Mwanda wa 6

Mwana ebuwa, na mwana ebubi

BANDA kutala Kaayine na Abele. Booso bwabo abapu kukula. Kaayine taadi kidime. Mukune mitshi ya ntente, ya bimuma na bisaki.

Abele nyi mulami a mikooko. Mufule kulama twana twa mikooko. Ikwete kukula bu mikooko ikata, na binobino Abele taadi na loombe lwa mikooko ya kwete kulama.

Dingi efuku Kaayine na Abele abayile mu kulambula Efile Mukulu. Kaayine balambwile ndambo ya bya kudya bibaadi mudime. Abele namu balambwile mukooko waaye ukile buwa. Yehowa bakumiina Abele na mulambu waaye. Kadi tamukumine Kaayine na mulambu waye nya. Ouku shi mbwa kinyi?

Ta mpenda mwanda washi Abele balambula mulambu ukile wa Kaayine nya. Mwanda Abele nyi muntu ebuwa. Mufule Yehowa mpa na mukwabo. Kadi Kaayine ebubi; ta mufule mukwabo nya.

Byabya Efile Mukulu balungula Kaayine shi abitungu ashintuule nyikashi yaaye. Kadi Kaayine tamupushe nya. Mufiite munda ngofu mwanda Efile Mukulu mufule Abele ngofu. Ndyo Kaayine nkulungula Abele shi: ‘Twende ku mafuba.’ Kwakwa, nsaa ibabadi bupenka bwabo, Kaayine bakupiile mukwabo Abele. Bamukupiile bi bukopo aye nkumwipa. Kyakya ta nkibeshi kibakitshi Kaayine su?

Sunga Abele bafwile, Efile Mukulu kwete kumutentekyesha. Abele baadi muntu ebuwa, na Yehowa ta mukumbeene kuluba muntu e byabya nya. Byabya, dingi efuku Yehowa Efile Mukulu akasangusha Abele ku lufu. Mu yaya nsaa Abele takafu dingi nya. Akekala na mushindo wa kupeta muwa wa looso pa nsenga. Kuuka bantu bebuwa bu Abele takwi buwa su?

Kadi Efile Mukulu takuminaa bantu be bu Kaayine nya. Nyi bwakinyi kunyima kwa Kaayine kwipaa mukwabo, Efile Mukulu baadi mumunyokye aye nkumutuma kula na bakwabo. Nsaa ibayile Kaayine mu kushaala mu ingi mbalo, bayile na umune a ku ba nkasha-naaye, aye nkumwata bu mukashi aaye.

Mu aa mafuku Kaayine na mukashi aaye ababangile kutanda baana. Bangi baana balume na bakashi ba Adame na Eeva abayibakiile na abatandile baana. Mu mafuku apela bantu abafiimine pa nsenga. Tubande kulonga myanda itale bangi ba kwabadi.

Kibangilo 4:2-26; 1 Yowano 3:11, 12; Yowano 11:25.