“Kufula beshikuanyi bobe” akupushisha kinyi?
Lualuulo lua mu Bible
Mu muisambo waye wa ku muengie, Yesu bakuile’shi: “Tungunukayi na kufula beshikuanyi benu.” (Mateo 5:44; Luka 6:27, 35) Ano mayi aaye aaleesha’shi abitungu tukitshiine baaba booso betushikue n’abetukitshiina mianda ya kukutua kululama mianda na kifulo kioso.
Yesu baleesheshe kifulo kui beshikuanyi baye pa baadi mufuile baaba booso babaadi bamuluishiishe lusa. (Luka 23:33, 34) Malongiesha aaye a pa bitale kufula beshikuanyi betu, ngepushene na mianda yabadi bafunde mu Bifundue bia kiina Ebelu, bi’abakambaa kuitanyina kui bantu be bungi bu Kilombeno kikulu.—Efilu 23:4, 5; Nkindji 24:17; 25:21.
“Tungunukayi na kufula beshikuanyi benu na kuteka bua baaba abenukiengiesha.”—Mateo 5:43, 44.
Mu uno muisambo mui:
Bua kinyi kufula beshikuanyi bobe?
Efile Mukulu mmuikale kileshesho kietu. Efile Mukulu “e na kalolo kui bantu bashi na lutumbu na kui bantu be bubi.” (Luka 6:35) Efile Mukulu “atushaa nguba bua bantu . . . be bubi.”—Mateo 5:45.
Kifulo ki kutakula muishikuanyi nobe mu kushintuluka. Bible etutekie buatudia kukitshiina muishikuanyi mianda na kalolo, p’atukitshi biabia, “atumutenteka makala e kaalo ku mutue kuaye.” (Nkindji. 25:22) Uno ngakuilo a mu kimfuanyi aleesha bi’abakitaa angi mabue amuulo bua kupeta kilonda ki buwa kiabadi nakio lukalo. Mu mushindo umune, Su tui na kalolo kui muntu muitushikue, tui kupudisha nsungu yaye na tuatuusha mianda i buwa i muadi.
Ngingi mishindo kinyi yodi mulombene kufula beshikuanyi nobe?
“Kitshiina baaba abakushikua bi buwa.” (Luka 6:27) Bible amba’shi: “Su muishikuanyi n’obe e na nsala, mupe kia kudia; su e na nyota, mupe meema a kutoma.” (Bena Loma 12:20) We kupeta ingi mishindo ya kuleesha kifulo kui muishikuanyi p’otumikila kino kiabadi bawukie bu Muiya Ukata, awamba’shi: “Nka bu bi’anukumiina’shi bantu benukitshiine, ebakitshineyi naabo namu mu mushindo umune.”—Luka 6:31.
“Elela baaba abakuelela milua miabi.” (Luka 6:28) Atuelela beshikuanyi betu miabi p’atuakula na kalolo kooso na kuibaneemeka sunga betuakula bi bubi. Bible Amba’shi: “Ta nualuishanga muntu bubi ku bubi . . . sunga mulomo ku mulomo. Anka, nuibatekiele miabi.” (1 Mpiele 3:9) Dino elango di kuitukuasha bua kukambila mishindo yooso ya mushikua.
“Teka bua baaba abakukaa.” (Luka 6:28) Su muntu bakukaa, tualushanga “bubi ku bubi.” (Bena Loma 12:17) Pa mutue pa kualusha bubi ku bubi, teka Efile Mukulu buadia kufuila yawa muntu lusa. (Luka 23:34; Bikitshino 7:59, 60) Pa mutue pa kukimba bia kuiwobuela, tadiila wawa muanda mu maasa mu’Efile Mukulu, awuku kiadi mulombene kukita na yawa muntu muyile mayi aaye akululama apuidikie.—Bena Levi 19:18; Bena Loma 12:19.
“Tungunukayi na kufula beshikuanyi benu, na kukitshiina baaba abenushikua bi buwa, na kuteka bua baaba abenukaa.”—Luka 6:27, 28.
