Mwanda wa 2
Lupango lwa Edene
BANDA kutala ino nsenga! Tala mushindo wi bintu byooso bibuwa! Banda kutala lubishi na mitshi, bilongo na nyema yooso. We mukumbeene kutuundula ngyefu na ntambwe su?
Mushindo kinyi utukye luno lupango lwibuwa bino? Bibuwa, tubande kutala mushindo ubaadi Efile Mukulu mulumbuule nsenga.
Kumpala, Efile Mukulu bakitshine lubishi bwa kupuuta nsenga. Aye nkukita bisuku, mitshi ikata na ipeela ya mishindo yooso. Bino bintu byooso abilongamisha nsenga. Kadi tabi kwanka nka penda bwa kulongamisha nsenga nya. Bibungi bikwete kwitupa bya kudya bibuwa.
Kunyima Efile Mukulu bakitshine mishipa ya mu mema na tonyi twa mwiyilu. Bakitshine mbwa na tuwushi na tubalo; nyema ikata na nyema ipeela. Nyema kinyi youku? Tatwi bakumbeene kwikala na muloo mwanda Efile Mukulu mwitukitshine bino bintu byooso su?
Kunyima, Efile Mukulu balumbulwile kipindji kya nsenga akyo nkufika mbalo imune ibuwa bukile. Bayitanyine ino mbalo bu lupango lwa Edene. Lubaadi buwa bukile. Bintu byooso bibaadi mwanka bibaadi buwa ngofu. Lukalo lwa Efile Mukulu lubaadi lwa shi nsenga yooso ishima ikale nka bu luno lupango lubakitshine.
Kadi banda kutala dingi kifwatulo kya luno lupango. Ouku kibamwene Efile Mukulu shi nkikutshikwe mwanka su? Tubande kutala.