Mulayilo kui Yehowa

Peepi na mieshi ibidi kunyima ku’abo kukatuka mu Ejiipitu, bena Isalele abaakafikile ku Muengie wa Sinayi, abo nkushaala mu tushibo tua mapema. Yehowa balunguile Moyise buadia kukaamina ku muengie, aye nkumulungula shi: ‘Ne mupaashe bena Isalele. Su bakookiela na kulama miiya yande, abekala muilo wande’mi.’ Moyise baalukiile alungula bena Isalele biabamulunguile kui Yehowa. Abaadi bamualule naminyi? Abambile shi: ‘Kioso kibakula Yehowa, atuikikitshi.’

Moyise baadi mukamine dingi ku muengie. Kuakua, Yehowa bambile shi: ‘Muifuku dia kasatu, nakesamba neenu. Elela muilo mikalo’shi, tanukaaminanga pa Muengie wa Sinayi.’ Moyise bayikile, aye nkulungula bena Isalele buabadia kuilumbuula bua kuteemesha Yehowa.

Kunyima kua mafuku asatu, bena Isalele abamuene mipenyo n’ekumbi dietaata na mufito ku muengie. Abo nkupusha dingi tupandapanda n’eyi dikata dia mpungi. Akupu Yehowa nkuyika mu kaalo kuakua ku muengie. Bena Isalele abapushishe moo abo nkusuusa. Muengie ooso nkubanga kutshinkatshinka, ao nkubuikilua na miishi. Eyi dia mpungi dibanyishiishe kukaamina. Kunyima Efile Mukulu nkuakula shi: ‘Nnaami Yehowa. Tanuikalanga anulanguila bangi b’efile.’

Moyise nkualukiila ku muengie, Yehowa nkumupa miiya bua muilo pabitale biabadi balombeene kulanguila na biabadia kuikala. Moyise nkufunda yaaya miiya na nkuiyibadikila bena Isalele. Abo nkumulaa shi: ‘Atukitshi kioso akiamba Yehowa.’ Abakitshiine mulayilo kui Yehowa. Abaadi beulombashe su?