Kui efuku adikala kululama mu mianda ya makuta su?
Mu maumbo ebungi, bantu bakuete kutuuka mu kilayi bua kulesha nsungu yaabo muanda abamono’shi takui kululama mu mianda ya makuta nya. Ino mianda ibanyisha kuluila ngofu mu kipupa kia COVID-19, nsungu yaabo ibanyinsha kufuima muanda wa miiya ya kupela kutuuka, kukutua kua bidibua, kukutua mushindo wa kuenda mu kuibukisha kalolo mbifikie mu kutuusha kuiabuula pankatshi pa ba mpeeta na balanda.
Tui kukulupila’shi kui efuku adikapu mianda ayifuishila bantu nkakalashi ya makuta pa nsenga su? Oolo. Bible apatuula akikakitshi Efile Mukulu bua kupudisha ino nkalakashi.
Nkalakashi ya makuta yabakapudisha kui Efile Mukulu
Lukalakashi: Bantu ta mbobeshe kutuula ndumbuluilo a mianda ya makuta alombasha nkalo ya bantu nya.
Bialukapu: Pa mbalo ya mbulamatadi a bana ba bantu, Efile Mukulu akatuulu mbulamatadi aaye, abetamina bu Bufumu bu’Efile Mukulu. Abukamunu nsenga ishima kukatukila muiyilu.—Ndanyele 2:44; Mateo 6:10.
Kipeta: Bu bi uno mbulamatadi akamunu nsenga ishima, Bufumu bu’Efile Mukulu abukamunu nsenga mu kipaso kipuidikie. Bantu t’abakakienge dingi muanda wa bulanda sunga lukalakashi lua makuta nya. (Misambo 9:7-9, 18) Anka, abakekakala na muloo bua mudimo wabo, na pamune na bifuko biabo abekala na nshalelo ebuwa a muloo. Bible mmulee’shi: “Abeebaka mashibo bemushaale, abakunu nfinyo naa abadi bikuba byaayo. Taabeebaka dimo nshibo bwa’shi bangi beemushaale nya; taabakunu dimo bwa’shi bangi badye.”—Yeeshaya 65:21, 22.
Lukalakashi: Bantu tabe na bia kukita bua’shi mianda ayibakiengiesha na ayibakutshisha bintu biabadi nabio lukalo ibafuile nya.
Bialukapu: Ku bukuashi bua Bufumu buaye, Efile Mukulu akakatusha mianda yooso ayifuishila bantu kenyongoshi na moo.
Kipeta: Mu bukunkushi bu’Efile Mukulu, bantu t’abekala mu nshalelo ebakutshisha na bifuko biabo bintu biabadi nabio lukalo mu muwa wabo nya. Kileshesho, ngoshi, kukutua kua bidibua, na bipupa, abikala bu mianda ya kala. (Misambo 46:9; 72:16; Yeeshaya 33:24) Efile Mukulu amba’shi: “Mwilo wande aushikama mu nsenga ya butaale, mu mbalo yabashii mwanda na muntu, mbalo ya bulungantu.”—Yeeshaya 32:18.
Lukalakashi: Misusa ibungi bakuete kudiila bantu bintu biabo kui baaba bena luabi na abakimbi penda buwa buabo.
Bialukapu: Bantu abekala ku bukunkushi bua Bufumu bu’Efile Mukulu abakalongo bia kuikala na kifulo kia binyibinyi bua bantu nabo na kukimba buwa buabo.—Mateo 22:37-39.
Kipeta: Mu Bufumu bu’Efile Mukulu, bantu booso abekala na kifulo ki mumune na ki’Efile Mukulu, kifulo ‘kish’akikimbaa mwabi wa bupenka.’ (1 Bena-Kodinda 13:4, 5) Bible amba’shi: “Taakukitshibwa’nyi bubi, sunga mwanda wa kibeshi pa mwengye wande ushima wiselele, mwand’eumbo adiikala dyuule na kuuka kwa Yehowaa abyuulaa mema mu mbuu.”—Yeeshaya 11:9.
Bible apatuula’shi tui mu mafuku a nfudiilo a uno ndumbuluilo abakafudiisha kui Efile Mukulu binobino na kupudisha nkalakashi ya makuta, bu biadi mulee.b (Misambo 12:5) Bua binobino, mayi a kulonda a mu Bible ngalombene nkukuasha bua kukambila nkalakashi ya makuta yoodi nayo binobino. Bu kileshesho, tala muisambo awamba’shi “Mushindo wa koobesha kushaala na penda ekuta dipeela” na “L’argent et vous.”
a Yehowa nyi eshina di’Efile Mukulu bu biabadi bedileshe mu Bible.—Misambo 83:18.
b Bua kulonga buakinyi abitungu okulupile abiamba Bible, tala muisambo awamba’shi: “Bible—nyi nsulo ya bya binyibinyi ya kukulupila.”