Kuikuatena bu kuuku na bakuetu balume na bakashi kui buwa

1-2. Nkinyi ki na muulo ku meso kua Yehowa, na akumiina’shi tukite kinyi?

MUSHINDO watukitshinaa bangi mianda wi na muulo ku meso kua Yehowa. Yesu bambile’shi, abitungu tufule bantu netu nka bu biatudi befule atue banabene. (Mat. 22:37-39) Bino abikiebe kuamba’shi, abitungu tuleshe bantu boso kalolo mpa na baaba bashi bena kulanguila netu. Nsaa y’atulesha kalolo ke bino, atuambula Yehowa Efile Mukulu “atushaa nguba bua bantu bebuwa na bebubi, na anokieshaa mpeshi bua bantu balulame na bashi balulame.”​—Mat. 5:45.

² Sunga biabidi’shi Yehowa mufule bantu boso, mufule bikishekishe baaba abakitaa mianda i buwa. (Yo. 14:21) Akumiina’shi tumuambule. Nyi buakinyi etunyingisha bua kuikala na “kifulo kikata” bua bakuetu balume na bakashi. Patunangushene pabitale kulesha kino kifulo, atumono mushindo awifuleenaa bena kifuko​—1 Mp. 4:8; Lom. 12:10

3. Nkinyi akitungu’shi tutentekieshe pabitale kifulo?

³ Nka bu abikalaa mutshi na lukalo lua kupasukilua bua udia kukula kalolo, nyi bi kifulo. Mpoolo mutumibua baadi mulungule bena Nkidishitu’shi: “Tungunukayi na kuileshena kifulo bu bana na bana.” (Eb. 13:1) Yehowa akumiina’shi tutungunukie na kufula bangi. Mu uno muisamba atulongo buakinyi abitungu kuikuatena bu kuuku na bakuetu bena Nkidishitu na mushindo watudia kutungunuka na kuibikita.

BUAKINYI ABITUNGU TUIKUATENE BU KUUKU NA BAKUETU BENA NKIDISHITU

4. Muyile Misambo 133:1, mbikunyi biatudia kutungunuka na kuata na muulo buumune bui munkatshi muetu? (Tala dingi bifuatulo.)

⁴ Badika Misambo 133:1. Atukumiina mayi a mufundi a misambo bambile’shi, kuikuatena bu kuuku na bantu bafule Yehowa kui “buwa bui mô!” Nka bu bilombene muntu kukutua kuata na muulo kintu ki’amonaa efuku dioso, su tuakutua kudimuka tui kukutua kuata na muulo buumune bui munkatshi muetu. Atuimonenaa na bakuetu balume na bakashi pangi misango i bungi ku lubingo. Mbikunyi biatudia kutungunuka na kuibaata na muulo? Kifulo kietu bua bakuetu balume na bakashi akitama su tuata nsaa ya kunangushena ku muulo wi nao oso a kuabadi mu kakongie na kuatudi.

5. Bukitshishi kinyi bui nabo kifulo ki munkatshi muetu kui bangi?

⁵ Muntu p’afiki ku bisangilo bietu bua musango wa kumpala, akaanyaa kifulo ki munkatshi muetu. Penda nka biabia biamono, ashinkamisha’shi, bapete bia binyibinyi. Yesu bambile’shi: “Bua biabia bantu boso abakauku’shi nui balongi bande: su nui na kifulo munkatshi muenu.” (Yo. 13:35) Tala kileshesho kia Chaithra, baadi alongo ku université na baadi alongo Bible na Tumonyi tua Yehowa. Baadi mukumiine luitamino lua ku kikongeno kia mafuku asatu. Kunyima kua kutuela efuku dia kumpala, balunguile mulongieshi aaye a Bible’shi: “Kashaa baledi bande tabanganyine kiipa. Anka ku kikongeno kienu, abanganya biipa misango 52 penda muifuku dimune. Nemumone’shi Yehowa mufubishe muilo waye bua kundesha’shi munfule.” Nakumiina kuikala mu kino kifuko. Chaithra batungunukile na kushintuula nshalelo aaye, na aye nkubatshishibua mu 2024. Oolo, nsaa ayimono bantu bapia midimo yetu i buwa, mpa na kifulo ki munkatshi muetu, ke bungi abibatakulaa bua kufubila Yehowa.​—Mat. 5:16.

6. Kuikala bu kuuku na bakuetu balume na bakashi akuitukuasha naminyi?

⁶ Kuikala bu kuuku na bakuetu balume na bakashi nkulombene kuitukaluila. Mpoolo baadi mudimushe bena Nkidishitu naye’shi: “Tungunukayi na kuinyingishena efuku dioso . . . bua’shi bukome bua madimi bua muluisho tabupapishanga eshimba dia muntu su ngumune a kuanudi.” (Eb. 3:13) Su tuabofula kuishimba mu mushindo wa’shi tuapambuka muishinda dia kululama, Yehowa e kufubisha muina Nkidishitu bebitundula bua kuitukuasha. (Mis. 73:2, 17, 23) Buno bukuashi bui buwa buetu.

