Mwanda wa 21
Abashikwa Yoosefe kwi bakwabo
BANDA kutala uno nsongwalume byadi mwinyongole. Uno nyi Yoosefe. Bakwabo abakatuka mu kumupana kwi bano bantu bakwete kwenda ku Ejiipitu. Kwakwa Yoosefe akekala mpika. Bwakinyi bakwabo ba mwa nshaaye abakitshi kintu ki bino? Mwanda mbakwatshile Yoosefe kiutu.
Nshaabo Yaakobo baadi mufule Yoosefe ngofu. Baadi mumuleshe kalolo pabamupele kilamba kibuwa. Batutu baaye 10 pababamwene mushindo ubaadi Yaakobo mufule Yoosefe, ababangile kukwata kiutu na kushikwa Yoosefe. Kadi abaadi bamushikwe bwa ungi mwanda.
Yoosefe baadi mulote bilotwa bibidi. Mu bilotwa byooso Yoosefe balotele bakwabo bakwete kumukunamina. Yoosefe pabalungwile bakwabo bino bilotwa, abanyishile kumushikwa.
Dingi efuku batutu ba Yoosefe abaadi abalama mikooko ya nshaabo, ndjo Yaakobo nkulungula Yoosefe bwashi ende mukutala bi bakwabo booso. Bakwabo na Yoosefe pababamumwene kwete kufika, bangi abambile shi: ‘Tumwipeeyi!’ Kadi Rubene mukulu a booso bakwile shi: ‘Nya tatumwipaanga!’ Sunga mbyabya abakwatshile Yoosefe abo nkumwela mu bwina bushi mema. Akupu abo nkushala bwa kumwatshila kitshibilo.
Mu yaaya nsaa bangi baana balume beena Ismaele abafikile. Yuuda balungwile bakwabo ba mwa nshaaye shi: ‘Tumupaneyi kwi beena Ismaele.’ Ndjo abo nkumupaana. Abapaanyine Yoosefe ku nfwalanga 20. Bomono mushindo ubabadi bakutwe lusa?
Bakwabo na Yoosefe abakalungula nshaabo kinyi? Abo nkwipaa mbushi, nkwela kilamba kya Yoosefe kibuwa mu mase a mbushi. Akupu abo nkwenda na kilamba ku nshibo kwi nshaabo na abo nkumulungula shi: ‘Tubasangana kino kilamba. Banda kutala, tundula su nkilamba kya Yoosefe.’
Yaakobo nkutundula. Aye nkwela musase shi: ‘Nyema a bukyelo baadi Yoosefe.’ Bakwabo na Yoosefe abaadi abakyebe shi nshaabo apwandikishe byabya. Yaakobo benyongwele ngofu. Baadidile munda mwa mafuku ebungi. Kadi Yoosefe tabaadi mufwe nya. Tubande kutala akikyebe kufwila Yoosefe kwakwa kwabadi bende naaye.