Mwanda wa 20
Dina bapete malwa
OMONO bantu abende Dina mu kutembela su? Kwete kwenda mu kutembela bangi bansongwakashi ba mu Kanaana. Nshaaye Yaakobo baadi mulombeene kusangeela kino kintu su? Bwa kwalula ku luno lukonko, banda kutentekyesha bibaadi binangu bya Abrahame na Isaake pabitale bakashi ba mu Kanaana.
Abrahame bakuminyine shi Isaake ayibakile mukashi a beena Kanaana su? Nya, tabakuminyine nya. Isaake na Rebeka abakuminyine bwashi mwana aabo mulume Yaakobo ayibakile mukashi a mu Kanaana su? Nya, tababakuminyine. Ouku shi mbwakinyi?
Mwanda baba bantu ba mu Kanaana abaadi abalangwila b’efile ba madimi. Tababaadi bantu bebuwa kwata bu balume sunga bu bakashi na tababaadi bantu bebuwa kudya nabo bukuuku nya. Byabya twi kwamb’eyendo shi Yaakobo tabaadya kukumina shi mwana aaye mukashi ekwatene bulole na ba nsongwakashi ba mu Kanaana nya.
Nka bu byabibaadi bimulombeene, Dina bapetele malwa. Okwete kumona mu kifwatulo mwana mulume a beena Kanaana kwete kutala Dina su? Eshina dyaaye Sikeme. Dingi efuku, Dina bayile mu kutemba, Sikeme bakwatshile Dina aye nkulala naaye pa bukopo. Byabya bibaadi bubi, mwanda nka penda mulume na mukashi beyibakishene ndyo balombeene kulala pamune. Kino kintu kibubi kibaadi Sikeme mukitshine Dina kibatwadile nkalakasho ibungi.
Nsaa ibapushishe batutu baaye, abafitshile munda ngofu. Babidi ba kwabadi, Simeone na Leevi, abaadi bakwate nsungu ngofu abo nkwata tupete nkwenda mu lupata nkukwata balume booso. Abo na bakwabo abaadi bayipe Sikeme na bangi balume booso. Yaakobo baadi mufite munda mwanda baana baaye balume abakitshine kintu kibubi.
Kano kafutakanyi kababangile bikwanyi? Mwanda Dina baadi mwikwatene bu lole na bantu bashi baadi abakokyela miiya y’Efile Mukulu. Tabitungu twikale na bakuuku be byabya nya, ta nabyo su?