Mwanda wa 25
Kifuko kibende mu kushala mu Ejiipitu
YOOSEFE tobesha dingi kunyinga eshimba nya. Alungula bafubi baaye booso bwashi batuukye mu nshibo. Nsaa ibashala bupenka mu nshibo na bakwabo, Yoosefe babanga kudila. Twi balombeene kumona mushindo ubaadi bakwabo abakanya ngofu, mwanda tabawuku akimudidisha. Kunyima aye nkulungula bakwabo shi: ‘Nee Yoosefe. Yaaya kyaatala?’
Bakwabo bakwete kukanya tabobesha kwakula dingi. Bakwete kupusha moo. Kadi Yoosefe bebalungula shi: ‘Eseeseleyi pepi naami.’ Pababeseesela pepi naaye bebalungula shi: ‘Nee Yoosefe mukwenu, nnaami anubaadi baudishe mu Ejiipitu.’
Yoosefe batungunuka na kwisamba nabo na kalolo kooso shi: ‘Tanwikalanga anwikalakasha mwishimba bwa panudi bampane kuno. Mwanda Efile Mukulu nyi mwikuntume kumpala kwenu bwa kwinulama na muwa. Faraone muntuule bu nfumu a dino eumbo. Byabya kosomoshayi bwa kwaluka dimo kwi nshaami bwa kumulungula bino. Na numulungule afikye mu kushaala pano.’
Akupu Yoosefe boolola maboko bebakwata kiipa na dingi abefifyena ku milomo. Nsaa ibapusha Faraone shi bakwabo na Yoosefe abafiki, balungula Yoosefe shi: ‘Lungula bakwenu bebweshe matempu aabo bende mu kwata nshaabo na bifuko byabo akupu balukye kuno. Nakyebe kwibapa kipindji kya nsenga kikile buwa mu Ejiipitu mushima.’
Babakitshine nka byabya. Pano okwete kumona Yoosefe afiki mu kutundayisha nshaaye pabafikile mu Ejiipitu na kifuko kishima.
Kifuko kya Yaakobo takidi kikile bukata. Nsaa ibabafikile mu Ejiipitu booso bwabo abaadi bantu 70, su twabadika Yaakobo, baana na beekulu baaye. Kadi kubaadi dingi bakashi mpa na bafubi bebungi. Booso bwabo abashalele mu Ejiipitu. Abaadi abebetamina bu beena Isaleele, mwanda Efile Mukulu bashintulwile eshina dya Yaakobo bu Isaleele. Beena Isaleele abekeele bu mwilo w’Efile Mukulu, bu byatukyebe kumona.