Mwanda wa 38
Ba mpuupa ekumi na babidi
BANDA kutala bikuba byabadi batwale kwi bano bantu. Tala bukata bwi kyakya kisaasa kya bikuba bya nfinyo. Abitungu balume babidi bekitwale ku mukanko. Na tala bikuba bya nfigiyee na bikuba bya grenade. Bino bikuba bibuwa abifiki kunyi? Abifiki mu nsenga ya Kanaana. Tentekyesha shi mu Kanaana ndyo mbalo ibaadi ishaale Abrahame, Isaake na Yaakobo. Kadi mwanda wa nsala, Yaakobo na kifuko kyaaye abayiile mu kushala mu Ejiipitu. Binobino, kunyima kwa bipwa bu 216, Moyiise babanga kukunkusha beena Isaleele bwa kwaluka mu Kanaana. Abafikile mu kabaaka pa mbalo yabetaminaa bu Kadeshe.
Mu nsenga ya Kanaana mubaadi bantu bebubi. Ndyo Moyiise nkutuma ba mpuupa 12 na ebalunga shi: ‘Ndayi nutale kalolo su mwiumbo mwi bantu bebungi na su baba bantu be bukome. Nutale su nsenga ibuwa bwa kukuna bintu. Nwate bingi bikuba bya mu dyadya eumbo.’
Pabalukiile ba mpuupa ku Kadeshe, abalungwile Moyiise shi: ‘Binyibinyi, nyi eumbo dibuwa.’ Bwa kushinkamisha byanka, abalesheshe Moyiise ndambo ya bikuba. Kadi bangi ba mpuupa 10 abambile shi: ‘Bantu batudi bemumone mbantu ba kishiisa kila na be bukome. Atukyebe kwipayibwa su tubatompo kwata dino eumbo.’
Pabapushishe beena Isaleele byabya, ababangile kupusha moo. Abo nkwamba shi: ‘Tubadya kwikala bafwile ata mwinyi mwiumbo dya Ejiipitu pamutwe pa kufwila mu kano kabaaka. Atukayipayibwa mu ngoshi, bakashi beetu na baana beetu abakakwatshibwa. Tusanguleeyi nfumu mupya pa mbalo ya Moyiise, akupu twalukye mu Ejiipitu!’
Kadi babidi ba ku baaba ba mpuupa abaadi batuule lukulupilo mwi Yehowa abo nkumiisha mwilo. Mashina aabo abaadi Yooshwa na Kalebe. Abambile shi: ‘Tanwibatshinanga. Yehowa e neetu. Abikyebe kwikala bibofule bwa kwata dyadya eumbo.’ Kadi mwilo taubaadi wibapushishe. Abaadi abakyebe kwipaa Yooshwa na Kalebe.
Bino bibafitshiishe Yehowa munda ngofu na aye nkulungula Moyiise shi: ‘Munkatshi mwabo muntu ooso kubanga bipwa 20 na kukamina takatwele mu nsenga ya Kanaana. Abo booso abaadi bamone bipaso binaadi mukite mu Ejiipitu na mu kabaaka kadi, tabakyebe kunkokyela. Byabya abakyebe kutambakana mu kabaaka munda mwa bipwa 40 na abikafu muntu a nfudiilo a munkatshi mwabo. Anka Yooshwa na Kalebe nyi abakatwele mu nsenga ya Kanaana.’