Tumonyi tua Yehowa tui bungi nkinyi mu nsenga ishima?

Mushindo kinyi aubadikaa tumonyi tua Yehowa bungi buato?

Atubadikaa penda baaba bakuete kulungula munkandu wibuwa wa Bufumu ku mueshi oso, bu Tumonyi tua Yehowa. (Mateo 24:14) Bino abipushisha mpa na boso babatshishibue bu Tumonyi tua Yehowa, mpa na baaba bashabatshishibue kadi abalombasha mianda itekibue bua kulungula mukandu wibuwa.

Abitungu kutuusha bia buntu bia makuta bua kubadikibua bu Kamonyi ka Yehowa su?

Nya. Bua’shi babadikie muntu bu Kamonyi ka Yehowa sunga kupeta mashito kampanda mu ndumbuluilo eetu t’abitungu’shi atuushe bia buntu nya. (Bikitshino 8:18-20) Na dingi, bia buntu bibungi abitushibua kushi kuuka sunga winyi bebituusha. Kamonyi kooso akatuushaa nsaa, bukome, na bingi bintu bua kukuatshishena mudimo wetu wa mu nsenga ishima muyile bi’akumiina sunga kumona kuaye.​—2 Bena Kodinda 9:7.

Anuukaa naminyi bungi bua balungudi bepaane mu mudimo?

Ku mueshi oso, Kamonyi koso akatushaa rapore ya mudimo wa bulungudi mu kakongie kaabo. Abatushaa ino rapore mu kukumiina kuabo.

Ma rapore a tukongie abeasangishaa na, bungi boso abebutumu ku biro bia filiale. Biro bia filiale namu abitumaa bungi bua rapore yoso y’eumbo sunga terituare ku Biro bietu bikata bia mu nsenga ishima.

Ku nfudiilo kua kipua kia mudimo kioso,a abalesha bungi boso bua Tumonyi tua Yehowa tui muiumbo dioso bua mu kipua kia mudimo. Buno bungi boso abebusangisha pamune bua kuuka bungi bua Tumonyi tui mu nsenga ishima. Kantu na kantu koso katale rapore y’eumbo dioso abekalesha pa mbalo ifunde’shi: “Mu nsenga ishima” mu site etu. Anka bibaadi ma rapore e bino aanyingisha bena Nkidishitu ba kumpala, ino rapore namu ayitunyingishaa.​—Bik 2:41; 4:4; 15:3.

Anubadikaa baaba abebungaa nenu bash’abalungulaa mukandu wibuwa?

Sunga biekala’shi bano bantu t’atuibabadikaa mu bungi bua Tumonyi, atuikalaa na muloo wa kuibakuukila mu tukongie tuetu. Bebungi ba kuabadi abatuelaa mu Kitentekiesho kia lufu lua Yesu akikitshikaa ku kipua kioso, biabia bungi buabo atuibubadikaa pa kumona kuilekena kui pankatshi pa bungi bua bantu abatuele mu kino kisangilo na bungi bua Tumonyi tua Yehowa. Mu kipua kia 2024, bungi bua bantu bekele batuele mu Kitentekiesho buikele 21 119 442.

Bebungi bash’abatuelaa mu bisangilo bietu, abapetaa bukuashi kukidila ku programe etu a kulonga Bible na bantu buntu. Mu 2024, ku mueshi oso tuikele balongie na bantu bafikie pa 7 480 146, ingi nsaa bekele balongie na bantu bebungi pa mbalo imune.

Buakinyi mbulamatadi atushaa bungi bua Tumonyi bukile buanudi nabo?

Mbulamatadi abadikaa bungi bua bantu pa kuibepusha mu kipuilo kiabatuelaa. Bu kileshesho, biro abibadikaa bungi bua bantu mu États-Unis bikele bileshe’shi kubadika kuabo kuikele kuimene penda pa “kukimba bua kuuka su bantu babadi bele nkonko abeata bu ba mu kipuilo kampanda,” biabia biro bikele bikumbashe’shi bungi buabo mbuimene “mu kulonda binangu bia bantu kushi muyile biabidi binyibinyi.” Mu kuilekena na biabia, atubadikaa bungi bua Tumonyi tua Yehowa munkatshi mua baaba abalungula bangi mukandu wibuwa na abatuusha rapore yabo ya mudimo, kushi baaba abeamba penda bu Tumonyi tua Yehowa.