Mwanda wa 14
Efile Mukulu atompo Abrahame
OKWETE kumona kikwete kukita Abrahame pano su? E na kapete, na abimweneka nka bu akyebe kwipa mwana aaye. Bwakinyi akyebe kukita byabya? Kya kumpala tubande kutala mushindo ubaadi Abrahame na Sara bapete mwana aabo.
Tentekyesha shi, Efile Mukulu baadi mwibalee shi abakapete mwana. Kadi byabya bibaadi abimweneka bu bishi bilombeene kukitshika, mwanda Abrahame na Sara abaadi bapwe kununupa. Kadi Abrahame baadi mukumiine nshi Efile Mukulu mulombeene kukita kintu kyooso akimweneka bu kibukopo. Byabya nkinyi kibakitshikile?
Kunyima kw’Efile Mukulu kwibapa wawa mulayilo, kubakidile kipwa kishima. Akupu, nsaa ibaadi Abrahame na bipwa 100 Sara namu na bipwa 90, abatandile mwana mulume umune ababapele eshina bu Isaake. Efile Mukulu baadi mulombashe mulayilo waye!
Kadi, nsaa ibakudile Isaake, Yehowa batompele lukumino lwa Abrahame. Aye nkwamba shi: ‘Abrahame!’ Abrahame nkwalula shi: ‘Nnami uno!’ Akupu Efile Mukulu bambile shi: ‘Ata mwana oobe mulume, eleka dyoobe Isaake, na nwende ku mwengye wankulesha. Kwakwa oyipee mwan’oobe omulambule bu mulambu.’
Byabya bishima bibaadi binyongamishe Abrahame, mwanda baadi mufule mwana aaye ngofu. Na dingi tentekyesha shi Efile Mukulu baadi mulee shi beekulu ba Abrahame abakashaala mu nsenga ya Kanaana. Kadi byabya bibaadya kulombana naminyi su Isaake baafu? Abrahame tabaadi muukye mushindo wabikitshika nya, sunga mbyabya baadi mukokyele Efile Mukulu.
Pababafikile ku mwengye, Abrahame banyine Isaake myoshi na aye nkumutuula pa kilambwilo kibaadi mwibakye. Akupu aye nkwata kapete bwa kwipa mwana aaye. Kadi mu yaya nsaa mwikeyilu a Efile Mukulu bamwitamine shi: ‘Abrahame, Abrahame!’ Abrahame nkwalula shi: ‘Nnami uno!’
Efile Mukulu nkwamba shi: ‘Totapanga nsongwalume sunga kumukita kintu su nkimune. Mwanda binobino nauku shi we na lukumino mwandi, mwanda twemupele kumpa mwana oobe umune, eeleka.’
Abrahame baadi na lukumino lwi kashaa! Baadi mukumiine shi ta kwi kintu kilombeene kukambila Yehowa na shi Yehowa baadi mukumbeene kusangusha Isaake ku lufu. Kadi binyibinyi Efile Mukulu tabaadi na lukalo lwashi Abrahame ayipee Isaake nya. Nyi bwakinyi Efile Mukulu bakitshine bwashi mukooko ukwatshikye nsengwa mu mitshi ibaadi pepi, aye nkulungula Abrahame bwashi eulambule pamutwe pa kulambula mwana aaye.