7. Nkuipushena kinyi kui pankatshi pa kifulo na buumune? (Bena Kolose 3:13, 14)

⁷ Tui mu kisaka kia bantu abekitshishaa bua kuileshena kifulo, nyi buakinyi atupetaa miabi i bungi. (1 Yo. 4:11) Bu kileshesho, kifulo akitutakula bua ‘kutungunuka na kuileshena luishinko,’ na bino abikuasha bua kulama buumune buetu. (Badika Bena Kolose 3:13, 14; Ef. 4:2-6) Biabia ku bisangilo bietu, nyi mbalo ayikalaa butaale bushi ingi mbalo pano pa nsenga.

TUILESHEENEYI KANEMO

8. Yehowa kuete kuitukuasha naminyi bua’shi tuikale nka mu buumune?

⁸ Buumune buetu mu nsenga ishima nyi nkilengieleshi. Yehowa muibikashe sunga biatudi bakutue kupuidika. (1 Ko. 12:25) Bible amba’shi tui “balongieshibue n’Efile Mukulu bua kuifulena ku muntu na muntu.” (1 Te. 4:9) Bino abilesha’shi Yehowa afubishaa Bible bua kuitulungula kia kukita bua’shi tuikale mu bu kuuku na bakuetu bena Nkidishitu. Tui “kulongieshibua n’Efile Mukulu,” pa kuilongiela malongiesha aaye na kuiatumikila. (Eb. 4:12; Yak. 1:25) Bino nyi bikuete kuikitshisha Tumonyi tua Yehowa bua kukita.

9. Tubalongo kinyi mu mukanda wa Bena Loma 12:9-13 pabitale kuilesheena kanemo?

⁹ Eyi di’Efile Mukulu aditulongiesha kinyi bua kuikala bu kuuku na bakuetu bena Nkidishitu? Tala bibaadi Mpoolo muakule pabitale uno muanda, mu Bena Loma 12:9-13. (Badika.) Lamiina biamba’shi “ikalayi nka ba kumpala mu kuilesheena kanemo.” Nkinyi kiakiebe kuakula? Abitungu tuate mpango ya “kuilesheena kifulo kia bu bana na bana,” pa kuifuileena lusa, kuileshena kalolo, na kuikuasheena. (Ef. 4:32) Totengielanga’shi bakuenu balume na bakashi bebikite. We kuikala “a kumpala” mu kuibikita. Paapa omono kulombana kua bibakuile Yesu’shi: “Muloo wa kupaana ngukile wa kupebua.”​—Bik. 20:35.

10. Mbikunyi biatudia kuikala na kisumi mu “kuilesheena kanemo”? (Tala dingi kifuatulo.)

¹⁰ Muanda wa kukaanya, nka’ye kiapu kuakula’shi abitungu tuikale ba kumpala mu kuilesheena kanemo, Mpoolo etunyingisha bua kuikala “bafubi ba mufubo,” kushi kuikala na “lulengu.” Mufubi a mufubo ekalaa na kisumi na afubaa ngofu. Nsaa y’abamupa mudimo, eukitshi na kishima. Nkindji 3:27, 28 etunyingisha’shi: “Tosuminanga muntu kintu su we na kipaso kia kumukuasha.” Muyile uno verse, su muntu e mu lukalo, atukitshi bukidi bukidi bua kumukuasha. Tatumulanga; sunga kuamba’shi ungi muntu amukuasha.​—1 Yo. 3:17, 18.

11. Nkinyi ki kuitukuasha bua kuikuateena bu kuuku na bangi?

¹¹ Ungi mushindo watudia kulesha’shi atunemeka bangi, nyi pa kuibafuila lusa bukidi bukidi nsaa y’abetuluishisha. Bena Efeso 4:26 amba’shi: “Nguba taponanga nuki’nka na nsungu.” Buakinyi? Verse 27 amba’shi su tubakitshi biabia, ‘atulekiela Diabulu mbalo.’ Muiyi diaye, Yehowa etulungula misuusa na misuusa bua kuifuilena lusa. Bena Kolose 3:13 etunyingisha bua ‘kutungunuka. . . na kuifuilena lusa n’eshimba dimune.’ Kufuila bangi lusa nyi mushindo wi buwa wa kuikuatena bu kuuku na bangi. P’atukitshi bino, atukuasha bua ‘kulama buumune bua kikudi abuitubungu mu butaale.’ (Ef. 4:3) Mu kikoso, kufuila bangi lusa akukuasha bua kulama buumune na butaale buetu.

12. Mushindo kinyi awitukuashaa Yehowa bua kufuila bangi lusa?

¹² Binyibinyi, ingi nsaa bi kuituelela bukopo bua kufuila muntu muituluishishe lusa. Anka tui kuibikita ku bukuashi bua kikudi ki’Efile Mukulu. Kunyima kua kuitunyingisha bua “kuilesheena kifulo kikata,” na’shi tuikale “bafubi ba mufubo,” Bible amba’shi: “Nuikale baule ndaa na kisumi ku bukuashi bua kikudi.” Muntu “muule ndaa” e na kisumi ki bungi, ki’apete ku bukuashi bua kikudi kiselele. (Bena Loma 12:11) Biabia, kikudi ki’Efile Mukulu ki kuitukuasha bua kuilesheena kifulo kia bu bana na bana, na kuifuidisheena lusa n’eshimba dioso. Nyi buakinyi atuisendeelaa Yehowa buadia kuitukuasha.​—Luk. 11:13.

