Mwanda wa 44
Rakabe afwamisha ba mpuupa
BANO bantu be mu masaku. Abitungu basukye, bisumanga abebayipa. Bano mbapuupa ba beena Isaleele na uno mwana mukashi kwete kwibakwasha, Rakabe. Rakabe mushale mu ino nshibo ku kimano kya kibundji kya Yeeriko. Tubande kutala bwakinyi bano bantu be mu masaku.
Beena Isaleele be pepi na kusabuka Mwela wa Yoordano mu nsenga ya Kanaana. Kadi kumpala kwashi basabukye, Yooshwa batumu ba mpuupa babidi. Bebalungula shi: ‘Endayi mu nkatala eumbo nubekyeele na bi mu Yeeriko.’
Pabatwele ba mpuupa mu Yeeriko, abende ku nshibo ya Rakabe. Kadi mungi muntu balungula nfumu a mu Yeeriko shi: ‘Beena Isaleele babidi mbafikye buno bufuku bwa kubekyeela eumbo.’ Nfumu pabapushishe byabya, batumine bantu kwi Rakabe na abo nkumutumina eyi shi: ‘Tuusha bano bantu bafikye koodi, bano batwele mu nshibo yoobe!’ Kadi Rakabe mufwamishe ba mpuupa mu kisasa kya nshibo yaaye. Ndyo aye nkwibalungula shi: ‘Oolo, bano bantu mbafikye kwandi, anka tangukanga kwabakatukilanga. Bantu baaba mbatukye bufuku mu mufito nsaa ibaabadi abafungu biibi bya lupata. Elondeeneyi nabo bukidi nwi kwibabanga!’ Ndyo bantu nkwibalonda lubilo.
Kunyima kwabo kukatuka, Rakabe bakamiine lubilo mu kisasa. Aye nkulungula ba mpuupa shi: ‘Nauku shi Yehowa enupa dino eumbo. Moo ukata ngwitukwate, booso bashaale mu dino eumbo abenutshinyi mwanda twibapushe abamba shi Yehowa mwinuumishe mema a Kalunga Kamonga nguba akutuuka kwenu kwa mu Ejiipitu mpa na byanudi bayipe ba nfumu babidi, Sihone na Oge. Ne mwinukitshine kalolo, byabya nunkitshine naamu kalolo. Mpeyi kitundwilo kishinkame kya shi: anulekye nshaami na nyinaami na bakwetu balume na bakashi na muwa.’
Ba mpuupa abamulayile shi abebikitshi, kadi abitungu Rakabe akite kintu kampanda. Abo nkumulungula shi: ‘Ata uno moshi wa bwanda bumonga weupudikye kwididishi dya nshibo yoobe, na obungye kifuko kyoobe kishima mu nshibo yoobe. Na patwaluka bwa kukwata eumbo dya Yeeriko, atukyebe kumona uno mooshi kwididishi dyoobe na tatwipaa muntu sungumune e mu nshibo yoobe.’ Pabalukila ba mpuupa kwi Yooshwa, abamulungula byooso bibakitshikile.
Yooshwa 2:1-24; Beena-Ebreeyi 11:31.