Ikala na “luishinko na kalolo.” (1 Bena Kodinda 13:4) Mu kuleesha kuaye kuwukibue kalolo pa bitale kifulo, muina Nkidishitu Mpoolo mutumibua baadi mufubishe nka kishima kimune kia mu kiina Greke (a·gaʹpe) ki mu mayi afundibue mu mukanda wa Mateo 5:44 na Luka 6:27, 35. Atuleesha kino kifulo kia bena Nkidishitu kui beshikuanyi betu p’atuikala na luishinko na kalolo, kushi kuikala na kiutu, kuitatula, sunga kuileesha.
“Kifulo ki na luishinko na kalolo. Kifulo ta ki na mukawo. T’akitumbishaa, t’akitatulaa, t’akikitaa mianda ya buufu, t’akikimbaa penda buwa buakio’kio kinabene, t’akikuataa nsungu. T’akilamiinaa mianda i bubi. T’akisankaa na kukutua kua kululama, anka akisankaa na binyibinyi. Akibuikiilaa mianda yooso, akikumiinaa mianda yooso, akikulupilaa mianda yooso, na akinyingiilaa mianda yooso. Kifulo t’akishiminaa nya. Anka bia buntu bia kutemuka, abikashimina; kuakula mu ndimi, akukafudiila; na kiukilo akikashimina.”—1 Bena Kodinda 13:4-8.
Abitungu olue ngoshi na beshikuanyi bobe su?
Nyaa, Yesu baadi mulungule balongi baye’shi t’abitungu balue ngoshi na beshikuanyi babo nyaa. Bu kileshesho, pa baadi Yesu mudimushe balongi baye’shi abatuuku Yelusalema ngoshi i bukopo, ta baadi muakule’shi balongi baye bashaale mu Yelusalema na balue ngoshi nyaa, anka baadi muibalungule buabadia kusuuka. (Luka 21:20, 21) Yesu baadi dingi mulungule Mpiele mutumibua’shi: “Alusha lupete loobe pa mbalo yalo, muanda baaba booso abasemuna lupete, abakafu ku lupete.” (Mateo 26:52) Bible na mianda ya kala abileesha’shi balongi ba Yesu ba mu siekle a ku mpala, ta mbalue ngoshi na beshikuanyi babo nyaa.a—2 Timote 2:24.
Binangu bi bubi pa bitale kufula beshikuanyi bobe
Binangu bi bubi: Muiya w’Efile Mukulu ubaadi autekie bena Isaleele buabadia kushikua beshikuanyi babo.
Bia biinyibiinyi: Muiya ta ubaadi aukamika bena Isaleele buabadia kushikua beshikuanyi babo nyaa. Muiya ubaadi autekie bena Isaleele buabadia kufula bankungishanyi nabo. (Bena Levi 19:18) Sunga kino kishima “bankungishanyi” akileesha bangi bantu, bangi bena Yunda babaadi abekiata mu ungi mushindo wi bubi, bua kufula nka penda bankungishanyi nabo bena Yunda, na kumona’shi balanguidi nabo bashi bena Yunda mbeshikuanyi babo babadi bashikue. (Mateo 5:43, 44) Yesu baadi mulumbuule mmueneno aabo baadi bubi pa kuibapa lukindi lua muina Samadiya e buwa, sunga’shi nkungishanyi e buwa.—Luka 10:29-37.
Binangu bi bubi: Kufula beshikuanyi bobe, nkukumiina muikeelo wabo wi bubi.
Bia biinyibiinyi: Bible aleesha’shi we kufula muntu kushi kukumiina muikeelo waye wi bubi. Bu kileshesho, Yesu baadi mutopekie etombo aku namu baadi mutekie bua baaba booso babamuipayile. (Luka 23:34) Na dingi Yesu baadi mushikue kuipaa kua miiya, sunga kukita kua miluisho, anka baadi mutuushe muwa waye bua bankitshishi ba miluisho.—Yowano 3:16; Bena Loma 6:23.
a Mukanda wa L’essor du christianisme, ubaabadi bafunde kui Ernes Willia Barnes, awamba’shi: “Pabadi bataluule bintu bioso bia mianda ya kala bi kuanka, abileesha’shi mpaa na mu kipungo kia Marc Aurèle [Mfumu a mu ampire a bena Loma, kubanga mu kipua kia 161 na ku kia 180 B.B.], ta kui muina Nkidishitu su ngumune baadi muikale musalayi; sunga musalayi bekala muina Nkidishitu kushaala afubu mu mudimo wa busalayi nyaa.”