Mushindo wa kuuka kutuala mashito

KUUKA KUTUALA MASHITO AKUTEKIE KINYI?

Muntu auku kutuala mashito nyi mmuntu a kukulupila. Su abamutekie bua kukita kintu kampanda, ekikitshi kalolo pa nsaa ilombane.

Sunga bakii bakinga, bana mbalombene kulonga bia kutuala mashito. Ungi mukanda wa (Parenting Without Borders) awamba’shi: “Su nka muana balombasha mieshi ekumi na itano, abangaa kukita mianda yabamutekie kui baledi baaye bua’shi akite, na su balombasha mieshi ekumi na muanda, akumiinaa kukita mianda yoso yabakitshi kui baledi baaye. Mu maumbo ebungi baledi abalongieshaa bana bia kunyigisha ngobesha yaabo nsaa yabalombasha bipua bitano sunga musambobidi, na bana be mu bino bipua abakuashaa baledi na midimo ya mu nshibo.”

BUAKINYI KUUKA KUTUALA MASHITO KUI NA MUULO?

Mu maumbo ebungi ba nsongua abakatukaa mu mashibo a baledi baabo na benda mu kushaala pa buabo, anka abafumankanaa na nkalakashi, na abalukilaa ku nshibo ya baledi baabo. Ingi nsaa abikitshikilaa ba nsongua su baledi baabo ta mbebalongieshe bia kufuba na ekuta, kutuala mashito a mu nshibo, sunga mianda ya mu nshalelo a kuifuku n’efuku.

Biabia, bi na muulo bua’shi olongieshe muana aukie bia kutuala mashito pakii mukinga buadia kuuka bia kuiatuala p’akulu. Ungi mukanda wa (How to raise an adult) awamba’shi: “Ta bibuwa kutadiila muana bua’shi atuule lukulupilo luaye looso nka kodi mpa na bialombasha bipua ekumi na muanda, akupu nyi omulekie ende pa buaye.

MUSHINDO WA KULONGIESHA BANA BIA KUTUALA MASHITO

Ebape midimo ya mu nshibo.

ELANGO DIA MU BIBLE: “Mudimo ooso autuushaa kipeta kiibuuwa.”​—Nkindji 14:23.

Bana abakumiinaa kufuba pamune na baledi baabo. Yaaya nyi nsaa yodia kuibapa midimo ya mu nshibo.

Bangi ba nambutuile t’abakumiinaa kuibikita nya. Abapuandikisha’shi bana be ku kalasa abekalaa na ma devuare ebungi a kukita, kuibapa midimo ya mu nshibo kui nka bu kuibatenteka bushito bukile bukopo.

Anka, bana abafubaa midimo ya mu nshibo abalongaa kalolo ku kalasa, muanda midimo ya ku nshibo ayibakuasha buabadia kuikala abatuala mashito mpa na kupudisha midimo yabadi bebape. Kukatusha biabia, mukanda wa (Parenting Without ­Borders) awamba dingi’shi: “Su tatui bape bana midimo nsaa yabadi na lukalo lua’shi tuibape yanka, abapuandikisha’shi kukuasha bangi takui na muulo nya . . . Abekala abatengiela nka’shi bangi bebafubile.”

Anka abilesha ano mayi, midimo ya ku nshibo ayilongieshaa bana bua’shi baukie bia kukuasha bangi na kuibapa bintu. Midimo ya mu nshibo ayikuashaa bana bua’shi bamone’shi be na muulo mu kifuko kiabo na’shi be na kia kukuasha bangi.

Kuasha muana bua’shi akumiine kilubilo kiaye nsaa y’aluisha.

ELANGO DIA MU BIBLE: “Teemesha elango na okumiine dinyoka bua’shi wekale na binangu mu mafuku e kumpala.”​—Nkindji 19:20.

Nsaa i muana oobe bakitshi kilubilo​—bu kileshesho, su muana oobe mulume sunga mukashi baluisha kintu kia mungi muntu sunga mu masaku, tofuamishanga kilubilo kiaye. Kuasha muana akumiine kilubilo kiaye, bu kileshesho ende mu kuteka lusa kui sha kintu ingi nsaa sunga kuikifuta.

Su muana balongo bia kukumiina kilubilo kiaye, abimulongiesha

• kuakula bia binyibinyi na kukumiina bilubilo biaye

• kupela kusumbuila bangi muanda

• kupela kukimba kuibingisha

• kuteka lusa, nsaa ayitungu kuiluteka