“TAKUIKALANGA KUITSHIBUULA MUNKATSHI MUENU”

13. Nkinyi kilombene kutuesha kuiabuula munkatshi muetu?

¹³ Mu kakongie, mui “bantu ba mishindo yoso,” ba mu ma mbalo elekeene. (1 Ti. 2:3, 4) Pa muanda wa bino, oso a kuatudi eatshila kitshibilo pabitale nfuadilo, kuilengiesha sunga mushindo wakumiina’shi abukiibue. Su tatuibadimukie, ino mianda ngilombene kutuesha kuiabuula munkatshi muetu. (Lom. 14:4; 1 Ko. 1:10) Pa muanda Efile Mukulu etulongiesha buatudia kuifulena, abitungu tudimukie tala tuamona’shi, nka bietu bitshibilo nyi bi buwa kukila bia bangi bantu.​—Fid. 2:3.

14. Nkinyi akitungu’shi tuikitshishe bua kukita, na buakinyi?

¹⁴ Tui kukita dingi bia’shi kuiabuula takutuelanga mu kakongie, pa kuikala atuinyingishena nsaa yoso. (1 Te. 5:11) Mu ano mafuku, bantu be bungi abaadi balekie kulungula mukandu wi buwa na kutuela mu bisangilo sunga baaba abaadi bakatushibue mu kakongie mbalukiile. Tuibakukileyi na muloo oso! (2 Ko. 2:8) Tala kibaadi kikitshikile ungi mukuetu mukashi bafikile ku nshibo ya Bufumu kunyima kua bipua ekumi. Amba’shi, “Muntu oso baadi munyimune ku mboko na muloo.” (Bik. 3:19) Penda kukita bino kubaadi na bukitshishi kinyi kuadi? Amba’shi: “Naadi muipushe’shi mboko ya Yehowa ibaadi inkunkushe dingi ku muloo.” Pa kuikala atuinyingishena atue boso, Nkidishitu ekuitufubisha bua kunyingisha boso “bakokie na batuale bushito.”​—Mat. 11:28, 29.

15. Tui kukita dingi kinyi bua kulama buumune mu kakongie? (Tala dingi kifuatulo.)

¹⁵ Ungi mushindo watudia kulama buumune buetu, nyi mu ngakuilo eetu. Yoobo 12:11 amba’shi: “Matwi aatundulâ bishima bya bînyi na bya madimi bu abitundulâ namu edimi bidibwa bi buwa na bi bubi, ta mbyabya su?” Nka bu abitompaa muntu bidibua bua kuuka su bi buwa kumpala kua kuibipa bantu, bi buwa tunangushene kumpala mianda yatukiebe kuakula kumpala kua kuiyakula. (Mis. 141:3) Kabingilo ketu nka kushinkamisha’shi, biabia biatuakula abinyingisha bangi, na ’abikuasha baaba abebipusha.’​—Ef. 4:29.

16. Mba nanyi abatungu’shi bekale’nka na ngakuilo anyingisha?

¹⁶ Balume na baledi abitungu bekale nka abakula mianda ayinyingisha. (Kol. 3:19, 21; Tt. 2:4) Na bakulu namu abitungu bekale nsulo ya kunyingisha na kusamba mikooko ya Yehowa. (Yesh. 32:1, 2; Nga. 6:1) Lungi lukindi lua mu Bible aluamba’shi: “Kwakula myanda ilombane pa kipindji kyâyo kyakudi buwa kino pe!”​—Nki. 15:23, EEM.

LESHA KIFULO “MU BIKITSHINO NA MU BINYIBINYI”

17. Tui kushinkamisha naminyi’shi kifulo kietu bua bakuetu balume na bakashi ta ki na lubombo?

¹⁷ Mutumibua Yowano etunyingisha bua “kuleshe kifulo, kushi penda mu ngakuilo na mu miisambo, anka tuikileshe mu bikitshino na mu binyibinyi.” (1 Yo. 3:18) Atukumiina’shi kifulo kietu bua bakuetu balume na bakashi kikatukile muishimba. Tui kuibikita naminyi? Su atukisha nsaa i bungi pamune na bakuetu balume na bakashi, atunyingisha bu kuuku buetu nabo na atunyisha kuifulena. Biabia kimba mushindo wa kukisha nsaa pamune na bangi, bu kutuela mu bisangilo na kulungula nabo mukandu wi buwa. Kimba nsaa ya kuibatembela. Nsaa y’atukitshi biabia, atulesha’shi tukuete “kulongieshibua n’Efile Mukulu bua kuifulena ku muntu na muntu.” (1 Te. 4:9) Paapa atutungunuka na kuamba’shi: “Mmuloo kinyi wi na bantu p’abashala na bakuabo mu buumune!”​—Mis. 133:1.