Mwanda wa 36
Nkishi a mwana a ngombe
A NKINYI kya! Bakwete kukita kinyi? Bakwete kulangwila mwana a ngombe! Bwakinyi abakitshi byabya?
Pabayishile Moyiise ku mwengye, bantu abakwile shi: ‘Uno Moyiise tatuuku kibamukitshikila. Byabya tukiteyi efile a kutambuka kumpala kwetu mu ino nsenga.’
Aarone mukwabo na Moyiise bambile shi: ‘Bibuwa. Katushaayi tudibu twa oòlò nwituntwadile.’ Pabafikile bantu na tudibu kwadi, Aarone baadi mwitusunguule aye nkukita nkishi a mwana a ngombe a oòlò. Bantu abo nkwamba shi: ‘Tala Efile Mukulu eetu, mwitutushe mu Ejiipitu!’ Beena Isaleele abaadi na feete mukata, abo nkulangwila nkishi a mwana a ngombe.
Pabamono Yehowa byabya, bafiitshi munda ngofu. Aye nkulungula Moyiise shi: ‘Alaala. Mwilo ubelwishisha. Abayilwankana miiya yande na bakwete kulangwila nkishi a mwana a ngombe.’
Moyiise bayikile ku mwengye. Na pabafikile pepi, tala bibaadi mumone. Mwilo ukwete kusha kumpala kwa nkishi a mwana a ngombe! Moyiise mufiite munda ngofu aye nkufika mu kusumbula mpelwa ya mabwe ibaadi na miiya ayo nkutanyika tupesetupese. Aye nkwata nkishi a mwana a ngombe nkumusunguula pashi. Akupu aye nkumufinga bukula.
Bantu abakitshine kintu kikile bubi. Moyiise nkulungula bangi bantu bwashi baate tupete twabo. Moyiise bambile shi: ‘Abitungu shi bantu bebubi booso abaadi balangwile nkishi a mwana a ngombe bafwe.’ Na abo nkwipaa bantu 3 000! Bino tabilesha shi abitungu twikale badimukye na tulangwile penda Yehowa kushi kulangwila b’efile ba madimi su?