Mwanda wa 32

Bipupa ekumi

TALA bino bifwatulo. Kifwatulo kyooso akilesha kipupa kibatumine Yehowa mu Ejiipitu. Mu kifwatulo kya kumpala omono Aarone kwete kukupila mukombo mu Mwela wa Nile. Pabeukupiile, mema abalulukile bu mase. Mishipa ibafwile na mema ababangile kununka.

Akupu, Yehowa batuushile nsobya mu Mwela wa Nile. Ibaadi ipalakane mbalo yooso mu mafuwa, mu mishete ya mikate mpa na muushi mwa nsala ya bantu. Pabafwile nsobya beena Ejiipitu abeyibungile mituuto ikata na dingi eumbo dishima dibaadi adinunku.

Aarone bakupiile mukombo mu lusenga alo nkwaluluka tumwe tubaadi atusumu bantu na nyama. Tumwe tubaadi bu kipupa kya kasatu mwiumbo dya Ejiipitu.

Bingi bipupa bibaadi abikengyesha penda beena Ejiipitu, kushi kukyengyesha beena Isaleele. Kipupa kya kananka kibaadi kya bìbùwà bibaudile mu mashibo a beena Ejiipitu. Kipupa kya katano kibaadi ku nyama. Ngombe na mikooko na mbushi ibungi ya beena Ejiipitu ibafwile.

Akupu, Moyiise na Aarone abaatshile ndambo ya buto na abo nkwiyela mu lupapi. Bwabwa buto bubapeele mbantu na nyema mpusu ikata. Kino kibaadi kipupa kya kasamombo.

Kunyima, Moyiise beelele mboko mwiyilu na Yehowa batumine tupandapanda na mpeshi a mabwe. Tubaadi tupandapanda twabashapushishe mu Ejiipitu kashaa.

Kipupa kya mwanda kibaadi kya kisaka kya nshiye. Kasha tabamwene nshiye ibungi byabya nya. Ibadiile bintu byooso bibalekyele mpeshi a mabwe.

Kipupa kya kitema kibaadi kya mufito. Munda mwa mafuku asatu eumbo dishima dibaadi mu mufito ukata kadi mbalo yooso ibaadi beena Isaleele ibaadi mwitaata.

Akupu, Efile Mukulu balungwile mwilo waaye bwashi bashingye mase a mwana mbushi sunga a mwana a mukooko ku ma ntempa a biibi byabo. Kunyima mwikeyilu a Efile Mukulu bakidile mu Ejiipitu. Nsaa ibamwene mwikeyilu mase, tabayipayile muntu su ngumune baadi mu yaya nshibo nya. Kadi mu mashibo ooso mushibaadi mase ku ma ntempa a biibi, mwikeyilu a Efile Mukulu bayipanga mwana mbedi ooso na nyema ooso mutandikye kwibedi. Kyakya kibaadi kipupa ky’ekumi.

Kunyima kwa kino kipupa kya nfudiilo, Faraone balekyele beena Isaleele bwashi bende. Mwilo w’Efile Mukulu ubaadi upwe kwilumbuula bwa kwenda, na dingi mu bwabwa bufuku ababangile lwendo bwa kutuuka mu Ejiipitu.

Efilu shapitre a 7 mpa na ku 12.