BUKWASHI BWA KIFUKO
Mushindo wa kukambila nsungu yoobe
Mukashi sunga mulume oobe bakula sunga kukita kintu kibakufitshisha nsungu, na wetatshisha bwa kukambila nsungu yoobe. Kadi apapusha mwina dibaka noobe’shi kwi kintu kampanda kishakyendeka na babanga kukwipusha wanka. Byabya bikunyisha’nyi nkufitshisha munda ngofu. Mbikunyi byodi mukumbene kukambila nsungu yoobe apakufikila mwanda wi byabya?
Kyoodi mulombene kuuka
Kulama nsungu nkulombene kulwisha mbidi yoobe. Muyile kukimbuula kwa bantu mbamone’shi, kulama nsungu akufwishaa maladi bu lwendo lwa mase, maladi eshimba, kufudiila kwa binangu na kukutwa kwa nsala. Nsungu ayifwishaa kukutwa kwa tulo, kwinyongola kukilekile, maladi a kikoba na AVC. Nyi bwakinyi Bible amba’shi: “Leka nsungu . . . , mwanda byabya abitanda bubi.”—Misambo 37:8, EEM.
Nsungu ibungi ngilombene dingi kulwisha. Su tubatungunuka na kwikala na nsungu, ngilombene kwikala bu mukumbo awitulwisha munda. Kileshesho, we kwikala na kwidiladila sunga mweneno ebubi bwa bangi. Binangu bi byabya mbilombene nkukutshisha mushindo wa kushala na bangi na kulwisha dibaka dyobe.
Kyodi mulombene kukita
Kimba ngikashi ibuwa inayo mwina dibaka noobe. Funda bintu bisatu abikusangashaa kwi mwina dibaka noobe. Ungi mususa omufiitshila munda bwa byayikalanga mwakule sunga mukite, nangusheena ku ngikashi yaaye ibuwa. Bino mbilombene nkukwasha bwa kukambila nsungu.
Eyi dya kulonda dya mu Bible: “Ikaalaayi na lutumbu”—Beena-Kolose 3:15.
Ikala ofwidishena lusa. Kya kumpala, tompa kumona myanda muyile mweneno a mwina dibaka noobe. Bino abikukwasha bwa kutamisha kyubishi kya kwituula pa mbalo ya bangi—byabetamina mu Bible bu “kwipushena lusa.” (1 Mpyeele 3:8) Akupu w’eyipushe’shi, ‘ne na kabingilo ka kufiita munda mu mushindo wa nkutwa kumufwila lusa su?’
Eyi dya kulonda dya mu Bible: “Mmwatwe na kinêmo su alekyêla muntu mwanda wadi mumusôlele.”—Nkindji 19:11, EEM.
Lesha byopusha mwishimba na kalolo na kaneemo. Akula’shi “Ami.” Bu kileshesho, pamutwe wa kwamba’shi, “tokwete kungata na muulo nsaa yoshongitamina bwa kundungula kodi mwende,” akula’shi, “abinkalakashaa p’amono nsaa ibakidi ntanguku kodi mwende na, su we biya.” Kwakula na kalolo kooso nkulombene nkukwasha bwa kukambila nsungu.
Eyi dya kulonda dya mu Bible: “Kwakula kwenu kwikale mafuku ooso buwa, kutobiibwe mungwa.”—Beena-Kolose 4:6, Kilombeeno kipya 2014.
Teemesha na kaneemo kooso. Su bopudisha kwakula, lekyela mwina dibaka noobe nsaa ya kwakula kushii kumutshiba mwisambo. Su bapudisha kwakula, ambuula byayikalanga mwakule bwa kushinguula su bopusha kalolo. Penda nka kuteemesha nkulombene nkukwasha bwa kukambila nsungu.
Eyi dya kulonda dya mu Bible: ‘Ikala na kupusha kwa bukidi, anka wekale mwiyeshe mu kwakula’—Shake 1:19.