Mwanda wa 3

Adame na Eeva

NKINYI kilekene mu kino kifwatulo? Olo, mbantu be mwanka. Nyi mulume na mukashi ba kumpala. Nanyi mwibapangye? Nyi Efile Mukulu. Ouku eshina dyaaye su? Eshina dyaaye Yehowa. Mulume na mukashi abaadi abebetanyina bu Adame na Eeva.

Tala mushindo ubaadi Yehowa, Efile Mukulu mwibapangye. Baatshile lufufi lwa nsenga na aye nkukita mbidi ipwidikye, mbidi ya mulume. Aye nkupwila muwa mu mpembe yaaye, na Adame nkwikala na muwa.

Yehowa Efile Mukulu bapeele Adame mudimo. Balungwile Adame shi audikye nyema ya mishindo yooso mashina. Abimweneka shi Adame baadi mutale nyema munda mwa mafuku ebungi bwashi asangule eshina dibuwa bwa nyema ooso. Nsaa ibaadi Adame audika nyema yooso mashina babangile kumona kingi kintu. Ouku kyakya kintu su?

Nyema yooso ibaadi mulume na mukashi. Kubaadi ngyefu mulume na ngyefu mukashi, na kubaadi ntambwe mulume na ntambwe mukashi. Kadi ta kubaadi su ngumune mulombeene kwikala mukashi a Adame nya. Ndjo Yehowa nkuladisha Adame tulo twi bukopo, aye nkwata lubafu lwaye lumune. Na lwalwa lubafu, Yehowa bakitshine mwana mukashi, aye nkufika mukashi a Adame.

Muloo kinyi ubaadi nawo Adame yaya nsaa! Banda kunangushena muloo ubaadi ulombeene kwikala nawo Eeva pakushaala mu lupango lwibuwa bino! Binobino abaadi na mushindo wa kutanda bana na kwikala booso na muloo.

Lukalo lwa Yehowa lubaadi lwa shi Adame na Eeva bekale na muwa wa looso. Baadi na lukalo lwashi nsenga ishima ilongame nka bu bi lupango lwa Edene. Nsaa ibabebalungwile wawa mwanda, Adame na Eeva abaadi na muloo wi kashaa! Bodya kwikala na muloo wa kukwasha bwa kulongamisha nsenga yafika bu lupango lwibuwa su? Kadi muloo wa Adame na Eeva taubaadi wa mafuku ebungi nya. Tubande kutala bwakinyi.

Misambo 83:18; Kibangilo 1:26-31; 2:7-25.