Mwanda wa 40

Moyiise akupila mukombo ku lubwebwe

BIPWA bibakidi bibungi​—ekumi, makumi abidi, makumi asatu, na makumi asatu na kitema! Na beena Isaleele bakii nka mu kabaaka. Kadi munda mwa bino byooso bipwa Yehowa kwete kulama mwilo waye. Ebapa maana bwa kudya. Kwete kwibakunkusha mu kanya na ekumbi, na bufuku mwidiidi wa kaalo. Munda mwa byabya bipwa byooso bilamba byabo tambisanukye na ngwa yaabo tangibatanyikye.

Binobino twi mu mweshi wa kumpala wa kipwa kya 40 kunyima kwaabo kutuuka mu Ejiipitu. Beena Isaleele bakii bashaale mu Kadeshe. Pano ngi mbalo ibabadi pababatumine bantu 12 bwa nkapuupa nsenga ya Kanaana bipwa 40 kumpala. Miriame taata a Moyiise bafu mu Kadeshe. Na dingi, nka bibabidi kumpala abapete lungi lukalakasho pano.

Bantu abakutwa mema a kutoma. Ndjo ababanga kwidila kwi Moyiise shi: ‘Tubadya kwikala bafwe. Bwakinyi nwi betutushe mu Ejiipitu bwa kwitufisha mu ino mbalo i mpombo bino? Ishi nsenga ya bya kudya, sunga ya kumena mitshi ya nfigiyee, mbalo ishi mitshi ya nfinyo, na mitshi ya grenade. Tamwi sunga mema a kutoma.’

Paapa Moyiise na Aarone abayile mu tabernakele mu kuteka, Yehowa nkulungula Moyiise shi: ‘Bunga kakongye. Kumpala kwabo otumine lubwebwe eyi bwashi lutuushe mema. Alukyebe kutuusha mema ebungi bwashi bantu na nyema yooso batome.’

Ndjo Moyiise nkubunga bantu, aye nkwibalungula shi: ‘Teemeshayi, anwe bashi na lukulupilo mwi Efile Mukulu! Aarone na ami twibalombeene kwinutushisha mema mu luno lubwebwe su?’ Paapa Moyiise bakupila mukombo ku lubwebwe misango ibidi, mema ebungi nkupongoloka ku lubwebwe. Abapete mema ebungi akumbeene kutoma bantu booso na nyema yooso.

Kadi Yehowa bafitshila Moyiise na Aarone munda. Ouku shi mbwakinyi? Mwanda Moyiise na Aarone abaadi bambe shi abo abakyebe kutuusha mema mu lubwebwe. Kadi Yehowa ndjo baadi mutuushe mema. Na bu bi Moyiise na Aarone tambakule bya binyibinyi pabitale uno mwanda, Yehowa bambile shi akyebe kwibanyooka. Aye nkwamba shi: ‘Tanufisha mwiilo wande mu Kanaana.’

Akupu beena Isaleele abakatuka ku Kadeshe. Kunyima kwa mafuku apeela abafiki ku Mwengye wa Hore. Kwakwa, ku nsongo a mwengye Aarone bafu. Baadi na bipwa 123 pabafwile. Beena Isaleele abaadi na bushiye bukata, na mwiilo ubaadi umudile munda mwa mafuku 30. Mwana aaye Eleazaare bafikile bu tshiite-mwakwidi e kunundu bwa mwiilo wa Isaleele.

Mbadiko 20:1-13, 22-29; Miiya Ikituulwe 29:5.