1 Mpyeele 5:6, 7—“Eyisheyi muushi mw’eyaasa di bukome di’Efile Mukulu, . . . Nwamutudilanga kinyongwa kienu kioso”

“Biabia eyisheyi muushi mu’eyasa di bukome di’Efile Mukulu, bua’shi enukaamishe pa nsaa ilombane, panukuete kumusumbuila tuinyongoshi tuenu toso, muanda kuete kuikalakasha buenu.”​—1 Mpyeele 5:6, 7, Traduction du monde nouveau.

“Biabia eyisheyi muushi mw’eyaasa di bukome di’Efile Mukulu, bwa’shi enukaamishe apalombana kipindji, nwamutudilanga kinyongua kienu kioso, mwanda’ye kwete kwinulama.”​—1 Mpyeele 5:6, 7, Kilombeno kipya 2014.

Akipatuula 1 Mpyeele 5:6, 7

Na ano mayi, Mpyeele mutumibua ashinkamiisha bena Kidishitu’shi mbalombene kuela nteko kui Efile Mukulu pabitale nkalakashi na mianda yabadi nayo na lukupilo loso. Efile Mukulu ataa bantu ba sha kuiyisha na muulo, na akebelela miabi ikile bungi.

“Eyisheyi . . . Muushi mu’eyasa di bukome di’Efile Mukulu.” Misusa ibungi mu Bible, eyasa di’Efile Mukulu adileshaa bukome buaye bua kupaasha na kukaluila. (Efilu 3:19; Miiya Ikituulwe 26:8; Esela 8:22) Bena Kidishitu abeyishaa muushi mu’eyasa di’Efile Mukulu nsaa y’abakulupila muadi. Abashinguula pe kufudiila kuabo na kukumiina’shi ta mbalombene kukambila bitompuanga ku bukome buabo’bo banabene. (Nkindji 3:5, 6; Bena-Fidipe 4:13) Abashinkamisha’shi Efile Mukulu e na bukome bua kuibakuasha pa nsaa ilombane na mu mushindo ukile buwa.​—Yeeshaya 41:10.

“Bua’shi enukaamishe pa nsaa ilombane.” Booso abanyingiila bitompuanga na luishinko loso mbalombene kushinkamisha’shi ku nfudiilo Efile Mukulu ebakaamisha sunga kuibelela muabi. T’akatadiila’shi balanguidi baaye bebatompe bua loso sunga mu mushindo ukile ngobesha yaabo nya. (1 Bena-Kodinda 10:13) Mu kuilekena na biabia, su abakitshi mianda ibuwa, ku nfudiilo Efile Mukulu akebapa buedi “pa nsaa ilombane.”​—Bena-Ngalatea 6:9.

“Panukuete kumusumbuila tuinyongoshi tuenu toso, muanda kuete kuikalakasha buenu.” Bena Kidishitu mbalombene kusumbula, sunga kutuula tuinyongoshi tuabo kui Efile Mukulu pa kuela nteko kuadi. Ungi mukanda aupatuula’shi: “Muaku kutuula aulesha kuitatshisha bua kukatusha kintu kampanda kula noobe. Aulesha kukita mu kukumiina koobe.” Nsaa i muina Kidishitu asumbuila Efile Mukulu bushito buaye, mmulombeene kupeelesha kenyongoshi kaaye na kupeta kino kiabetamina mu Bible bu “butaale bu’Efile Mukulu.” (Bena-Fidipe 4:6, 7) Mmulombene kushinkamisha’shi Efile Mukulu akumiina kumukuasha muanda kuete kuikalakasha buaye na’shi e kufuba na bukome Buaye bukile bungi bua kumukuatshishena.​—Misambo 37:5; 55:22.

Mianda yabadi besambile mu 1 Mpyeele 5:6, 7

Shapitre 5 nyi nfudiilo a mukanda wa kumpala ubaadi Mpyeele mutumibua mutumine bena Kidishitu. (1 Mpyeele 1:1) Balongi ba Kidishitu mu aa mafuku, nka biabidi mpa na lelo, babaadi mu bitompuanga bibungi bia lukumiino luabo na bibaadi bilombene kuibatuadila kenyongoshi. (1 Mpyeele 1:6, 7) Bu bibaadi auku nkalakashi yaabo, Mpyeele baadi muibafundile mukanda wa kuibadimusha na kuibanyingisha pepi mu kipua kia 62-64 B.B.​—1 Mpyeele 5:12.

Mpyeele afudiisha mukanda waaye n’elango adinyingisha baaba be mu kutompibua muanda wa lukumiino luabo. Su abashaala beyishe na kukulupila mui Efile Mukulu, mbalombene kushinkamisha’shi ebakuasha buabadia kunyinga. (1 Mpyeele 5:5-10) Mu mushindo umune mayi a Mpyeele ngalombene kunyingisha dingi bena Kidishitu babakuete kukiengiesha lelo uno.

Tala kano kapindi ka video bua kumona mianda i mu mukanda wa 1 Mpyeele.