilo a uno ndumbuluilo, tutengiele’shi bulanda abunyisha kufuima. Kafutakanyi ka mianda, ngoshi, masaku aatukila ku bipangua, kutuuka kua kipupa nkulombene kukita bia’shi tushimishe mudimo wetu, bintu biatudi nabio, sunga nshibo yetu. Tui kupeta mudimo mbalo yatudi sunga kufiluka na kifuko kietu. Nkinyi ki kuitukuasha bua kuata bitshibilo abilesha’shi tuibakulupile mboko ya Yehowa?

11. Nkinyi ki nkukuasha bua kunyingila nsaa yodi na lukalo lua makuta? (Luka 12:29-31)

¹¹ Kintu kia kumpala na ki buwa kukita, nyi nkulungula Yehowa mianda yobe. (Nki. 16:3) Mutekie kinangu kilombene nkukuasha bua kuata bitshibilo bi buwa, na kupela “kuikalakasha bikilekile,” pabitale muanda oobe. (Badika Luka 12:29-31.) Muisendeele bua’shi akukuashe wekala na kikudi kia kusanka na biodi nabio. (1 Ti. 6:7, 8) Kimbuula mu mikanda yetu miisambo ayilesha kia kukita nsaa yodi na lukalo lua makuta. Bangi mbapete miisambo ibakuashe bia kukila na lukalakashi lua makuta mu jw.org.

12. Nkonko kinyi i kukuasha muina Nkidishitu bua kuata kitshibilo ki buwa bua kifuko kiaye?

¹² Bangi mbakumiine midimo ibayishe kula na bifuko biabo, na kunyima bamona’shi takibaadi kitshibilo ki buwa. Kumpala kua kukumiina mudimo, tonangushenanga nka ku bungi bua makuta abakufutu, nangushena dingi su aukuasha na kifuko kiobe bua kuifubuila pepi na Yehowa. (Luk. 14:28) Eyipushe’shi: ‘Nkinyi ki kukitshikila eyibakishi dietu su nekala nka mu nyendo? Nekala nende mu bisangilo, mu bulungudi, na kuikala nakisha nsaa pamune na bakuetu balume na bakashi su? Su we na bana, eyipushe dingi luno lukonko lui na muulo: ‘Mushindo kinyi wankusha bana bande “muyile malango na buludiki bua Yehowa,” su ntshi nabo mbalo imune?’ (Ef. 6:4) Kunkushibua na binangu bi’Efile Mukulu, kushi bia bena kifuko na ba kuuku bobe bashi’abakookielaa abiamba Bible.c Tony, mushale mu Asie, mupete midimo i buwa i bungi nka mu dingi eumbo. Anka, kunyima kuaye kuteka pabitale uno muanda na kuisamba na mukashi aaye, baatshile kitshibilo kia kupela yaya midimo, na aye nkunangushena mushindo wa kupelepesha nshalelo aabo. Lelo uno, Tony amba’shi: “Ne mupete kinemo kikata kia kukuasha bantu be bungi bua kuuka Yehowa, na bana betu mbafule Yehowa. Kifuko kietu nkilongie’shi, su tuatumikila mayi e mu Mateo 6:33, Yehowa etupasukila.”

NSAA YATUIKALAKASHA SU ATUKEKALA NA MAKUTA MU MAFUKU AAFIKI

13. Nkinyi kiatudia kukita binobino, bua’shi tukekale n’ekuta nsaa y’atukanunupa?

¹³ Lukulupilo luetu muiyasa dia Yehowa lui kutompibua dingi nsaa y’atunangushena biatukekala atue abanunupa. Bible etunyingisha bua kufuba ngofu bua’shi tuakekala nekuta mu mafuku aafiki. (Nki 6:6-11) Su kui mushindo, bi buwa kulama ekuta dilombene nketukuasha mu mafuku aafiki. Eyendo’shi, makuta e kuitukuasha nsaa yatudi mu lukalo. (Mul. 7:12) Anka, t’abitungu tuikashe makuta bu kintu ki na muulo mu nshalelo eetu.

