Mwanda wa 35

Yehowa apa Isaleele Miiya

MYESHI bu ibidi kunyima kwa kutuka mu Ejiipitu, beena Isaleele abayile ku Mwengye wa Sinayi, wabetamina dingi bu Horebe. Pa ino mbalo imune nyi pabaadi Yehowa mwisambe na Moyiise mu efufu dya kaalo. Beena Isaleele abashaleele pano bwa kapindji kapeela.

Nsaa ibaadi bantu bakwete kutengyela, Moyiise bakamiine ku mwengye. Kwakwa ku nsongo kwa mwengye, Yehowa balungwile Moyiise shi Aye akyebe beena Isaleele bekale abamukokyela na bekale mwilo Waaye. Nsaa ibayikile Moyiise ku mwengye, balungwile beena Isaleele bi bakwile Yehowa. Mwilo nkwamba shi abakyebe kukokyela Yehowa, mwanda abakumina kwikala mwilo waaye.

Binobino Yehowa bakitshine kingi kintu kya kukanya. Batushishe miishi ku nsongo kwa mwengye na akupila tupandapanda twi bukopo. Balungwile mwilo dingi shi: ‘Naami Yehowa Efile Mukulu enu mwinutushe mu Ejiipitu.’ Akupu aye nkwibapa uno mwiya: ‘Tanwikalanga na bangi b’efile kumpala kwande.’

Efile Mukulu bapeele beena Isaleele ingi miiya kitema. Bantu abaadi na moo ukata. Abalungwile Moyiise shi: ‘Akula obe nabeene, atupusha, kadi Efile Mukulu takulanga neetu, mbilombeene kwikala lufu lwetu.’

Kunyima Yehowa balungwile Moyiise shi: ‘Kaamina kwandi ku mwengye. Oshale bwashi nkupe mpelwa ya mabwe ibidi, yandi mufunde miiya yankumina shi bantu balonde.’ Moyiise bayiile dingi ku mwengye. Bashalele ku mwengye munda mwa mafuku 40 bufuku na kanya.

Efile Mukulu baadi na miiya ikile bungi ya kupa bantu. Moyiise bafundile ino miiya. Efile Mukulu bapeele dingi Moyiise mpelwa ibidi ya mabwe. Aye nabeene bafundile miiya 10 ibaadi mulungule mwilo ushima ku mpelwa ya mabwe. Abeyitamina bu Miiya Ekumi.

Miiya Ekumi ina muulo ukata. Bi mumune na yaaya ingi miiya ibungi ibaadi Efile Mukulu mupe beena Isaleele. Umune wa ku yaaya miiya awamba shi: ‘Ofule Yehowa Efile Mukulu oobe n’eshimba dyoobe dyooso, na binangu byoobe byooso, na bukome boobe booso.’ Ungi mwiya awamba shi: ‘Abitungu ofule muntu noobe buu’be nabeene.’ Yesu Kidishitu Mwana a Efile Mukulu bakwile shi yaaya ndyo miiya ibidi ikile bukata ibaadi Yehowa mupe mwilo wa Isaleele. Kunyima atukyebe kulonga bibungi pabitale Mwana a Efile Mukulu na myanda ibaadi mulongyeshe.

Efilu 19:1-25; 20:1-21; 24:12-18; 31:18; Miiya Ikituulwe 6:4-6; Beena-Leevi 19:18; Mateo 22:36-40.