Yowano 3:16​—“Mwanda Efile Mukulu bakishekîshe kufula ba pano pa nsenga”

“Mwanda Efile Mukulu badi mufule ba pa nsenga bikata p’aye kutuma Mwan’aye eleka, bwa’shi muntu oso alesha lukumino mwadi tafwanga nya anka ekale na muwa wa loso.”​—Yowano 3:16, Traduction du monde nouveau.

“Mwanda Efile Mukulu bakishekîshe kufula ba pano pa nsenga, ebapa Mwan’ê a eleka kukyeba kwa’shi muntu ese a kukulupila mwadi talwididîlanga, ooo, anka ekale na mûwa wa ikalaika.”​—Yowano 3:16, Ebuku dy’Efile Mukulu.

Kipatulwilo kya Yowano 3:16

Efile Mukulu mwitufule na akumina’shi twikale na muwa wa loso. Nyi bwakinyi, batumine Mwan’aye, Yesu Kidishitu, pa nsenga. Yesu bakitshine midimo ika ina muulo pano pa nsenga. Wa kumpala, balongyeshe balongi baye pabitale Efile Mukulu aaye na Nshaaye. (1 Mpyeele 1:3) Wa kabidi, balambwile muwa waye bwa bantu. Bwa kupeta muwa wa loso, abitungu tuleshe lukumino mwi Yesu.

Atupusha bi bukata bwa kifuko ky’Efile Mukulu mu bishima bya’shi, “ebapa Mwan’ê eleka.”a Yesu badi Mwan’Efile Mukulu mwilekene na bangi. Mu kipaso kinyi? Penda Yesu nyi ababadi bapangwi kwi Efile Mukulu bupenka bwaye. (Bena-Kolose 1:17) Aye nyi “mwana mbedi a bipangw byoso.” (Bena-Kolose 1:15) Bipangwa byoso, mpana bangi ba mwikeyilu, abekeele kwanka kukidila kwi Yesu, sunga’shi ku bukwashi bwaye. Anka, Yehowab Efile Mukulu bakuminyine kutuma Mwan’aye adi mufule ngofu “bwa kufubila bantu, na kupaana muwa waye bwa kukuula mwilo wa bantu.” (Mateo 20:28) Yesu badi mukyengye aye nkufwa bwa kwitukuula ku mulwisho na lufu, byatudi bapyane kwi muntu a kumpala, Adame.​—Bena-Loma 5:8, 12.

Kulesha lukumino mwi Yesu ta nkwimene penda pa kukumina mwadi sunga kukumina byadi mwitukitsine nya. Abitungu tuleshe’shi twi na lukumino mwi Mwan’Efile Mukulu pa kumukookyela na kulonda matabula aaye. (Mateo 7:24-27; 1 Mpyeele 2:21) Bible amba’shi: “Akumiina Mwana ee na muuwa wa iikalaika; apele kukumiina Mwana, taapete muuwa.”​—Yowano 3:36.

Myanda yabadi besambile mu Yowano 3:16

Yesu bakwile ano mayi pabadi esamba na mukata a bena Yuuda abetamina bu Nikodeme. (Yowano 3:1, 2) Mu wawa mwisambo, yesu badi mwakule kantu pa kantu myanda itale Bufumu bw’Efile Mukuluc mpana “kutandjikwa dyakabidi.” (Yowano 3:3) Badi mutemukye dingi mushindo w’akyebe kufwa. “Bibuwa bebwesha Mwan’a muntu [bamupudikye ku mutshi], bwa’shi ooso akumiina, aikeele na muuwa wa iikalaika kwadi.” (Yowano 3:14, 15) Badi mushinkamishe’shi luno lufu lwaye alulesha kifulo kikata ky’Efile Mukulu kwi bantu. Yesu badi mufudishe pa kupatuula’shi bwa kupeta muwa, abitungu twikale na lukumino na kukita abisangasha Efile Mukulu.​—Yowano 3:17-21.