14. Buakinyi abitungu tutaluule Bena Ebelu 13:5 nsaa yatuata mpango pabitale biatukekala mu mafuku aafiki?

¹⁴ Yesu baadi mutuushe kileshesho kia muntu mpeta baadi mulame makuta kadi shi baadi “mpeta ku meso ku’Efile Mukulu.” (Luk. 12:16-21) Ta kui muntu auku akikakitshika malooba. (Nki. 23:4, 5; Yak. 4:13-15) Kui lukalakashi luatukuete kupeta pa muanda wa’shi tui balongi ba Nkidishitu. Yesu bakuile’shi abitungu tukumiine ‘kuleka bintu bietu bioso,’ bua kuikala balongi baye. (Luk. 14:33) Bena Nkidishitu ba mu siekele a kumpala ba mu Yudeya, abaadi bakumiine kukita bino na muloo oso. (Eb. 10:34) Lelo uno, bakuetu mbashimishe midimo yabo pa muanda wa kupela kutuelakana mu mianda ya politike. (Kbf. 13:16, 17) Nkinyi kibakuashe bua kukita bino? Bena lukulupilo loso mu uno mulayilo wa Yehowa: “Ntankakusumbushena su nkapeela, na ntankakulekieela su nkapeela.” (Badika Bena Ebelu 13:5.) Atukitshi muetu moso bua’shi tukekale na nshalelo e buwa mu mafuku aafiki, anka su mianda yashintuluka, atukulupila’shi Yehowa aketukuasha.

15. Mushindo kinyi autungu’shi baledi bamone bana babo? (Tala dingi kifuatulo.)

¹⁵ Mu angi maumbo, mulume na mukashi abatandaa bana bua’shi pabakanunupa, bana bakebakuashe. Anka, Bible amba’shi, abitungu baledi balombashe nkalo ya bana babo. (2 Ko. 12:14) Eyendo, baledi abekalaa na lukalo lua bukuashi p’abende na kukula, na bana be bungi abekalaa na muloo wa kuibikita. (1 Ti. 5:4) Anka baledi bena Nkidishitu abauku’shi muloo wabo aufikaa pa kukuasha bana buabadia kufubila Yehowa, kushi kuibakusha na kabingilo kashi bana bakekale na makuta bua kuibakuasha.​—3 Yo. 4.

16. Baledi be kulumbuula bana babo bua kulombasha nkalo yabo’bo banabene naminyi p’abakulu? (Bena Efeso 4:28)

¹⁶ Ku kileshesho kiobe, longiesha bana bobe biabadia kukulupila Yehowa, nsaa yuebalongiesha bia kupua nkalo yabo’bo banabene. Nka ba ki bakinga, ebaleshe muulo wa kufuba ngofu. (Nki. 29:21; badika Bena Efeso 4:28.) Pabende na kukula, ebakuashe buabadia kuikala na kisumi ku kalasa. Baledi bena Nkidishitu be kukimbuula bua kupeta mayi a kulonda a mu Bible, na akupu bakuashe bana babo buabadia kuata kitshibilo kia kalasa ka kulonga. Kepatshila ka baledi nka kukuasha bana babo buabadia kuikala na mushindo wa kulombasha nkalo yabo, na kuikala na nsaa i bungi ya kulungula mukandu wi buwa sunga kuikala bu mbala-mashinda.

17. Nkinyi akitungu’shi tushinkamishe?

¹⁷ Bafubi ba Yehowa ba sha lulamato, mbalombene kukulupila mu ngobesha yaye na mu lukalo luaye lua kulombasha nkalo yabo ya ku mbidi. Bu biatukuete kuenda na kuifubuila pepi na nfudiilo a uno ndumbuluilo, tutengieleyi’shi lukulupilo luetu mui Yehowa alutompibua. Biabia, sunga kinyi kiakitshika, tuikaleyi na kitshibilo kia kukulupila’shi, Yehowa akafubisha bukome buaye bua kulombasha nkalo yetu ya ku mbidi. Tushinkamishe’shi, eyasa diaye dia bukome ta ndiipi nya, adifiki mbalo yoso yatudi yaya bua kuitukuasha.