Mwanda wa 39
Mukombo wa Aarone ubatuusha bilongo
TALA bilongo na bikuba bya mutshi wa amandiye bituukye ku uno mukombo. Uno nyi mukombo wa Aarone. Bino bilongo na bino bikuba bibatuuku ku mukombo wa Aarone penda mu bufuku bumune! Tubande kutala bwakinyi bibatuuku.
Binobino takudi ndambo a mafuku kasha beena Isaleele babanga kutambakana mu kabaaka. Bangi ba munkatshi mwabo tabakwete kwela binangu shi Moyiise nyi atungu kwikala mukunkushi aabo sunga shi Aarone ekale tshiite-mwakwidi e panundu nya. Koree na Datane, Abirame na bantu 250 abaadi abakunkusha mwilo nyi bashibaadi abanangushena wawa mushindo. Abo booso abafikile kwi Moyiise bwa kumulungula shi: ‘Matalwa kinyi anudi nawo bwanudya kwituula kunundu kwetu booso?’
Moyiise balungwile Koree na kisaka kyaaye kyooso shi: ‘Malooba ku namashika nwate tweso twa malaashi na nwele kabanda mwanka. Akupu nufikye ku tabernakele a Yehowa. Atukyebe kumona yawa abakyebe kusangula kwi Yehowa.’
Efuku dibalondele Koree na bantu baaye 250 abafikile ku tabernakele. Bangi bantu bebungi abafikile mu kwibakwatshishena. Yehowa bafitshi munda ngofu. Moyiise bamba shi: ‘Endayi kula na mbalo i pepi na kishalelo kya bano bantu bebubi. Tanukumanga kintu kyabo su nkimune.’ Bantu abapushile, abo nkwenda kula na bishalelo bya Koree, Datane na Abirame.
Akupu Moyiise bamba shi: ‘Pa bino anutundula yawa abadi basangule kwi Yehowa. Nsenga ayikyebe kwibuula na kumina bano bantu bebubi.’
Pabapudisha Moyiise kwakula, nsenga ibabuulukile. Kishalelo na bintu bya Koree na bya Datane na Abirame na bano booso abaadi ku lupese lwabo abaponene mwanka, na nsenga nkwibapuuta. Pababapushishe kudila kwa baba abaadi abapono mu nsenga, abelele misase: ‘Tusukyeyi! Bisumanga nsenga ayiketuminyi namu!’
Koree na bantu baaye 250 bakii pepi na tabernakele. Ndjo Yehowa nkutuma kaalo, ako nkwibashika booso. Akupu Yehowa nkulungula Eleazare, mwana a Aarone, bwashi ate tweso twa malashi twa bano bantu abaafu na shi akite mpuuto a kilambwilo na twatwa tweso. Uno mpuuto a kilambwilo e bu kitundwilo bwa kudimusha beena Isaleele shi takwi ungi muntu kukasha Aarone na baana baaye mulombeene kufuba bu tshiite-mwakwidi a Yehowa.
Kadi Yehowa akyebe kulesha kalolo shi Aarone na baana baaye nyi baadi musangule bwa kwikala ba tshiite-mwakwidi. Byabya balungula Moyiise shi: ‘Lungula mukata a kisamba kyooso kya Isaleele atwale mukombo waye. Mu kisamba kya Leevi, Aarone atwale waye mukombo. Akupu otuule mikombo yooso mu tabernakele kumpala kwa musheete wa kilombeno. Mukombo wa muntu andi musangule bu tshiite-mwakwidi aukyebe kutuusha bilongo.’
Pabubatokyele, Moyiise batadile aye nkupeta mukombo wa Aarone ngumene bilongo na bikuba bya amandiye. Byabya bomono bwakinyi Yehowa bameneshe bilongo ku mukombo wa Aarone su?
Mbadiko 16:1-49; 17:1-11; 26:10.