Mwanda wa 16
Isaake bayibakila mukashi ebuwa
OUKU uno mukashi e mu kifwatulo su? Eshina dyaye nyi Rebeka. Na mulume afiki mu kufumankana naaye nyi Isaake. Ayikala mukashi aaye. Mushindo kinyi ubabidi bikitshikye?
Oolo, Abrahame nshaaye na Isaake baadi na lukalo lwa kumwatshila mukashi ebuwa. Tabaadi akumina shi Isaake ebakile mukashi a mu Kanaana nya, mwanda beena Kanaana abaadi abalangwila b’efile ba madimi. Ndjo Abrahame nkwitamina mufubi aaye nkumulungula shi: ‘Nakyebe wende mu Harane, mu kifuko kyande mu kwata mukashi bwa mwana ande Isaake.’
Mufubi a Abrahame nkwata shamo ekumi aye nkwenda lwendo lula. Pabafikile pepi na mbalo ibaadi ishale beena kifuko kya Abrahame, bayimene pepi na bwina bwa mema. Nguba baadi mupwe kukila ku kyolwa, nsaa ibaadi ayifiki baana bakashi mu kutapa mema mu bwina. Mufubi a Abrahame nkwela luteko kwi Yehowa aye nkwamba shi: ‘Nsongwakashi ampa mema na atomesha ma shamo, yawa nyi oyikala musangwile mufubi oobe Isaake.’
Mu kapindji naaka Rebeka bafikile mu kutapa mema. Mufubi pabamutekyele mema, Rebeka bamupele. Akupu aye nkwenda mukutapa mema ebungi bwa shamo yooso ibaadi na nyota. Ubaadi mufubo wibukopo mwanda shamo ayitomaa mema ebungi bwikashaa.
Nsaa ibapwile Rebeka kutapa mema, mufubi a Abrahame bamwipwishe eshina dya nshaye. Ba mwipwishe su mulombeene kukisha bufuku kwabo. Rebeka nkumwalula shi: ‘Ne mwana a Betwele, kwetu kwi mbalo ya kulala.’ Mufubi a Abrahame baadi auku shi Betwele baadi mwana a Nahore mukwabo na Abrahame. Ndjo aye nkukunama bwa kutumbula Yehowa mwanda bamukunkusha mu kifuko kya Abrahame.
Bwabwa bufuku mufubi a Abrahame balungwile Betwele na Labane mukwabo na Rebeka kibaadi kimufwishe. Abo booso abakuminyine shi Rebeka mukumbeene kwenda naaye bwashi Isaake amwibakile. Kadi Rebeka bambile naminyi pababamwipwishe? Bambile shi: ‘Oolo,’ nende. Pabubatoko abo nkukamina ku shamo bwa kubanga lwendo batadiile ku Kanaana.
Pababafikile, kubaadi ku kyolwa. Rebeka bamwene mwana mulume kwete kutambuka mwifuba. Yawa baadi Isaake. Baadi na muloo wa kumona Rebeka. Nyinaaye Sara baadi mupwe kufwa takubaadi kukile bipwa bisatu, kadi Isaake baadi kii na bushiye. Isaake babangile kufula Rebeka ngofu aye’nyi nkusangala bikile.